شال ءَ وی بی ایم پی ءِ زھرشانی بنجل برجاہ

بلوچستان ءِ بنجاھی شھر شال ءَ.پریس کلب ءِ دیم ءَ بیگواھیں مردمانی ھاتر ءَ برجاھیں وائس فار بلوچ مسنگ پرسنز ءِ بنجل ءَ چار ھزار ءُ شش سد ءُ ھشتاد ءُ دو روچ سرجم بوتگ انت – مروچی بی ایس او پجار شال ھنکین ءِ باسک آفرین شاہوانی ءُ آئی ءِ گھار ، چہ ماشکیل ءَ بی این پی ءِ باسک عبدالصبیر ریکی، الہی بخش محمد حسنی ءُ دگہ مردین ءُ جنیناں بنجل ءَ اتکگ ءُ بیگواھیں مردمانی کھول ءِ گون ءَ دلپدردی درشان اتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچ سرڈگار ءُ اے شاھگانیں جھدے ھاترا بلوچستان ءِ ھزاراں شھیداں یک مکسدے ءُ کاز ءِ ھاتر ءَ وتی جانانی دیمھونی داتگ – آھاں ھمے امیت ءُ واھشت ءَ گوں وتی زند ندر کتگ کہ آھانی مرگ آھانی واھشتاں سرجم کنت – آوکیں پدریچ آھانی دیمھونی چارگی انت ءُ ھماھانی پدرنداں رؤگی انت آھانی کار دیما برگی انت –

آئی ءَ گوشتگ کہ مروچی ھم ھزارانی کچ ءَ بلوچ زنداناں بندیگ انت کس نزانت کہ کجا انت؟ چون انت آھانی مات ازابی زند گوازینگ ءَ انت اے اندازگ ھما ماتاں بیت کہ آھانی زھگاں بازیں سالے بیت کہ بیگواہ انت –

آئی ءَ گوشتگ کہ یک دلارے یا ریاستی کارمند بس لھتے زرانی ھاترا گِس ءِ ویران کن انت کہ آھانی زمیر مرتگ – وھدیکہ ما یک دلارے ءِ سرا چمشانک بہ دے گڈا مارا سرپدی رسیت کہ اے ھرابی انسان ءِ جنگ ءَ چہ آشنا بوھگ ءَ پد پدر بیت –