کراچی: زورانسری آوار جنگ بوتگیں شعیب بلوچ زاھر کنگ بوتگ، چینیانی سرءَ اُرش ءِ بھتام

چہ کراچی ءَ زورانسری آوار جنگ بوتگیں ھزدار نال ءِ جھمنند شعیب اعظم ءِ گھار ءِ رِد ءَ سی ٹی ڈی کراچی ءَ منی بیگواھیں برات ءِ دزگیری ءِ ٹاہ داتگ ءُ آ ناشرکارے گوشتگ –

ماھرنگ ء اعظم ءِ رِد ءَ سی ٹی ڈی ءَ ٹاہ داتگ کہ منی برات شعیب اعظم گوستگیں روچ ءَ چہ کراچی ءَ دزگیر کتگ – وھدیکہ منی برات ھمے سال ءَ بیست ءُ نھ اپریل ءَ کراچی ءِ دمگ گلشن اقبال بشیر گوٹ ءَ چیریں ادراھانی کارمنداں چی جندے گِس ءَ زورانسری آوار جتگ ءُ بیگواہ کتگ –

کراچی ءَ ایڈمنسٹر مرتضی وہاب ءَ رینجرز اپسرانی ھمراھی ءَ اھوالکارانی گوم ءَ تران کنان ءَ سند ءِ سوبائی وزیر اطلاعات شرجیل میمن ٹاہ داتگ کہ گوستگیں روچ ءَ ہاکس بے ءَ کراچی شھدربرجاہ ءِ اُرش ءَ ھواریں بی ایل ایف ءِ کماندار ءِ دزگیر کتگ –

شرجیل میمن ءَ گوشتگ کہ دزگیرکنگ بوتگیں ناشرکار ءَ کراچی شھدربرجاہ ءِ وتکش تراک کنوکیں زالبولے لوگواجہ ھیبتان بشیر ءُ زیب نامی ناشرکار ءَ گوں گند نند کتگ ءُ چینی استادانی سر ءَ بوتگیں اُرش سوبمند کنائینتگ ، شھدربرجاہ ءِ اُرش ءَ زالبول ءِ ھمراھی ءَ یک دگہ مردمے ھم گون بوتگ، اے تراک ءَ چار مردم ھوار بوتگ انت، کہ آھانی پجار بوتگ انت- وزیر اطلاعات ءَ گوشتگ کہ دزگیر کنگ بوتگیں ناشرکار ءَ وت منّ اِتگ کہ کراچی شھدربرجاہ ءِ وتکش تراک ءِ ماسٹر مائینڈ زیب انت کہ ھمساھگیں ڈیھ ءَ پاکستان ءَ اتکگ –

شعیب اعظم ءِ گھار ماھرنگ اعظم ءَ وتی ٹویٹر اکاؤنٹ ءَ سوبائی وزیر ءِ درسیں گپ رد کرتگ انت ءُ گوشتگ کہ سوبائی وزیر ءِ دروگیں پریس کانفرنس ءَ پد آئی کھول ترس ءِ آماچ انت کہ شعیب ءِ زند ھترھے تہ ءَ انت –

زانگ بہ بیت کراچی شھدربرجاہ ءِ اُرش ءَ پد بلوچستان ءِ بازیں مردمے چہ کراچی ءَ زورانسری آوار جنگ بوتگ انت کہ آھانی تہ ءَ ھزدار نال ءِ جھمنند شعیب اعظم ھم ھوار انت – شعیب اعظم ءِ گھار ءَ ھوار ایندگہ بیگواھیں مردمانی کھولاں بازیں روچ ءِ بیت کہ کراچی پریس کلب ءِ دیم ءَ زھرشانی کنگ ءَ انت –

زانگ بہ بیت چدوپیش ھم کاؤنٹر ٹیررزم ڈپارٹنمنٹ نیمگ ءَ مردمانی دزگیری زاھر کنگ بوتگ کہ آھانی تہ ءَ بازینے پیسر ءَ چہ آوار جنگ ءُ بیگواہ کنگ بوتگ انت کہ آھانی تہ ءَ شال ءَ آوار جنگ بوتگیں حسنین بلوچ ءُ چہ کراچی ءَ آوار جنگ بوتگیں لطیف بلوچ ءَ ھوار دگہ مردمانی نام ھوار انت –

گوستگیں روچ ءَ سی ٹی ڈی ءِ نیمگ ءَ دزگیر کنگ بوتگیں مردمے پجار داد بخش بلوچ ءِ نام ءَ زاھر کنگ بوتگ بلے اھوالکارانی رِد سی ٹی ڈی نیمگ ءَ دزگیری ءَ زاھر کنگ بوتگیں مردم شعیب اعظم ایں –

اھوالکار ءُ تجزیہ نگار عبدالباسط ءِ رِد ءَ پاکستان ءِ مزن وزیر ءِ چین ءِ تر ءُ تاب ءَ پد چین ءَ زور داتگ کہ کراچی شھدربرجاہ ءِ اُرشکار دزگیر کنگ بہ بنت کہ آئی ءَ پد مردم دزگیر کنگ بوگ ءَ انت – اے اُرش ءَ چائینیز کنفیوشس ادارہ ءِ ڈائریکٹر ءَ ھوار سَے چینی مُرتگ انت کہ آھانی کوش ءِ زمّہ واری بی ایل اے مجید برگیڈ ءَ منّ اِتگ انت –

بیگواھیں شعیب اعظم ءِ گھار ءَ دیمتر ءَ گوشتگ کہ سرکاری پریس کانفرنس ءَ پد یک سرکاری ٹویٹر آئی ڈی ءَ منی برات ءِ اکس دیگ بوتگ کہ پد ءَ ھما دمان ءَ ڈلیٹ کنگ بوتگ – شعیب ءِ گھار ءِ رِد ءَ منی برات کراچی شھدربرجاہ ءِ اُرش ءَ ھوار کنگ بوگ ءَ انت – منی برات بیست ءُ نھ اپریل ءَ آوار جنگ بوتگ نوں آئی ءِ دزگیری زاھر کنگ بوگ ءَ انت کہ سراسر رد ءُ دروگ انت –