بلوچ راجی زْرمبشت ( بی این ایم ) ءِ بنجاھی جارکش ءَ وتی شنگ کرتگیں درشانی ءَ گوشتگ 26 جون ’’زوراکی ءُ نشہ ءِ گِر ءُ دار ءِ جھانی روچ” ءِ درگت ءَ میان استمانی تک ءَ زھرشانی ءُ مراگش برجم دارگ ءِ جار جتگ ءُ گوشتگ کہ پاکستانی ریاست ءَ بلوچستان پہ مردماں زندانے جوڑ کرتگ۔ اد ءَ بلوچ ورنایانی پجیگ ءَ جنین، زھگ ءُ کماش کس پھریز نہ اِنت۔
جارکش ءَ گوشتگ بلوچستان ءَ مردم زورانسری بیگواھی ءِ نشانگ کنگ ءُ زنداناں بند کنگ بیگ ءَ اَنت۔اد ءَمردم درمردمی آزاردیگ بیگ ءَ اَنت۔ آزار دھی ھچ وڑ ءَ منگ نہ بیت ءُ اے کار ھم سنتیں راج ءُ آدگہ ادارھاں رد لیک اِتگ۔ پمیشکا ھم سنتیں راج ءَ آزار ءِ بگیری پتر Committee Against Torture (CAT) نامیں ادارھے جوڑ کرتگ کہ آ اے بارہ ءَ پٹ ءُ پول بہ کنت۔پہ زوراکی ءِ گِر ءُ دار ءَ 26جون زوراکی ءِ میان استمانی روچ ءِ بستار ءَ دارگ بیت دانکہ مردماں ھمے کلوہ دیگ بہ بیت کہ زوراکی درمردمی ءُ رستری کارے ایشی ءِ گِر ءُ دار کنگ ءَ ھر کج ءَ توار چست کنگ ھژدری اِنت۔
جارکش ءَ گْوشتگ کہ 26 جون جھانی تک ءَ پہ نشہ ءِ گِر ءُ دار کنگ ءَ دارگ بیت۔ نشہ زھرے کہ مردم چہ اندر ءَ تباہ کنت۔ آئی ءِ جیڑگ ءُ سرپدی ءِ بودشت ءَ ھلاس کنت۔ بلوچستان ءَ نشہ بھا کنوکاں پاکستانی ریاست ءِ کمک گون اِنت۔ آئی ءِ مول ورنایانی نشہ آماچ کنگ ءُ جیڑگ ءِ بودشت ءِ ھلاس کنگ اِنت کہ چاگرد نابود بہ بیت ءُ اد ءَ سیاست ، وانگ ءُ دگہ سیتمندیں سرگرمی ھلاس بہ بہ اَنت۔
جارکش ءَ دیمتر ءَ گْوشتگ کہ 26 جون آزار ءِ آماچ بیتگیں مردمانی دیم ءَ آرگ، آیاں اگبال دیگ ءُ مردمانی آزاردھی ءِ گِر ءُ دار کنگ ءَ چاگرد ءِ سرپد کنگ ءِ روچ اِنت۔ جھانی راھبندانی رد ءَ آزاردھی ناراہ ءُ درمردمی گامگیجے کہ ھچ وڑ ءَ راست ءُ روا گْوشگ نہ بیت۔ بلوچستان ءَ ریاست ءِ چیریں ادارہ مچی سزا ءِ رد ءَ مردماں زورانسری بیگواہ کنگ، پہ شک ءَ میارباری ءَ لاچار کنگ ءُ ناراھی آزار دیگ ءَ اَنت۔ آزار دیوکیں مردم ھرچ وڑیں درمردمی آزار دئے اَنت۔ اے میارباری یے ءِ میارباراں دگہ جُست کنوک نیست۔ ھمے سوب ءَ آ مردماں بے تُرس ءَ زوراکی ءِ نشانگ کنگ ءُ ژانگولیں جوناں دور دیگ ءَ اَنت۔
جارکش ءَ وتی درشان ءِ گُڈی ءَ تیوگیں ھنکین پرمان داتگ اَنت ءُ گوشتگ کہ آ بیست ءُ شش جون ءَ زوراکی ءُ نشہ ءِ گِر ءُ دار کنگ ءِ میان استمانی روچ ءِ درگت ءَ میان استمان ءَ زھرشانی بہ کن اَنت دانکہ جھان ءَ بلوچستان ءِ جاورھالاں سرپد بہ کن اَنت ءُ پاکستان ءِ راستیں چھرگ ءَ دیم ءَ بیار اَنت۔ ھندی ھنکین دیوان برجم بدار اَنت ءُ گوں زوراکی ءِ آماچ بوتگیں مردماں ھمدردی درشان بہ کن اَنت ءُ آیانی دیم ءَ آرگ ءَ جوانیں کردے پیلو بہ کن اَنت۔