مدتے بیت کہ شارُل نہ دیستگ – شُپانک بلوچ

نبشتانک: مدتے بیت کہ شارُل نہ دیستگ

نبشتہ کار: شُپانک بلوچ

دی بلوچستان پوسٹ

کمبرو اچ تئی روگ ءَ رند مدتے بیت کہ میتگ ءِ دْروشم من نہ دیستگ شارل ءِ یاتاں مدام ننداں جیڑاں دل پاهار کش ایت ، بارین کہ بلّی چتور اِنت ، ماسی ماهاتون باریں انگت سُهبانی سر ءَ کُپ اِت ءُ نورنڈی ءَ گوں چوّْک ءَ زور ایت سر گیپت پہ جنگل ءَ ، جُوے گانیگ ءُ آپدار شارل ءِ یات برے برے زهیریگ کن اَنت بلے چے کناں وهد ءَ تئی جتائی ءَ هوار شارل گوں میتگ ءَ سست ءُ جتا کت اچ من ، کمبرو تو باریں سرپدے جنگی زی کہ من دیست منی گیمرتگیں بالاد ءِ دیست همے گْوشت ئِے کہ شپانک تو شارل ءِ ترانگاں نہ کپ ئِے زاناں کمبر شموشتگ بلکیں ،؟ سک دردئیگ بوت آں ، بلے چے کن ئے جنگی نپس زور ٹپاں واد پِر ریچ اِیت-

بلے کمبر من نہ اچ ترا شموشکار باں نہ کہ شارل ءُ پیر زال ءَ گپے سرپدے اچ تئی روگ ءَ دو تیر وارتگ سک نگیگ بوتگاں درد ءُ دورانی تہ ءَ مان گیش اِتگ آں نوں کمیں وهد بیت کہ پاد زمین ءَ ایر باں پرپٹ ءَ سوار بوت کن آں بلے میتگ گوں شارل ءُ بلی ءَ لڈ ءُ بار بوتگ ، ماں شهر ءَ شتگ من ءَ پِیری باهوو ءَ هال دات کہ شارل ءِ لوگ سوتکگ انت اش ءُ بلی گوں شارل ءَ لڈ اِتگ ، دل ءَ آس لگ اِت تیر وارتگیں بدن ءِ ٹپ پد ءَ نوک بوت اَنت-

مدتے ءَ رند تاکے گوں درداں نبشتہ کنگ ءَ آں ، کمبرو گپے زان ئے بوت کنت یار تو منی ترانگاں بہ کپے یا اناں بلے من ترا همک کشک ءَ یات کنگ آں تئی نام ءَ گراں ، دو هزار ءُ بیست نزاناں چتوریں سال بوت کہ ترا سست ءُ جتا ئِے کت بلے لھتے سپر انگت بہ ترا ابیتکیانی در انت ، اے مرزبومی ئیں سپر داں جهد ءِ منزل ءَ المی ءِ جار ءَ جنت بلے سالونک بوگ ءَ پیسر ءُ تئی هنکین ءَ آیگ ءَ پیسر ارمان بستگ دل ءَ میتگ بلکیں چمان اندیم بوت بلے شاری ءَ بہ گنداں بلکیں تئی دیم ءَ آیگ ءَ میاری مہ باں-

ترا بلکیں یات بیت کہ کولواه ءِ سپرے ءَ هور ءَ مار گپت ءُ ما سر بلی ءِ اوتاک ءَ کش اِت شکر میس اتگ انت ، زمیر جان نشتگ ءُ کور ءَ اکس کشگ ءَ ات ندارگاں کید کنگ ءَ ات ، بلے تو وَ سرپدے کہ لھتے روچ بیت بالی لڈ اِت چہ مهرانی هنکین ءَ گوں سنگتاں شمئے دیار ءَ شت ، بلے زی همے کہ شمئے یاتانی ماسگ ءَ لنککاں اڑیناں اے سپتگیں بدن بس شمئے مهرانی درماناں سر ءَ ایریچ ایت ، کجام کسہ ءَ بیاراں کہ شپ وتی سیمسراں اندیم بہ کنت روچے چادر ءَ بہ پوش ایت بلے سنگر شمئے مهکمی ءَ دائم ایمن اِنت ، شیهو اوں لڈ ءُ بار کت ، کہ زردے ٹپانی درمانی ءَ مدام گوں وشیں توار ءُ نورے دستونکانی جار چین اَت بلے نور ءَ اوں دمانے نہ جل اِت کہ شیهو ءِ سنگر هالیگ اَت نوں همے کہ دیگر ءِ شینک وتی گوشان ءَ پوش اَنت آزمان ءَ گوهریں درد شمئے ترانگانی هشتر ءَ رهت کنت ءُ بلوچستان ءِ کنڈ کنڈ ءَ گول ایت بلے اے ساربان باریں کدی شارل ءِ گند ءُ گدارے ءَ شپ ئے جل ایت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔