منی ھردو برات پاکستانی پوج ءَ آوار جتگ ءُ بیگواہ کتگ انت – محمد عمر سرپرہ

بلوچستان ءِ دمگ نوشکی ءَ سیادی داروکیں محمد عمر سرپرہ ءَ وتی دوئیں براتانی زورانسری آوار جنی ءِ سرجمیں ھال بیگواھیں مردمانی پانکجنیں گل وائس فار بلوچ مسنگ پرسنز ءِ گور ءَ نبشتہ کنائینتگ انت –

محمد عمر سرپرہ ءَ گوشتگ کہ منی ھردو برات زاکر احمد ءُ راشد احمد ء محمد یوسف سرپرہ پاکستانی پوج ءَ زورانسری آوار جتگ ءُ بیگواہ کتگ انت –

محمد عمر ءَ گوشتگ کہ سِی اگست سال دوھزار بیست ءُ یک ءَ منی برات زاکر نوشکی ءَ ڈی سی کارگس ءَ پوج ءَ آوار جتگ ءُ بیگواہ کتگ وھدیکہ راشد پوج ءَ گس ءِ سرا بیڑ برتگ ءُ زورانسری آوار جتگ پدا رند ءَ آھانی ھچ وڈیں ھال اھوال نیست کہ کجا انت ءُ چی ھال ءَ انت –

آئی ءَ گوشتگ کہ منی برات سرجمیں دمگے چمانی دیما آوار جنگ ءُ بیگواہ کنگ بوتگ انت – وھدیکہ پولیس ءُ دگہ جاھاں آھانی یل کنگ ءُ شوھاز ءِ جھد کتگ بلے مارا یکیں پسو رستگ کہ منی برات چیریں ایجنسیاں گون انت –

زانگ بہ بیت بلوچستان ءَ زورانسری آوار جنیانی درگت ءَ بیگواھیں مردمانی کھول ءُ دگہ تبک ءِ مردم اے الزام ءَ پوج ءِ سرا جن انت مردمانی گوشگ انت کہ پوج ءِ بگیری ءَ گواہ ھم ھست انت کہ آھانی دست مردمانی آوار جنی ءَ مان انت بلے پوج مدامی اے الزاماں رد کنگ ءَ انت –