راشد حسین ءِ پاکستان دست دیگ ءَ سَے سال سرجم، شال ءَ زھرشانی

بیگواھیں بلوچ باسک راشد حسین ءِ پاکستان دست ءَ دیگ ءُ زورانسری آوار سَے سال سرجم بوگ ءَ شال ءَ زھرشانی کنگ بوتگ – زھرشانی ءَ نودربرگلانی باسک ءُ ساسی باسکاں ھوار بیگواھیں مردمانی کھولاں بھر زرتگ –

زھرشانی کنوکانی دست ءَ پلے کارڈ ءُ بینرز بوتگ انت کہ آھانی سرا راشد حسین ءُ دگہ بیگواھیں مردمانی یل کنگے لوٹ نبشتہ بوتگ انت –

راشد حسین بیست ءُ شش دسمبر دوھزار ھژدہ متحدہ ارب امارات ءَ ھمودے چیریں ادارھاں دزگیر کتگ ناشناسیں جاہ ءَ برتگ کہ پدا رند ءَ بیست ءُ دو جون دوھزار نوزدہ ءَ بلوچ باسک پاکستان ءَ آرگ بوتگ – راشد حسین ءِ کھول ءِ رِد ءَ راشد پاکستان ءِ واکدارانی گوشگ ءِ پد ءَ امارات ءَ گیرکانودی پاکستان ءَ دیم داتگ – وھدیکہ راشد حسین ءِ جان ءَ پاکستان ءِ تہ ءَ ھترہ بوتگ کہ در پہ دری زند گوازینگ ءَ بوتگ –

زانگ بہ بیت راشد حسین ءِ پاکستان آرگے راستی کاؤنٹر ٹیررزم ڈپارٹمنٹ سی ٹی ڈی کراچی ءِ انچارج عبداللہ شیخ ءَ یک ٹی وی رسانکدر ءَ داتگ – آئی گوشتگ کہ راشد حسین انٹر پول ءِ زریہ ءَ پاکستان ءَ آرگ بوتگ –

زھرشانی ءَ تران کنان ءَ راشد حسین ءِ مات ءِ گوشگ ات کہ متحدہ ءِ عرب امارات ءَ زورانسری آوار جنی ءَ پد منی زھگ دیما آرگ نہ بوتگ – راشد حسین ءِ مات ءِ رِد ءَ آئی ءَ بلوچستان ءَ بؤکیں زوراکیانی سرا گپ جنگے سوب ءَ آوار جنگ بوتگ – آئی ءَ گوشتگ کہ اگاں منی زھگے سرا الزام ءِ ھست آمیدگس ءَ آرگ بہ بیت –

راشد حسین ءِ مات ءَ دیمتر ءَ گوشتگ کہ زھگے یل کنگے ھاترءَ کمیشنز ءُ آمیدگساں کیس ھم فائل کتگ بلے ھچ وڈیں امیت نیست – سردار اختر ءُ مریم نواز ھردے کہ اپوزیشن ءَ بوتگ انت گڈا گوں من کول ءِ کتگ زھگ ءَ یل کنائین ایں وھدیکہ نوں آھانی سرکار انت بلے بیگواھیں مردمانی درگت ءَ گپ ءِ ھم نگوش انت – راشد حسین ءِ مات ءَ سرکار ءُ دمگی نمائندگاں لوٹ کتگ منی زھگ آمیدگس ءَ آرگ بہ بیت ءُ آئی ءَ ھک دیگ کمک کنگ بہ بیت –

زھرشانی ءَ تران کنان ءَ مستونگ ءِ جھمنند بیگواھیں سعید احمد ءِ مات ءَ گوشتگ کہ منی زھگ ھنگت دیما آرگ نہ بوتگ ـ زھگے بیگواھی ءَ زند ازاب ءِ تہ ءَ گوزگ انت بلوچستان ءِ نمائندگ وتی کتگیں کول ءَ سرجم بہ کن انت ءُ مئے دوستیگیں مردماں یل بہ کنائیناں –

زھرشانی ءَ تران کنان ءَ وائس فاربلوچ مسنگ پرسنز ءِ سرکماش نصراللہ بلوچ ءَ گوشتگ کہ بلوچستان ءِ تہ ءَ زورانسری آوار جنیانی تہ ءَ گیشی اتکگ مردمانی یل کنگے بدل ءَ زورانسری آوار جنگ بوگ ءَ انت وھدیکہ مزن وزیر ادا اتکگ گوشتگے کہ تاکتورانی گوم ءَ بیگواھیں مردمانی یل کنائینگ ءَ گپ جن ایں ـ ما نزانیں ملک مزن وزیر تاکتور کئیں –

نصراللہ بلوچ ءَ گوشتگ کہ بیگواھیں مردمانی کھول ھمک روچ وتی زھرشانیاں نبشتہ کنائینگ انت تانکہ ھمے تبک ءَ آھانی توار سر بہ بیت بلے ادا ھمے کھولانی داد رسی کنوک ھم نیست –

زھرشانی کنوکاں بلوچستان ءَ بیگواھیں مردمانی یل کنگے لوٹ کتگ وتی زھرشانی ھلاس کتگ گوشتگ اگاں بلوچستان ءَ زورانسری اوار جنیانی درچ دارگ نہ بوت گڈا زھرشانیانی درچ ترندی ءَ گوں برجاہ داریں –