مروچی دوشمبے ءِ روچ ءَ کراچی پریس کلب ءَ انسانی ھک ءُ سوسائیٹی ءَ سیادی داروکیں زالبول شیما کرمانی، عظمی نورانی، مھناز رحمان سارہ زمان، ساجدہ بلوچ ءُ نغمہ شیخ ءَ اھوالکاراں گوں تران کنان ءَ ھمے سال ءِ دوازدہ جون ءَ کراچی ءَ سند اسمبلی ءِ دیم ءَ سند پولیس ءَ بیگواھیں مردمانی کھولانی سر ءَ لٹ شاپی ایرجتگ ءُ گوشتگ کہ شھید بے نظیر بھٹو ءَ مدامی زالبولانی ھک ءِ گپ جتگ بلے مروچی پیپلز پاٹی ءِ سرکار ءِ زالبولانی سر ءَ لٹ شاپی بے نظیر ءِ سیاسی نزریہ در انت –
آئی ءَ گوشتگ کہ زھرشانی کنگ ھر شھری ءِ جمھوری ھک انت پولیس ءِ نیمگ ءَ زوراکی بنکی جمھوری ھکانی دیم ءَ اڑاندے – رھشوناں پولیس ءِ زوراکی ایرجتگ ءُ گوشتگ ما ھمے پھم ایں بس انکوائری کمیٹی ءِ برجم کنگ ءَ سندھ ءِ سر وزیر سید مراد علی شاہ چہ وتی زمہ داریاں ءَ سرجم نہ بیت –
آھانی گوشگ ات کہ سندھ ءِ تہ ءَ بلوچ زالبولانی سر ءَ زوراکی کنگ چہ جمھوری رویش ءَ در انت ھر شھری ءَ زھرشانی کنگ ءِ ھک ھست انت ءُ اے آھانی کانودی ءُ آئینی ھک انت –
آھانی گوشگ ات کہ بیگواھیں مردمانی جیڑہ سنگین بوان انت – اے چہ کانود ءَ در انت ءُ کانود جوڑ کنوکیں ادارہ گیرکانودی کنگ ءَ انت – آھاں لوٹ کتگ کہ کراچی ءَ زورانسری آوار جنگ بوتگیں مردم یل کنگ بہ بنت –