بلوچستان ءِ تیابدپی شھر گوادر ءَ تھ آپی یکشل ءَ برجاہ اِنت-
گیشین ھالانی رد ءَ مروچی گوادر ءِ دمگ دربیلہ ءَ تھ آپی ءِ سبب ءَ دمگی مھلوک ءَ زھرشانی کنان ءَ نیو انٹرنیشنل ائیرپورٹ ءِ نزیک ءَ مزن شھدگ بند کرتگ ءُ نندانک جتگ ءُ ھرچ وڑیں روانی مھتل کتگ اَنت زھرشانی کنوک دمگ ءَ تھ آپی ءِ ھلاسی ءُ سر کنگ ءِ لوٹ ءَ کنگ ءَ اَنت-
زھرشانی کنوکانی گوشگ اِنت کہ ھمک روچ زھرشانی ءُ نندانکاں ابید ھم سرکار آپ ءِ سر کنگ ءِ ھچ پیمیں گامگیج زیرگ ءَ نہ اِنت آیاں گُشتگ شھراں آپ نہ بوگ ءُ اود ءَ مھلوک ءِ تکانسری سر ءَ گندگ ءَ نیایگ ءَ اَنت ادے مردم تن ءَ تلوسگ ءَ اَنت سرکار نیشتگ دیمروئی ءِ گپ ءَ ڈنڈورینگ ءَ اِنت –
آیاں گُشتگ سرکار پہ زانت تھ آپی ءِ جاوراں ودی کنگ ءَ اِنت دانکہ دمگی مردم اے جاھاں لڈ ءُ بار کنگ ءَ لاچار بہ بنت ءُ اد ءُ درملکی مردم آرگ بہ بنت گوادر ءَ ھمک روچ شھری تھ آپی ءِ سبب ءُ زھرشانی کنگ ءَ اَنت بلے اے ناگیگیں جاورانی زبانی گپ ءَ ابید دگہ ھچ پیمیں گپ بیگ ءَ اِنت-
زھرشانی کنوکاں گوشتگ دیمروئی ءِ ڈنڈورینگ ءَ اے زھگ تن ءَ تلوسگ ءَ اَنگ گوادر ءَ آپ ءُ دگہ بنکی آسراتیانی نہ بوگ ءَ زھرشانی ھمک روچ بیگ ءَ اِنت واکدار بس گپ جن اَنت ءُ رو اَنت-
زانگ بہ بیت گوادر ءَ ھوار ھواریں دمگاں تھ آپی ءُ دگہ جیڑھانی سر ءَ یکشل ءَ زھرشانی بیگ ءَ اَنت بلے سرکار ءِ واکدار تنی وھدی آپ ءُ دگہ جیڑھانی گیشنگ ءَ بے سوب بیتگ اَنت-