مارا وانگ ءِ یل کنگ ءِ ھاتر ءَ لاچار کنگ بوگ ءَ انت- بلوچ نودربر اسلام آباد

مروچی آدینگ ءِ روچ ءَ بلوچ اسٹوڈنس کونسل ءِ رھشوناں فیروز بلوچ ءِ یل نہ کنگے بگیری ءَ زھرشانی بنجل ءَ پریس کانفرنس ءَ اھوالکاراں گوں تران کنان ءَ گوشتگ کہ بلوچ نودربرانی پروفائلنگ ءُ زورانسری آوارجنیانی تہ ءَ گیشی آرگ پدردی یے، چریشی ءِ سوب ءَ بلوچ نودربر ترس ءُ بیم ءِ آماچ انت –

نودربرانی گوشگ ات کہ فیروز بلوچ ء نوربخش بارانی زرعی شھدربرجاہ رولپنڈی ءَ ایجوکیشن ءِ نودربرے – آ یانزدہ مئی ءِ بیگاھے ادار چار ءَ وتی کوٹی ءَ چہ دراتکگ ءُ ھمے گوشتگ کہ شھدربرجاہ ءِ کتاب جاہ ءَ روگ ایں کہ نیم راہ ءَ آوار جنگ ءُ بیگواہ کنگ بوتگ آئی ءِ آوار جنی ءَ ترندیں لپزاں گوں ایرجن ایں – بلوچ نودربرانی پروفائلنگ کنگ ءُ پدا آھاں زورانسری آوار جنگ مدامی ایں وڈا آھاں چہ زانشت ءَ دور دارگے ریاستی پندل درچ یے – یک نیمگے سرکاری ادارہ بلوچستان ءَ اسکالرشپ ءِ دیگے دروگیں کول کن انت ءُ دومی نیمگ ءَ ھمک روچ بلوچ نودربر ملک ءِ زانشجاھاں ترسینگ ءُ پدا زورانسری آوار جنگ ءُ بیگواہ کنگ بنت –

آھانی گوشگ ات کہ فیروز بلوچ ءِ زورانسری آوارجنی ءَ پد ما دومی روچ ءَ ارزی نبشتگ کنائینگ ءُ چار رند ءَ ایرڈ شھدربرجاہ ءِ تہ ءَ پیس واک ریکارڈ کنائینتگ ءُ وی سی کارگس ءِ دیم ءَ زگریں روچ ءِ سرا نندانک جتگ ءُ مئے دو سنگت بے ھوش ھم بوتگ انت بلے شھدربرجاہ ءِ واکدارانی نیمگ ءَ فیروز بلوچ ءِ یل کنگے ھاتر ءَ ھچ وڈیں گامگیج زورگ نہ بوتگ –

آھانی گوشگ ات کہ چیزے وھد بیت کہ بلوچ نودربر پندل ءِ رِد ءَ تارگٹ کنگ بوھگ ءَ انت کہ ھمک روچ بلوچ نودربرانی زورانسری آوارجنیانی تہ ءَ گیشی آھگ ءَ انت – یکے ءَ پد دومیگ ءَ آوارجنگے ریاستی پندل ءَ بلوچ نودربر بیزار انت اے گیرانسانی رویش ءَ بلوچ نودربرانی ھاتر ءَ نگیگیں جاور پیداک کتگ کہ بید وانگے یل کنگ ءَ دگہ ھچی راہ پش نہ کپتگ –

آھانی گوشگ ات کہ مروچیگیں پریس کانفرنس ءَ چی ما سرجمیں ملک ءِ ھاکم، امیدگس، ھاسکر شھدربرجاہ ءِ واکداراں سرپد کنگ لوٹیں کہ فیروز بلوچ زوت یل کنگ بہ بیت ءُ بلوچ نودربرانی پروفائلنگ ءُ آھانی ترسینگے گرءُدار ءِ ھاتر ءَ گامگیج زورگ بہ بیت اگاں ناں بلوچ نودربر لاچار بنت کہ شھدبرجاہ ءُ مری دگ ءَ تاں ھما وھد ءَ بند کن انت کہ مئے کانودی لوٹ منّگ بہ بنت –