بلوچستان فزیوتھراپیسٹ ءِ اسمبلی ءِ دیما زھرشانی

بلوچستان ءِ بنجاھی شھر شال ءَ مرچی شانزدہ روچ ایں کہ بلوچستان فزیوتھراپی ایسوسی ایشن ءِ زھرشانی بنجل برجاہ انت- بلوچستان فزیوتھراپی ایسوسی ایشن ءِ وتی لوٹانی ھک ءَ زھرشانی بنجل برجم کتگ ءُ نشتگ انت – زھرشانی کنوکانی رِد ءَ مدامی وڈا سرکار سنجیدگی ءِ گوم ءَ فزیوتھراپیسٹ ڈاکٹرانی جیڑہ گیشگیوار کنگ ءَ نہ انت –

بلوچستان فزیوتھراپی ایسوسی ایشن ءِ دوشمبے ءِ روچ ءَ شال پریس کلب ءَ بگر تاں اسمبلی ءَ روانک ءِ کش اِتگ پدا رند ءَ فزیوتھراپیسٹ بلوچستان اسمبلی ءِ دیم ءَ نندانک جتگ ءُ نشتگ انت کہ اودا پدا رند ءَ بی این پی مینگل ءِ سوبائی پارلیمان ءِ باسک شکیلہ نوید دھوار، ثنا بلوچ ءُ واکدارانی پاٹی ءِ نیمگ ءَ بشرہ رند ءَ بلوچستان فزیوتھراپی ایسوسی ایشن ءِ باسکانی گوم ءَ گند ءُ نند کتگ ءُ جیڑھانی گیشگیوار کنگ ءَ گند ءُ نندی پتر ءِ اڈ داتگ –

اے میان ءَ سوبائی جانسلامتی ءِ وزیر سید احسان شاہ ءُ سوبائی اسمبلی ءِ دگہ باسک ءُ بلوچستان فزیوتھراپی ایسوسی ایشن ءِ باسکانی میان ءَ میٹنگ ءِ کنگ بوتگ کہ بلوچستان فزیوتھراپی ایسوسی ایشن ءِ باسکاں وتی درسیں لوٹ جانسلامتی ءِ دیم ءَ ایر کتگ انت سوبائی جانسلامتی ءِ وزیر سَے روچ ءِ وھد لوٹ اِتگ ءُ باور کنائینتگ سرجمیں لوٹ گیش گیوار کنگ بنت –

بلوچستان فزیوتھراپی ایسوسی ایشن ءِسرکار ءِ وزیرانی میان ءَ بوتگیں گند ءُ نند ءَ پد اسمبلی ءِ دیم ءَ نندانک ھلاس کتگ بلے زھرشانی کنوک ءَ گوشتگ شال پریس کلب ءِ دیم ءِ زھرشانی بنجل تاں ھما وھد ءَ برجاہ بیت کہ مئے لوٹ سرجم کنگ نہ بنت –

زھرشانی کنوکیں فزیوتھراپیسٹانی گوشگ ات کہ اگاں سَے روچ ءِ تہ ءَ مئے سرجمیں لوٹ منّگ نہ بوتاں گڈا مئے دیمتری کار اشاں چہ ھم ترندتر بنت ءُ اگان اے میان ءَ مئے سرا ھر وڈیں جیڑھے کپت آئی ءِ زمہ دار ھستیں وھدے سرکار انت-