آسراتی نہ دیگے بگیری ءَ لورلائی میڈیکل کالج ءِ نودربراں زھرشانی کتگ

لورلائی میڈیکل کالج ءِ جنک ءُ بچکیں نودربراں شھدربرجاہ ءَ آسراتی نہ دیگ ءُ دگہ جیڑھانی سوب ءَ مروچی لورلائی بازار ءَ ننداک جتگ ءُ دگ بند کرتگ –

زھرشانی کنوکانی گوشگ ات کہ پہ نودربراں ہاسٹل ءِ آسراتی نیست – اے آسراتیانی نہ بوھگے سوب ءَ دور ءَ چہ اتکگیں نودربر بازیں اڈوجنجالانی آماچ انت – باز رند ءَ شھدربرجاہ ءِ واکدار گوشگ بوتگ انت بلے واکدارانی نیمگ ءَ ھچ وڈیں گامگیج زورگ نہ بوتگ –

زھرشانی کنوکانی گوشگ ات کہ نودربرانی گوم ءَ کالج ءِ کارکنوکانی رویش شر نہ انت – اسکالر شپ دیگ نہ بیت، کالج ءِ بلڈنگ جیڑہ، آپ ءِ آرگ ءَ جنکیں نودربراں پہ آپ آرگ ءَ دور ءَ روگی ایں –

زھرشانی کنوکانی گوشگ ات کہ ما باز رند ءَ وتی بنکی آسراتیانی لوٹ کتگ بلے دیگ نہ بوتگ پمیشکہ لاچار بوتگ ءُ زھرشانی ءَ در اتکگیں – بلے واکداراں وت ءَ یکّر ءَ داشتگ ءُ ھچ گوشگ ءَ نہ انت – زھرشانی کنوکاں دیمتر ےَ گوشتگ کہ زوتاں زوت شھدربر جاہ ءَ ھاسٹل ءُ دگہ بنکی آسراتی دیگ بہ بنت –

زھرشانی کنوکاں لوٹ کتگ گوشتگ کہ واکدارانی نااھلی ءُ نودربرانی گوم ءَ بدسلوکی کنگے ھاتر ءَ لورلائی میڈیکل کالج ءِ پرنسپل در کنگ بہ بیت – مئے لوٹ اگاں منّگ نہ بوتاں گڈا ترندیں زھرشانی کنگ ءَ لاچار بہ ایں –