زامران ءَ پاکستانی پوج ءِ سر ءَ بوتگیں اُرش ءِ زمّہ واری بی ایل ایپ ءَ منّ اِتگ

نھنگ تنک ءَ پاکستانی پوج ءِ چار کارمند کُشتگ ءُ کپٹن ءَ ھوار دو زدگ کتگ انت – میجر گوھرام بلوچ

بلوچ سلاہ بندیں گل بلوچستان لبریشن پرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ کیچ ءِ دمگ زامران ءَ پاکستانی پوج ءِ سر ءَ بوتگیں اُرش ءِ زمّہ واری منّ اِتگ –

جارکش گوھرام بلوچ ءَ گوشتگ کہ مئے سرمچاراں بیست ءُ نُھ جون ءِ سھب ءِ ادار ھپت ءُ پنجاہ ءَ کیچ ءِ دمگ زامران ءَ نھنگ تنک، کاپر کور ءَ پاکستانی پوج ءِ کاروان ءِ سر ءَ اُرش کُتگ –
آئی ءَ گوشتگ کہ اُرش ءَ راکٹ ءُ دگہ مزنیں سلاہ کارمرز کنگ بوتگ انت – اُرش ءِ آسر ءَ چار پوجی کارمند مُرتگ انت ءُ کیپٹن ءَ ھوار دو کارمند سک باز زدگ بوتگ انت –

جارکش ءَ گوشتگ کہ اُرش ءَ پد دژمن پوج ءِ دو جنگی بالگرد جنگجاہ ءَ سربوتگ انت یک بالگرد ءَ جون ءُ زدگ بوتگیں کارمند زرتگ ءُ وتی ھیڈکوارٹر نیمگ ءَ شتگ وھدیکہ دومی بالگرد ءَ کوھانی تہ ءَ شیلنگ کرتگ –

جارکش ءَ گشتگ کہ دژمن پوج ءِ سر ءَ سوبمندیں اُرش ءَ پد سرمچار وش ءُ سلامتی وتی اوتاگاں سر بوتگ انت – آئی ءَ گوشتگ کہ دژمن پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –