گوادر ءَ پاکستانی سروزیر ءِ تر ءُ تاب، دو ورناہ بیگواہ

بلوچستان ءِ تیابدپی شھر چہ گوادر ءَ پاکستانی لشکر ءَ ورنائیں نودربرے ءَ ھوار دو کس دزگیر کنگ ءَ پد ناشناسیں جاھاں برتگ اَنت-

آوار جنگ بیتگیں ورنایانی پجار خلیل ء جلیل ءُ جیئند ء خلیل جھمنند دشت جان مھمد بازار ءِ ناماں زانگ بیتگ اَنت-

بیگواہ کنگ بیتگیں ھبدہ سالی ئیں خلیل تربت یونیورسٹی ءِ بلوچی لٹریچرل ءِ نودربرے ءُ ھژدہ سالی ئیں جیئند سیمسراں ڈیزل ءِ کار ءُ بار ءَ بندوک اِنت کہ آ گوادر ءَ گھٹی ڈور ءَ بیست ءُ سَے جون ءَ دزگیر کنگ ءَ بیگواہ کنگ بیتگ اَنت-

دمگی مردمانی رد ءَ اے مردمانی دزگیری ءِ وھد ءَ پوج بازیں کچے ءَ گوں لس پوشاکی مردماں دمگ ءَ سر بیتگ ءُ پولیس ھم جاڑیگ بیتگ –

اے گرگ بیتگیں مردمانی زورانسری آوار جنی ءِ درگت ءَ بلوچ نیشنل مومنٹ ءِ ہیومن رائٹس ڈپارٹمنٹ پانک ءَ چاگردی ترامجاہ ٹوئٹر ءَ یک شنگ کتگیں درشانے ءِ تہ ءَ گُشتگ ھردوکیں مردم پوج ءَ پاکستانی سر وزیر شھباز شریف ءِ تر ءُ تاب ءِ وھد ءَ دزگیر کنگ ءَ پد بیگواہ کرتگ اَنت-

زانگ بہ بیت گوادر ءَ پاکستانی سروزیر ءِ تر ءُ تاب ءِ وھد ءَ مھلوک بازیں کچے ءَ دگانی سر ءَ زھرشانی ءَ درکپتگ اَنت کہ آیانی تہ ءَ زالبول ءُ زھگ ھوار بیتگ اَنت-

سَے جولائی دو ھزار ءُ پانزدہ ءَ پاکستانی پوج ءِ دست ءَ آوار جنگ بیتگیں عظیم دوست مھمد ءِ کھول ءِ دزبندی ءُ گوادر ءَ بندوکیں دگہ بیگواھیں مردمانی کھولاں زھرشانی ءِ کتگ کہ چریشی ءَ گوادر ءَ بندوکیں سیاسی مھلوک ءَ ھوار زالبول ھوار بیتگ اَنت-

ھمے وھد ءَ بیگواھیں عظیم دوست ءِ گوھار ءَ دزبندی کتگ کہ منی برات ءَ یلو بہ کن اِت ءُ ھروھد ءَ ما ھمے یکیں لوٹ ءَ کنگ ءَ ایں اگاں جرمکارے گڑا آمیدگساں پیش کنگ بہ بیت –