جمھوریت ءِ ٹاہ جنوکیں ھکومت بیگواھیں مردمانی کھول گوشدارگ ءَ ساڑی نہ اِنت – سعیدہ حمید

بلوچ بیگواھیں مردم کھول ءِ نیمگ ءَ چہ شُدکُشیں بُنجل ءَ پنچمی روچ ءَ ھم کراچی پریس کلب ءِ دیم ءَ برجاہ ءَ اِنت- چہ کراچی ءَ زورانسری آوار جنی ءَ نشانگ بوتگیں مردمانی کھول ھوار اَنت-

شُدکُشیں ھڑتالی بُنجل ءَ بیگواھیں مردمانی کھول ءُ بلوچ یکجھتی کمیٹی ءِ نیمگ ءَ چہ جوڑ کنگ بوتگ، زھرشانی ئیں بُنجل ءَ بیگواھیں عبدالحمید زھری ءِ لوگ بانُک ءُ چُک ، بیگواھیں سعید عمر ءِ مات ، بیگواھیں عمران بلوچ ءِ مات ءُ ڈاکٹر دین محمد ءِ جنک سمّی دین ءَ ھوار دگہ بیگواھیں مردمانی کھول ھوار بوتگ اَنت – بلوچ یکجھتی ءِ آمنہ بلوچ ءُ دگہ سیاسی چاگردی باسک ھوار بوتگ اَنت-

گوستگیں پنچ ءَ روچ چہ کراچی پریس کلب ءِ دیم زھرشانی ءَ نشتگ اَنت ءُ سندھ ءِ جتائیں دمگاں چہ آوار جنگ بوتگیں مردم سندھ ھکومت ءَ چہ بیگواھیں دوستانکانی یل کنائینگ ءِ لوٹ کتگ-

زھرشانی ءَ ھوار بیگواھیں عبدالحمید زھری ءِ جنک سعیدہ حمید ءَ گْوشتگ کہ چو سندھ ھکومت جمھوریت راجی تاکت ءِ ٹاہ ءَ جن اَنت بلے گوستگیں پنچ روچ ءُ چہ بیگواھیں مردمانی کھول وتی پریات زرتگ ءُ اد ءَ زھرشانی ءَ لاچار اَنت یکے ءَ ھم اھمت نہ بیت آ بیگواھیں مردمانی کھول ءَ اش بہ کن اَنت-

سعیدہ حمید ءَ گْوشتگ کہ پت ءِ زورانسری آوار جنی سوب ءَ مئے گھارانی وانگ سر ءَ اَسر کپتگ منی چکاس بوگ ءَ اَنت بلے من آں چہ اشی ءَ ھچ پرک نہ بیت کہ بے سوب باں یا سوبمند باں من ءَ وتی پت کر ءَ بوگی اِنت من ءَ وتی پت اے آزارجاھاں چہ آجو کنائینگی اِنت-

کھول گوشگ اِنت کہ اگاں بیگواھیں مردمانی بگیری ءَ چُشیں منّانک ھست گُڑا آیاں آمیدگس ءَ بیار اَنت-

بلوچستان ءَ زوراکی ءُ ازیت سر ءَ اَنت ھمکروچ ٹپ ءُ ٹوریں لاش دست کپگ اَنت ءُ اے دْرچ پاکستان ءِ دگہ شھراں شنگ ءُ تالان اِنت-

بیگواھیں مردمانی کھول ءَ سندھ ھکومت ءَ گوں لوٹ کتگ کہ جمھوری جُد ءُ جُھد اھترام کنگ بہ بیت ءُ کانود ءُ آئین تہ ءَ بہ بیت ءُ سندھ ءَ چہ بیگواھیں مردمانی یل کنائینگ ءَ باور بہ کنائین اَنت –