راشد حسین بلوچ ءِ زورانسری آوار جنی ءِ بگیری ءَ باند ءَ زھرشانی کنگ بیت – ماما قدیر بلوچ

شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ چار ھزار ءَ شش سد ءَ ھپتاد ءُ ھشت روچ سرجم بوتگ انت – زھرشانی بنجل ءَ مروچی وی بی ایم پی ءِ کمک سرکماش ماما قدیر بلوچ ءِ ھمراھی ءَ زورانسری آوار جنگ بوتگیں راشد حسین بلوچ ءِ مات ءُ مستونگ ءَ آوار جنگ بوتگیں لیویز کارمند سعید احمد ءِ ھم ساڑی بوتگ انت –

ھمے وھد ءَ ماما قدیر بلوچ ءَ گوشتگ کہ راشد حسین بلوچ متحدہ عرب امارات ءَ درکانودی دزگیر کتگ ءُ پاکستان ءِ ھوالگ ءَ داتگ – آئی ءِ بیگواھی ءِ روچ ءَ بگر تاں روچ مروچی آئی ءِ مات زھرشانی کنگ ءَ انت اے مردمانی بس یک لوٹ یے کہ اگاں راشد کتکار انت گڈا آمیدگس ءَ آرگ بہ بیت –

ماما ءَ گوشتگ کہ راشد حسین ءِ زورانسری آوار جنی ءِ بگیری ءَ باندا بزاں بیست ءُ یک جون ءَ شال ءِ پریس کلب ءِ دیم ءَ زھرشانی روانک ءِ کشگ بیت ما چہ درسیں تبک ءِ پگرے منوگراں دستبندی کنیں کہ آ اے زھرشانی ءَ بھر بہ زور انت –

مروچی زھرشانی بنجل ءَ نال گریشہ ءَ بی این پی مینگل ءِ باسک بیان ساجدی، سراج ساجدی، ناصر بلوچ ءُ دگہ مردماں اتکگ ءُ دلپدردی درشان اتگ –

وی بی ایم پی ءِ سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ ریاست ءَ بلوچستان ءِ تہ ءَ وتی ناشرکاریانی تہ ءَ گیشی آرتگ، ھزادار، مشکے اواران، نال، گریشہ پنجگور ءَ ھوار بازیں دمگاں پوج گوں وتی داشتگیں دلارانی ھمراھی ءَ لشکر کشی کنگ ءُ مردمانی آوار جنی ءِ درچ برجاہ انت، کراچی ءَ ھم یک دو ماہ انت کہ بلوچ ورنایانی زورانسری آوارجنی ءِ تہ ءَ گیشی اتکگ –

آئی ءَ گوشتگ کہ شال زرغون ولی تنگی ءُ نزیکیں دمگاں لشکر کشی برجاہ انت کہ تنی وھدی پوج ءِ انگیر انت وھدیکہ دو کسانیں پشتون زھگ ھم زورانسری آوار جنگ ءُ بیگواہ کنگ بوتگ انت –

آئی ءَ گوشتگ کہ پاکستان ءِ ریاست میاں استمانی انسانی ھکانی کانوداں لگتمال کنگ انت بلے جست پد کنوک نیست – انسانی ھکانی گلانی گپ ءُ درشان بس کاگدی جوڈ بوتگ انت، انسانی ھکانی درگت ءَ بلوچستان بلیک ھول جوڈ بوگ انت، استمانی ءُ میاں استمانی رسانکدر بلیک آؤٹ انت درساں وتی چم بستگ انت –

آئی ءَ گوشتگ کہ گوستگیں سال ءَ سِی مارچ ءَ چہ سوراب ءَ دو برات آصف ریکی ءُ الہ دین ریکی روچ رھمانی ایف سی ءُ ایجنسی کارمنداں آوار جتگ ءُ بیگواہ کتگ انت کہ روچ مروچی بیگواہ انت آھانی ھچ ھال اھوال نیست –

انسانی ھکانی ادارھانی نیمگ ءَ گامگیج زورگے جار ءِ پد ھم ناکہ انسانی ھکانی لگتمالی ءَ کمی اتکگ ناکہ اشی ءِ سرا گامگیج زورگ بوتگ –