نبشتانک: مات ءِ یکیں بچ اَت زھور جان
نبشتہ کار : شیردل بلوچ
دی بلوچستان پوسٹ
لھتیں دانک گوں دل ءِ پاھاراں نبیس اتگ آں ، نہ زاناں وتی نبشتہ چہ کج ءَ بندات ءُ چون آسر بہ کناں ؟ ھما جاہ ءَ منی ھیال ءُ زانت آسر بیت، آئی پلگاریں پگر بندات بنت، منی کر ءَ چُشیں گال ءُ گالریچ نیست آئی سسا ءِ بابت ءَ درشان اِش بہ کناں۔
زاناں ھما کس بیگواھیں “زاکر مجید ءُ زاھد کرد ءِ رودینتگیں نھالے بوتگ زاناں شھید رزا جھانگیر ءُ کمبر چاکر ءِ داتگیں درونت ئِے دربرتگ اَنت زاناں بابا ھیربکش ناز ءِ ھمراہ بوتگ۔
زاناں انچیں کسّاں گوں نشتگ ءُ پاداتکگ، آیانی بالاد ءِ سیاھگ ءَ رُستگیں ھمک درچک ءَ را زورگِر ولگوج کنگ ءُ ماندارگ لوٹ ایت، پرچا کہ دژمن وتی تباھی ءَ چَمّ ء وت گندگ ءَ اِنت، وتی تیوگیں زوراں گوں آجوئی ءِ کاروان ءِ سر ءَ کارمرز کنت زوراکی ءِ آکبت زورگِر ءِ پْروش بیت ءُ بلوچ وتن ءِ آجوئی اِنت-
ھمے گالریچاں کسے ءِ بابت ءَ نبیسگ ءَ آں گڑا ھما کس “زھور جان پنام بالی اِنت “چہ درکسانی ءَ دیستگ ءُ چَمانی دیم ءَ رُستگ ءُ ورنا بوتگ مات ءِ یکیں بچ اَت “زھوجان ” گُھاراناں روچ ءِ گرمیں بَرانزاں پہ ھم دل ءِ نہ بوتگ۔ بلے! راج ءِ آجوئی ءِ کاروان ءَ پہ واھگے موکل داتگ اِش “-
اگاں” ماتے بُگش ایت من ءَ منی بچ دوست بوتگ، گڑا چہ ھما مھروان ءُ سرپدیں ماتاں یکے” زھورجان ءِ مکھیں مات شمار بیت بچ ءِ دوستی ءِ دراھیں ھک ئِے پیلو کرتگ اَنت، بزاں رودینگ ءُ وانینگ ءَ مات ءَ وت آئی نگھبانی کرتگ بچ ءِ گُڈی ھک آئی ءِ سانگ ءُ سور اَت اے ھم پیلو کرتگ جاہ آھو کوھڑو ءِ مَیزرین ھنکین ءِ پہ شاتکامی دُھل ءُ چاپ سور ءِ کلّہ سر کرتگ اَت ۔
اے گپّ ءَ ھرکس شَرّ زانت ءُ سرپد بیت، کہ” آشوب چہ چُکاں ھون لوٹ ایت” ابید چہ ھون ءِ دیگ ءَ مَیزران نہ بیت بلکین ءَ گیمر اِیت مرچی بلوچ ءِ جنگ ءِ بابت ءَ مارا راجدپتر پولگ نہ لوٹ ایت دراھیں کارست اے جنگ ءَ وَ پدر کرتگ اَنت جھان اِش گندگ ءَ اِنت ، اگاں گوست ءِ گپّ بہ بیت” میرچاکر رند ءِ گھار بی بی بانڈی ءَ گوں وتی برات ءِ دژمناں جنگ ءِ پڑ ءَ دیم پہ دیم اوشتاتگ ءُ جنگی کمان وت سمبال اِتگ دژمن پدکنزگ ءَ لاچار کرتگ اَنت، مرچی بلوچ برات ءِ ھمُک گھار ھما کارست ءَ دیم ءَ بَرگ ءَ اَنت، نوں گپّ چہ نام ءِ گرگ ءَ سک ءَ دیم ءَ گوستگ، بوت کنت نام ءِ گرگ ءَ کسے ءِ دل آزاری بہ بیت پرچا کہ نامانی لڑے دارجیں ھرچ گُھار گوں جُتائیں کارستاں راجدپتر پلگار اِتگ۔
اے گپّ ءَ ما گوں پھر ءُ شان ءَ گوش اِیں شھیدانی رِتگیں ھون رنگ کار اَنت اے جنگ نوں وتی گڈی منزل ءَ رس ایت، زورگِریں استان ءِ بھر ءَ چہ پْرش ءُ ابید دگہ ھچ نہ بچ اِتگ مدام ءَ بلوچ ءِ پدمنتگ کنگ ءِ واستا زورگِریں دژمناں ھرچ وڑیں پندل ساز اِتگ ءُ بلوچ ءَ را نابود کنگ ءِ بے سوبین جھد کرتگ اَنت، بلوچ ءِ زمین بھر ءُ بانگ کرتگ، انچو بلوچ ءَ را پہ بلوچاں وانگ ءُ روزگار ءِ دَر بند کرتگ اَنت، بلوچ ءَ را لاچار کرتگ چہ وتی راجی پچار ءُ شناس دزکش بیت۔
اگاں اناں گڑا بلوچ ءِ چکچینی کنگی ءُ زندگ بوگ ءِ ھمک ھک پچ گپتگ اَنت ءُ انوں پد ءَ ھمے وڑ کنگ ءَ اَنت، بلوچ ءِ سر ءَ دراھیں پندل ءُ زوراکی کارمرز بوگ ءَ اَنت اے وَ راستے ایردستی ءُ چَمّداری راجاں گار کنت آجوئی ءِجنگ زندگ دار اِیت ۔
بلے بلوچ ءِ راجدپتر ءِ تاک تمردانی کسھاں چکار اَنت مدام زورگِریں دژمناں گوں جنگ داتگ اَنت شیرزالیں ماتاں پہ لج ءُ ننگ ءُ زمین ءِ پھازگ ءَ وتی بچاں دست بڈ ءَ جتگ ءُ جنگ ءِ پڑ ءَ راہ داتگ اَنت چہ ھمے شیرزالیں ماتاں یکے شھید “زھورجان پنام بالی بلوچ ءِ مکھیں مات “ھیر بی بی اِنت ، وتی یکیں بچ ءَ را چہ گلزمین ءَ دوست نہ داشتگ اَت ھمے راہ ءَ پہ وتی راج ءِ آکبت ءِ وشھالی ءُ راج ءِ وتواجھی ءَ ندر بوگ ءِ راہ ءَ دیم داتگ، زانتگ اَت، اے راہ ءِ آسر چی بیت-
“وتن یا کپن”
“آجوئی یا مِرگ”
اے روچ گندگ ءَ کاینت یکیں” بچ ءُ گُھارانی لاڈوکیں برات ھم گستا کنگ بیت پہ مراد ءُ واھگے سانگ ءُ سور داتگ اَت کاڑے دَرچِتگ وتی بالی جان سالونک کرت اَت مرچی پہ ھما لاڈین نشار ءَ سیاہ پوشاکی ءِ روچاں اَتک ءُ رس اِت چُکانی پِت ءِ مھر ءُ سر ءِ سارتیں سیاھگ دائمی پچگرگ بوتگ نوزدہ جلکان دو ھزار بیست ءُ دو [19/06/2022] ءَ ماں پروم پنجگور ءَ انجیرکوہ ءَ زورگِر ءُ لگوریں دژمن گوں بالگراباں کنگرانیں بچانی سر ءَ اُرش کرتگ یک نیمگ شش نرمزاریں سرمچنڈیں ءُ دومی نیمگ ءَ سداں پوجیگ ءُ زَر زورتیں دلارانی میانجی اے جنگ سھب ءَ مچ اِتگ دو روچ بالگرداں گَشتگ ءُ تیرگواری کرتگ اولی روچ ءِ ترند میڑ ءَ بیگاہ ءِ وھد ءَ زھورجان پنام بالی جان ، سابرجان پنام تاھیرجان ساجوجان پنام سمیرجان ،اکبرجان پنام ھمل جان ، ساجد جان ، پنام سگار جان ءُ کسان سالیں “اَتاجان نمیران بوتگ اَنت انجیر کوہ ءِ شھید بالدوست ءَ گوں ھمراھاں ءُ جلکان ءِ ءُ سرڈگار ءِ دراھیں شھیداں سھرچکیں دروت ندر کناں۔
” آجوئی زندگ بات “
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔