شال : زورانسری آوار جنیانی بگیری ءَ زھرشانی، دوستگیں مردم دیم ءَ آرگ بہ بنت – کھول

بلوچستان ءِ بنجاھی شھر شال ءَ پنچ شمبے ءِ روچ ءَ وائس فار بلوچ مسنگ پرسنز ءِ چیردستی ءَ شال پریس کلب ءِ دیم ءَ زورانسری آوار جنگ بوتگیں ورنا شھزاد بلوچ، مختیار بلوچ، عتیق ءُ احمد ءَ ھوار دگہ بیگواھیں بلوچ نودربرانی یل کنائینگے ھاتر ءَ زھرشانی کنگ بوتگ –

آوار جنگ بوتگیں شھزاد، عتیق الرحمن ءُ احمد پاکستانی پوج ءَ ھمے سال ءَ چار جون ءَ آوار جتگ انت وھدیکہ ڈاکٹر مختیار احمد، طاہر ءُ علی حسن یانزدہ جون ءَ شال ءِ دمگ موسی کالونی ءَ آوار جنگ ءُ بیگواہ کنگ بوتگ انت کہ انگت بیگواہ انت –
زھرشانی ءَ دگہ بیگواھیں مردمانی کھول ھم ھوار بوتگ انت کہ آھاں وتی دوستیگیں مردمانی اکس گون بوتگ انت ءُ زورانسری آوار جنی ءِ بگیری ءَ نبشتگیں پلے کارڈ ءِ دست ءَ بوتگ انت –

ھمے درگت ءَ کھول ءِ مردماں تران کنان ءَ گوشتگ کہ مئے لوٹ نوکیں نہ انت بلکنہ ما ھم ھما لوٹ ءَ کنگ ءَ ایں کہ گوستگیں بازیں سالاں بیگواھیں مردمانی کھول کنگ ءَ انت کہ اگاں مئے مردم کتکار انت گڑا آمدگس ءَ آرگ بہ بنت –

آھانی گوشگ ات کہ پوج ریاست ءِ آمیدگس ءُ کانوداں مان نیارگ انت –

آھاں گوشتگ کہ مئے زند ازاب ءِ تہ ءَ گوازگ انت مارا ھک دیگ بہ بیت مئے درد ءُ پریات اشکُنگ بہ بنت –