بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ شش سد ءُ ھشتاد ءُ یک روچ سرجم بوتگ – مروچی ایڈوکیٹ خالدہ بلوچ، نیشنل ڈیموکریٹک پاٹی ءِ عبدالغنی بلوچ، آغا نعمت ءُ دگہ مردماں بیگواھیں مردمانی کھولانی گون ءَ دلپدردی درشان اتگ –
ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچستان ءَ سیاسی باسک ءُ راجی جھد ءَ ھواریں مردمانی زورانسری آوار جنی ءِ درچ یکشل ءَ برجاہ انت – ریاست تاکت ءِ زور ءَ مردمانی دپ ءَ بند کنگ لوٹ ایت –
آئی ءَ گوشتگ کہ مروچی سرجمیں بلوچستان ءَ بیگواھیں مردمانی جیڑہ نگیگ بوتگ انت بیگواھیں مردمانی کھول دیما بیا انت توار چست بہ کن انت تانکہ ما ھوار بہ بئیں ءُ وتی مردمانی زند ءَ بہ رکین ایں –