کراچی: بیگواھیں مردمانی کھول ءِ نیمگ ءَ زھرشانی بنجل برجاہ

سند ءِ مزن شھر کراچی ءَ پریس کلب ءِ دیم ءَ بیگواھیں مردمانی کھول ءِ نیمگ ءَ زھرشانی بنجل مروچی ھم برجاہ بوتگ – زورانسری آوار جنگ بوتگیں بلوچانی کھول ھوار بوتگ انت –

بیگواھیں مردمانی ھاتر ءَ زھرشانی بنجل ءَ مروچی ششمی روچ انت کہ برجاہ انت، زھرشانی بنجل ءَ زورانسری آوارجنگ بوتگیں عبدالحمید زہری ءِ لوگبانک، بیگواھیں سعید عمر ء کھول، بیگواھیں عمران بلوچ ءِ کھول ءُ ڈاکٹر دین محمد بلوچ ءِ زھگ سمّی دین ءَ ھوار دگہ بیگواھیں مردمانی کھول ءُ بلوچ یکجھتی کمیٹی کراچی ءِ رھشون آمنہ بلوچ ءُ اھوالکار ساڑی بوتگ انت –
ھمے وھد ءَ کراچی پریس کلب ءِ دیم ءَ نشتگیں بیگواھیں مردمانی کھول ءِ گون ءَ دلپدردی درشان کنگ ءَ اتکگیں اھوالکار ءُ ایڈیٹر ونگاس ءَ گوشتگ کہ ریاست مردمانی آوارجنی ءِ بھانہ پٹگ ءَ انت بلے اے زورانسری آوار جنگ بوتگیں مردمانی درگت جواز دات نہ کنت، بیگواھیں مردمانی کھولاں گوستگیں شش روچ انت کہ زھرشانی کنگ ءَ انت ءُ وتی دوستیگیں مردمانی یل کنگے لوٹ ءَ کنگ ءَ انت سند ءِ سرکار ءَ لوٹیت کہ اشانی توار ءَ اش بہ کنت ءُ وت ءَ جمھوریت گشیت گڈا اشی ءَ راست بہ کنت –

کراچی ءَ زھرشانی ءَ نشتگین کیچ ءَ سیادی داروکیں سعید عمر ءِ مات ءَ چہ سند ءِ سرکار لوٹ کتگ کہ آئی ءِ زھگ یل کنگ بہ بیت –

سعید عمر ءِ مات ءَ دیمتر ءَ گوشتگ کہ منی زھگ ءَ ھمے زوتاں چہ روس ءَ وانگ ھلاس کتگ ءُ گِس ءَ اتکگ بوتگ کہ ریاستی ادارھانی کارمندان مئے دیم ءَ آ لٹ شاپ کتگ ءُ گوں وت برتگ ھماانت کہ گار انت آ دیم ءَ آرگ بہ بیت ءُ آئی ءِ گوم ءَ ھک کنگ بہ بیت –

زورانسری آوار جنگ بوتگیں مردمانی کھول ءِ گوشگ ات کہ اگاں بیگواھیں مردمانی بگیری ءَ کتکاری ءِ کیس ءِ ھست گڈا آمیدگس ءَ آرگ بہ بنت بلوچستان ءِ تہ ءَ زوراکی گیش بوتگ ھمک روچ زانگولیں جون دست کپگ انت ءُ اے درچ نوں پاکستان ءِ دگہ شھراں ھم برجاہ بوان انت –

آھان گوشتگ کہ کانود جوڈ کنوکیں ادارہ درکانودی کار کنگ ءَ انت کہ سند ءِ تہ ءَ ھم انسانی ھکانی لگتمالی بوگ ءَ انت اے وھدی مزنیں کچ ءَ مردم سی ٹی ڈی ءُ وفاقی ادارھانی بندیگ جاھان بندیگ انت ءُ بے کسور انت –

بیگواھین مردمانی کھول ءَ سند ءِ سرکار ءَ لوٹ کتگ کہ جمھوری جھدے اھترام کنگ بہ بیت ءُ کانود ءُ رھبندانی رِ دءَ بیگواھیں مردماں یل بہ کنت –