کراچی: بیگواھیں مردمانی ھاتر ءَ زھرشانی برجاہ، پولیس ءِ گوم ءَ گند نند 

مروچی آدینگ ءِ روچ ءَ بلوچ یکجھتی کمیٹی کراچی ءِ آرگنائزر آمنہ بلوچ ءِ سرکماشی ءَ چہ کراچی ءَ آوار جنگ بوتگیں مردمانی کھولاں سند پولیس ءِ برزی تبک ءِ واکداراں گوں ایس ایس پی ساؤتھ ءِ کارگس ءَ گند ءُ نند کُتگ – سند سرکار ءِ گوشگے پد ءَ سند پولیس ءُ بیگواھیں مردمانی کھول ءِ میان ءَ بوتگیں گند ءُ نند ءَ بیگواھیں مردمانی کھول باور کنائین اتگ انت کہ آوار جنگ بوتگیں مردم زوت یل کنگ بنت –

ھمے وھد ءَ آمنہ بلوچ ءَ چہ کراچی ءَ زورانسری آوار جنگ بوتگیں مردمانی سرجمیں ھال ءُ اھوال ایس ایس پی ساؤتھ اسد رضا ءَ داتگ انت کہ پدا ایس ایس پی ءَ آ باور کنائینتگ انت کہ بیگواھیں مردمانی درگت ءَ ایندگہ سرکاری ادارھاں گوں ھال اھوال کنت ءُ آھاں شوھاز کنت –

پولیس ءَ گوشتگ کہ یک ءُ دو روچ ءِ تہ ءَ دگہ گند ءُ نند ءِ ھم بیت کہ آئی ءِ سرکماشی ءَ سند ءِ وزیر میر شبیر بجارانی کنت –

ھمے وھد ءَ آمنہ بلوچ ءَ گوشتگ کہ بیگواھیں مردمانی کھول پہ شوک ءَ زھرشانی کنگ ءَ نہ انت آ وتی دوستگیں مردمانی یل کنائینگے ھاتر ءَ زھرشانی ءَ انت کہ آھانی کانودی ھک انت –

آھاں پولیس واکدارانی دیما گوشتگ کہ اے مردم کہ آوار جنگ بوگ ءَ انت بے کسور انت اے زورانسری آوار جنگ ءُ بیگواہ کنگ بوگ ءَ انت –

آمنہ بلوچ ءَ گوشتگ کہ اگاں سرکار گپ ءَ گوشنداریت گڈا بیگواھیں مردمانی کھول وتی جستانی پسو ءَ زھرشانی ءِ دروشم ءَ لوٹ انت کہ آھانی کانودی ھک انت –

آمنہ بلوچ ءَ چہ واکداراں لوٹ کتگ کہ جمھوری جھدے اھترام کنگ بہ بیت – سند ءِ سرکار کانود ءُ رھبندانی رِد ءَ بیگواھیں مردماں یل بہ کنت ءُ مئے جمھوری ءُ کانودی زرمبشت ءِ ھلاس کنگ ءَ تاکت کارمرز مہ کنت –

آمنہ بلوچ ءَ چہ کراچی ءَ زورانسری آوار جنگ بوتگیں مردمانی لڑ سند پولیس ءَ داتگ – کہ آئی ءِ رِد ءَ کراچی ءِ دمگ گلستان جوھر ءَ آوار جنگ بوتگیں عبدالحمید زھری، کراچی ءِ دمگ ملیر ءَ آوار جنگ بوتگیں سعید احمد ء محمد عمر، ماری پور ءَ آوار جنگ بوتگیں محمد عمران، چہ لیاری ءَ شوکت بلوچ، رئیس گوٹ ءَ آوار جنگ بوتگیں نوربخش ء حبیب کہ آ سی ٹی ڈی ءُ پھازگی لشکر ءَ آوار جتگ انت –

زانگ بہ بیت کراچی پریس کلب ءِ دیما بیگواھیں مردمانی ھاتر ءَ برجاھیں زھرشانی بنجل ءَ مروچی ھپت روچ سرجم بوتگ انت –