نبشتانک: شررنگ تو بے وپا بوت ئے
نبشتہ کار: کادر ھسرت
دی بلوچستان پوسٹ
مرچی تئی جتائی ءَ دو سال سرجم بوت، بَلے روچ ءِ مرچی تئی کاگدے ءُ کلوھے پہ من نیاتکگ ءُ نیکہ تو کاسدے نپر کتگ چُش من سرپد آں کہ تو اچ من وتی دل کُشتگ ءُ چہ اے اِشک ءِ ستکگیں بچک ءَ بے ھیال ئے ءُ اے ابدال ءِ پگر ءُ گمان ءَ نہ ئے منی نابزانتیں دل ءَ کے سرپد کنت کہ تئی مھروانیں شررنگ ءَ ترا چہ وتی دل ءَ کش اِتگ ءُ دُور یک گیابانے ءَ چگل داتگ تئی اِشک ءَ من ءَ انچیں جاگھے ءَ آؤرتگ ءُ سر کتگ کہ اے کشک ءَ واتر بوگ سک گران اِنت ترا باریں باور کنت یا کہ نہ کنت گِند ئے انچوش پہ لیلا ءَ مجنوں ءَ لیلا لیلا کتگ من ھم ھمے رنگ ءَ شررنگ شررنگ کن آں تئی مھر ءِ سبب ءَ میتگ ءِ مردم من ءَ اِشکی گنوک گْوش اَنت تئی ھما داتگیں اکس ءُ دزمال پہ نشانی منی پُرشتگیں پیتی ءِ تہ ءَ ایر اَنت چہ ساہ ءَ گیش دوست داشتگ اَنت، ھردینکہ تو گیر کا ئے چار آن اِش ءُ دل ءَ تسلہ دے آں من شئے مرید بوتگ آں ترا ھانی لیکھ اتگ چُش نہ زانتگ کہ ترا پہ اے شئے مرید ءَ مھر دل ءَ نیست اِنت۔
شررنگ ترا گوں من ھجبر مھر نہ بوتگ اے منی گنوکی ءُ دل ءِ نادانی بوتگ گون تو مھر کتگ شپانی پاساں وپتگیں واب ءَ بُست کتگ پہ تو گریتگ ءُ ترا یات کتگ، من تئی دزگْوھار ءُ دانکہ وتی سنگتانی کِر ءَ ھم ترا گلاتگ کہ شررنگ مھروانے من ءَ مھر دنت وتی ساہ ءَ پہ من بار کنت، من ءَ اگاں یک روچے مہ گند ایت دل ءَ جیڑ ایت پشومان بیت، من دانکہ اے گپ ھم گْوشتگ ھردینکہ شررنگ منی دوستیگیں دوچ (وپتگیں بانور) ھمے گُداں گْور ءَ کنت سک ڈولدار بیت منی چماں جھان ءَ یک نوکیں رنگے ودی بوتگ ، من رَد بوتگ آں ترا مُپت ءَ گلاتگ، من تئی توسیپ ھما سنگتانی کر ءَ کتگ تئی بے مھری ءَ پد ءَ من ایشانی دیوان ءَ نشت نہ کن آں سھب ءِ سر ءَ پہ تَرگ ءَ چہ لوگ ءَ درکا آں تئی مکتب ءِ ھم رِد (ہم جماعت) چہ مکتب ءَ لوگ ءَ پیداک بنت من آیانی دیم ءَ نہ کپ آں سر ءَ جھل کن آں من آیانی دیم ءَ ملامت آں آ مدام من ءَ گند اَنت بھتام جن اَنت ءُ ٹوک دے اَنت کج اِنت تئی شررنگ ءُ کجا شت گوں وتی مھراں تو آئی ءَ را مدام گلاتگ، من آیانی گپاں دل ءَ نہ کن آں چی ءَ کہ اے منی جند ءِ رَدی بوتگ کہ منی وڑیں نابزانتیں بچکے ءَ را تئی وڑیں جنکے ءَ گوں مھر بوتگ-
ترا بلکیں یات بیت زمستان ءِ سارتیں شپاں تو منی دیدار ءٙ آتکگ ئے من تئی دست چُک اِتگ اٙنت دانکہ دیراں نشتگ ایں دیوان کتگ من مسکرائی گپے جتگ تو ٹھک ٹھک ءَ کند اِتگ من سک گَل بیتگ آں ترا ٹھک دیگ ءَ دیستگ تو پد ءَ ھمے وادہ کتگ کہ ھرچ وڑیں سکی بئیت اِنت تئی شررنگ چہ تو جتا نہ بیت دائم ءَ ھمے وڑ ءَ مھروان بیت ءُ ترا مھر دنت بَلے بژن ءِ گپ اِنت تئی گْوشتگیں دراھیں گپ دروگ بوت اَنت تو وت ءَ اچ من دُور ءُ گستا کتگ من انگت وتی کولانی سر ءٙ اوشتاتگ آں کہ بلکیں روچے ناں روچے تئی دل موم بیت تو دوبر پہ من مھروانے بہ ئے ءُ مھر دئے-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔