کراچی ءَ زورانسری آوارجنیانی درچ یکشل ءَ برجاہ، کھولانی زھرشانی

کراچی ءَ بلوچ ورنایانی زورانسری آوارجنی ءِ درچ ھنگت ھلاس نہ بوتگ – بازیں دمگاں چی بازیں ورنایانی زورانسری آوارجنی درچ یکشل ءَ برجاہ انت – وھدیکہ دومی نیمگ ءَ بیگواھین مردمانی کھول یکرندے پدا دگانی سرا در اتکگ ءُ زھرشانی انت – زھرشانی کنوکیں بیگواھیں مردمانی کھولاں بلوچ یکجھتی کمیٹی کراچی ءِ کمک گون انت –

مروچی یکشمبے ءِ روچ ءَ بیگواھیں مردمانی کھولاں بلوچ یکجھتی کمیٹی آرگنائزر آمنہ بلوچ ءِ سرکماشی ءَ کراچی پریس کلب ءِ دیم ءَ زھرشانی کتگ کہ.مزنیں کچ ءَ چُک زالبولاں ھم بھر زرتگ، سند ءِ سرکار ءُ پوج ءِ بگیری ءَ ترندیں نارہ جتگ ءُ بیگواھیں مردمانی یل کنگے لوٹ کتگ –

ھمے وھد ءَ بلوچ یکجھتی کمیٹی کراچی ءِ آرگنائزر آمنہ بلوچ ءَ تران کنان ءَ گوشتگ کہ کرچی ءِ دمگ سنگھور پاڑہ ماری پور ءَ سَے ورنا چیریں ادارھانی کارمنداً آوار جتگ ءُ بیگواہ کتگ انت کہ آھانی تہ ءَ علی ء بخشی، اسرار ء انور عمر ءُ نواز علی ء ناصر ھوار انت ھمے وڈ ماری پور ءِ دمگ دلفلاح آباد ءَ محمد عمران ء محمد حنیف ھم بیگواہ کنگ بوتگ ءُ کراچی ءِ دمگ ملیر ءَ سعید احمد ء محمد عمر سی ٹی ڈی ءُ پھازگی لشکر ءَ چہ گس ءَ آوار جتگ – سعید کیچ ء دمگ دشت کڈان ءِ نندوک انت –

آئی ءَ گوشتگ کہ نوربخش ء حبیب کراچی ءِ دمگ رئیس گوٹ ءَ چست کنگ بوتگ – نوربخش مکران ءِ نندوک انت –

آمنہ بلوچ ءَ گوشتگ کہ سند ءِ تہ ءَ مئے بازیں ورنا ءُ کماشے پھازگی لشکر ءِ زنداناں بندیگ انت – ھمک روچ کراچی ءِ جتا جتائیں دمگاں بیڑ برگ بیت، چک زالبول کم شرپ کنگ بنت آھانی دیم ءَ آھانی چک ءُ براتاں آوار جن انت ءُ بیگواہ کن انت –

آمنہ بلوچ ءَ کراچی ءَ نندوکیں بلوچانی نشانگ کنگ ایرجتگ گوشتگ کہ آھاں ھر یک بلوچ ءِ ناشرکار گندگ ءَ کئیت – آئی انسانی ھکانی گلاں لوٹ کتگ گوشتگ کہ کراچی ءَ بیگناھیں ورناھانی آوار جنی ءَ گامگیج زورگ بہ بیت –

بلوچ یکجھتی کمیٹی ءِ ڈپٹی آرگنائزر وہاب بلوچ ءَ سند سرکار ءُ وفاقی پھازگی ادارھانی سرکماشی کنوک ایرجتگ ءُ گوشتگ کہ سند سرکار وتی کبلہ ءَ راست بہ کنت ءُ لوٹ کتگ کہ سروزیر سید مراد علی شاہ ءُ وفاقی وزیر خارجہ بلاول بھٹو سند ءِ تہ ءَ آوار جنگ بوتگیں بلوچ ورنایانی یل کنگ ءَ وتی کرد ءَ پیلو بہ کن انت اگاں ناں گڈا مئے کانودی ءُ رھبندی ھک بیت کہ سند اسمبلی ءُ سروزیر کارگس ءِ دیم ءَ زھرشانی بہ کن ایں –

وھاب بلوچ ءَ وفاقی سرکار ءَ ھواریں بلوچستان ءَ سیادی داروکیں سیاسی پاٹیانی رھشونانی رویش ءِ سر ءَ وتی درشان داتگ کہ آھاں اقتدار دوست انت – ھمے وھد ءَ بیگواھیں اصرار ءِ کماش انور عمر، سعید بلوچ ءِ برات ولید رند، بیگواھیں عمران ءِ مات میراں ناکی لیاری ءَ آوار جنگ بوتگیں شوکت ءِ مات، بیگواھیں حمید زھری ءِ زھگ سعیدہ حمید، سیاسی ءُ چاگردی رھشون کوثر بلوچ، ڈاکٹر فقیر محمد سنگھور ءُ دگراں ھم تران کتگ –