بالی زمین ءِ ھکّیگیں وارس – جیھند بلوچ

نبشتانک:بالی زمین ءِ ھکّیگیں وارس

نبشتہ کار: جیھند بلوچ

دی بلوچستان پوسٹ

پہ سرڈگار ءِ دیمھونی ءِ ھاترا ھزاراں ورناہ ءُ کماش ءُ زالبولاں وتی جان ندر کُتگ اَنت ءُ نمیران ءُ آبدمان بوتگ اَنت چہ ھمیشاں یکے بالی اَت پہ زمین گنوک اَت پہ ھاک ءَ مِھر ءُ بدواھاں نپرت دُژمن ءَ راہ چاریں نیمگاں بستگ اَت ھیلی ھم بُرزا گردگاں اِت اَنت اے وھد ءَ سنگتانی واستا دو راہ بچ اتگ اَت یہ گوں وتی ھُوناں راجدپتر تاک آں بِہ نبیس یہ وتی دست ءِ سلاہ ءَ چگل بدے بلے اے زمین ءَ چوشیں بچ دنیگا پیداک نہ کُتگ کہ جنگ جاہ ءَ یہ تیر ءَ پُشت ءَ بہ وارت یہ سلاہ ءَ دور بِہ دنت بالی گوں ھمراہ لشکر ءِ چاریں نیمگاں انگیر ءَ اَت بلے بالی گوں ھمراہ چوں بولان ءِ کوہ ءَ گیش مُھکم اِت اَنت بالی ءَ گوں ھمراھاں لشکر ءَ جنگ دات ءُ داں آبدمان بوت اَنت-

اے وھد ءَ یک انچیں زاری ءَ مان شانت گُش ئے وش کئوشیں پروم زار بوت بلے وش کئوشیں پروم زار نہ اَت گل ءَ بال اَت کہ منی شش کُنگریں ورنایانی ھُون منی دل بند ءَ تالاب اَنت پہ منی دیمھونی ءِ ھاترا چہ وتی ساہ ءُ سراں سرگوستگ اَنت ءُ نمیران بوتگ اَنت-

نی بلوچ ءِ جنگ سک دیم ءَ اتکگ ءُ مئے لگوریں دُژمن ءَ پروش وارتگ نی آ وھد دیر نہ اِنت کہ مئے دُژمن پد کِنزگ ءَ لاچار بیت اںگ ءُ ما یک ڈیھے ءِ وت واجہ بِہ ایں اے جنگ آجوئی ءُ بلوچ ءِ وشھالی ءِ جنگ اِنت اے جنگ ءَ ورنا الم نمیران بنت پہ ڈیھ ءِ آجوئی ءِ ھاترا ھُون الّم ریچگ لوٹ ایت بلے آیانی رِیتکگیں ھُون سنگتاں گیش مُھکم کن اَنت ءُ جنزگ ءِ آٹیگ دے اَنت-

ما بلوچ مرچی ھر کُجا نشتگیں ءُ وتی بلوچیت ءِ سر ءَ پھر بندیں کہ مارا ھُدا ءَ یک تلاہ رنگیں زمینے داتگ اگاں دُگنیا مارا بلوچے سرپد بیت گُڑا ھمے سنگتانی رتکگیں ھُون اَنت مرچی پاکستان آوار کُلیں جھان سرپد اِنت کہ دُگنیا ءِ توک ءَ بلوچ راج ءِ ھَست اِنت آ مرچیگ اِنت یہ باندات اِنت وتی گنج ءُ گوھریں ءُ تلاہ رنگیں زمین ءَ موک ایت-

ما اگاں راجدپتر ءَ بچاریں گُڑا مارا بازیں آجوئی ءِ کسّہ دست کپ ایت کُجام ھم ایردسیں راج ءِ بوتگ آئی ءَ وتی دُژمن ءَ گوں جنگ داتگ ءُ وتی ڈیھ ءِ نہ موک اِتگ ؟ اگاں سد سال گوستگ بلے وتی ڈیھ ءِ وت واجہ الّم بوتگ بلوچ ھم وتی ڈیھ ءِ وت واجہ بیت ایں ءُ بِہ گندے پاکستان مرچی سنگتانی ریتگیں ھُون ءَ پوہ نہ بیت بلے باندا روچ الم پوہ بیت-

بالی جان گوں ھمراھاں آوار بلوچستان ءِ کُلیں شھید نمیران اَنت شھیدا وتی نمیرانی ءِ کسّہ راج دپتر ءَ نکش کُتگ اَنت ءُ آبدمان بوتگ اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔