بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زورانسری آوار جنیانی بگیری ءَ زھرشانی بنجل برجاہ، زھرشانی ءَ بنجل ءَ مروچی چار ھزار ءُ شش سد ءُ ھشتاد ءُ پنچ روچ سرجم بوتگ انت –
زھرشانی بنجل ءَ مروچی چہ شال ءَ بیبرگ بلوچ، عبدالکریم بلوچ، نور احمد بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گون ءَ دلپدردی درشان اتگ-
بنجل ءَ اتکگیں مردمانی میان ءَ تران کنان ءَ گل ءِ کمک سرکماش ماما قدیر بلوچ ءَ گوشتگ کہ بلوچستان ءِ تہ ءَ ریاستی ناشرکاریانی تہ ءَ گیشی آرگ بوتگ پاکستانی پوج ءَ وتی داشتگیں کشندہ ٹولیانی ھمراھی ءَ بازیں دمگاں لشکر کشی ءُ زوراکی ءُ زورانسری آوار جنیانی درچ برجاہ داشتگ انت- بلوچ کھول ھمک روچ پُرایمنیں جھدے بھر جوڈ بوگ ءَ انت وتی دوستیگیں مردمانی یل کنائینگے ءِ ھاتر ءَ ریاستی زوراکیاں ھچ کس پدکنز نہ بیت ءُ ما بلوچ کھولانی ھمراھی ءَ پرایمنیں جھد ءَ یک گام ءَ ھم پد نہ کنزیں –
ماما قدیر بلوچ ءَ گوشتگ کہ بلوچ پرزندانی پہ ڈیھے ھاتر ءَ دیمھونی ءُ مئے مات ءُ گھارانی جھد ءَ ریاست پریشان بوتگ ءُ گوستگیں ماھانی تہ ءَ زورانسری آوار جنی ءُ زانگولیں جونانی چگل دیگ ءَ بازیں گیشی ءِ آرتگے –
آئی ءَ گوشتگ کہ پاکستانی ریاست ءَ میاں استمانی انسانی ھکانی کانود لگتمال کتگ انت بلے آئی ءَ جست پُرس کنوک نیست- انسانی ھکانی گلانی درشان بس کاگزی جوڈ بوتگ انت – انسانی ھکانی درگت بلوچستان بلیک ھول جوڈ بوان انت استمانی ءُ میاں استمانی رسانکدر بلیک آؤٹ انت درساں وتی چم بستگ انت –
ماما قدیر بلوچ ءَ گوشتگ کہ انسانی ھکانی ادارھانی نیمگ ءَ گامگیج زورگ ءُ جار جنگ ءَ ابید ھم ناکہ انسانی ھکانی بگیری دارگ ءَ کمی اتکگ ناکہ آئی ءِ سرا گامگیج زورگ بوگ انت-