کراچی : زورانسری آوارجنیانی بگیری ءَ مروچی دومی روچ ءَ ھم زھرشانی

بیگواھیں بلوچانی کھول ءِ نیمگ ءَ مروچی دومی روچ ءَ ھم کراچی پریس کلب ءِ دیم ءَ زھرشانی بنجل برجاہ بوتگ – چہ کراچی ءَ زورانسری آوار جنگ بوتگیں مردمانی کھولاں ھم بھر زرتگ –

زھرشانی بنجل بیگواھیں مردمانی کھول ءُ بلوچ یکجھتی کمیٹی ءِ نیمگ ءَ برجم کنگ بوتگ، زھرشانی بنجل ءَ بیگواھیں عبدالحمید زھری ءِ لوگبانک ءُ زھگ، بیگواھیں سعید عمر ءِ مات، بیگواھیں عمران بلوچ ءِ مات ءُ ڈاکٹر دین محمد بلوچ ءِ زھگ سمی دین ءَ ھوار دگہ بیگواھیں مردمانی کھول ھوار بوتگ انت –

بیگواھیں مردمانی کھولاں تشدد ءِ آماچ بوتگیں مردمانی میاں استمانی روچ ءَ وتی زھرشانی نبشتہ کنائینتگ ءُ ھمے میان ءَ زھرشانی کنوکاں بیگواھیں مردمانی اکس زرتگ ءُ ٹیبلو ھم کتگ – زھرشانی سیاسی ءُ چاگردی باسکاں ھوار نودربر ءُ دگہ تک پھناتاں سیادی داروکیں مردماں بھر زرتگ ءُ بیگواھیں مردمانی کھول ءِ گوم ءَ دلپدردی درشان اتگ –

زانگ بہ بیت اے مردم سند ءُ بلوچستان ءِ جتا جتائیں ھند ءُ دمگاں آوار جنگ ءُ بیگواہ کنگ بوتگ انت کہ ھنگت بیگواہ انت – کراچی ءِ زھرشانی ءَ ھواریں مردماں سند ءِ سرکار ءَ وتی دوستیگیں مردمانی یل کنگے لوٹ کتگ –

زھرشانی ءَ ھواریں بلوچ یکجھتی کمیٹی ءِ رھشونانی گوشگ ات کہ زورانسری آوار جنگ بوتگیں مردمانی یل کنائینگے جھد یک پُرایمنیں ءُ جمھوری تھریک ءِ بیگواھیں مردمانی کھول کانود ءِ رھبندانی رِد ءَ وتی دوستیگیں مردمانی ھاتر ءَ جھد انت سرکار ءُ آئی ءِ ادارہ کانودانی رھبندان پیلو بہ کن انت ءُ بیگواھیں مردماں آمیدگس ءَ بیار انت –
آھانی گوشگ ات کہ اگاں آوار جنگ بوتگیں مردمانی بگیری ءَ گواہ ءِ ھست آمیدگس ءَ آرگ بہ بنت – بلوچستان ءَ زوراکی سک باز بوھگ ءَ انت ھمک روچ زانگولیں جون دست کپگ ءَ انت نوں اے درچ پاکستان ءِ دگہ شھراں ھم بندات بوتگ انت –

بیگواھیں مردمانی کھولاں چہ سند ءِ سرکار ءَ لوٹ کتگ کہ جمھوری جھدے اھترام کنگ بہ بیت ءُ سند سرکار کانود ءُ رھبندانی رِد ءَ بیگواھین مردماں یل بہ کنائینت اگاں ناں گڑا زھرشانیانی درچ گیش ءُ ترندتر کنگ بیت اِنت –