بلوچستان ءِ دمگ ڈیرہ بگٹی ءِ میتگ سوئی ءَ ٹیل ءُ گیس ءِسرکاری کمپنی پی پی ایل ءِ ھلاپ ءَ بلوچ بے روزگاریں انجینئر، ڈِپلومہ اسوسیئیٹ انجینئر، نِشگتیں ءُ بیران بیتگیں مردمانی کھول زھرشانی کنگ ءَ اَنت ءُ گیٹ لمبر 4 ءَ زھرشانی ءِ نِندانک برجاہ اِنت۔
زھرشانی کنوکیں مردماں دمگ ءِ واھکدار ءُ پی پی ایل ءِ مینجر ءُ ایم ڈی ءَ لوٹ کُرتگ کہ کمپنی ءُ بلوچستان سرکار ءِ میان ءَ منّگ نامہ ءِ رِد ءَ ڈیرہ بگٹی ءِ بے روزگاریں بلوچ انجینئر ءُ ڈِپلومہ اسوسیئیٹ انجینئراں روزگار بہ دنت ءُ پد ءَ وتی کْوھنیں پوریاگِر ءُ باسکانی نِشگتین ءُ بیران بیتگینانی زھگاں روزگار بدنت۔
زھرشانی کنوکیں مردماں دگانی سر ءَ ٹائر مانداشتگ ءُ پہ موٹلانی روگ ءَ دگ بند کُتگ اَنت۔ ماں زھرشانی ءَ بلوچاں لوٹ کُتگ کہ داں وھدے مئے لوٹ منّگ نہ بنت مئے زھرشانی ھر روچ تْرُند ءُ برجاہ بیت انت۔
زھرشانی کنوکاں پی پی ایل چہ ڈیرہ بگٹی ءِ دمگ سوئی گیس ءَ چہ 1952 ءَ گیس ءَ ودی کنگ ءَ اِنت ءُ ھمے گیس سرجمیں پاکستان ءُکشمیر ءِ چُلاں روک کنت بلے بلوچ راج ءِ دمگ ءُ شھر چہ وتی ھُدائی مڈیاں زبھر اَنت-
آیاں گوشتگ پی پی ایل ءَ ابید او جی ڈی سی ایل ھم چہ ڈیرہ بگٹی ءِ میتگ پیرکوہ، لوٹی، زین ءُ اوچ ءَ گیس ودی کنگ ءَ انت بلے دمگی بلوچ وانندہ چہ روزگار ءُ پوریاگِریاں زبھر اَنت۔
زھرشانی ءَ ھواریں مردماں گوشتگ ھمے ٹیل ءُ گیس کمپنانی بلوچ دُژمنی شونداتانی آسر ءَ چہ بُنگیج ءَ ڈیرہ بگٹی ءَ پاکستانی پوج ءَ لشکرکشی بندات کُت ءُ پد ءَ ھمے جنگ سرجمیں بلوچستان ءَ شِنگ بیتگ ءُ راجی آجوئی ءِ گھگیری ءَ بدل بوتگ۔ ھمے جیڑھانی تہ ءَ 2001 ءَ سندھی لیڈی ڈاکٹر شازیہ مھر ءِ ویل نامدار بوتگ کہ بلوچ راجی میارجلی ءِ بلاھیں اندوھے اَت۔