گوستگیں روچ ءَ سندھ اسمبلی ءِ دیم ءَ زورانسری بیگواھیں مردمانی ھاتر ءَ زھرشانی کنوکیں بلوچ زالبول ءُ زھگانی سر ءَ پولیس ءِ لٹ شاپی ءُ زوراکی کنگ ءَ پد، اے وھد ءَ بلوچ چاگردی رسانکدر کارمرز کنوکیں جھدکار، اھوالکار، ءُ چاگردی باسکانی نیمگ ءَ بلوچستان نیشنل پارٹی (مینگل) ءِ سروک سردار اختر مینگل ءِ سر ءَ ترندیں ایراد گرگ بیگ ءَ اَنت۔
یات بہ بیت اے وھد ءَ پاکستانی بنجاہ ءَ بلوچستان نیشنل پارٹی سرکار کنوکیں پاٹی ءِ ھواری اِنت ءُ بلوچ تکانی تہ ءَ ھمے گپ جیڑگ بیگ ءَ اِنت کہ بنجاھی سرکاری اے وھد ءَ بی این پی ءِ کمک ءَ گوں اوشتاتگ۔ اِشی ءَ پد ھم بیگواھیں مردمانی جیڑہ اوشتگ ءِ نام ءَ نہ زانت ءُ اے درستیں گپاں پد ھم بی این پی ھاموش ندارگ چارگ ءَ اِنت۔
بی این پی مینگل ءِ سروک اختر مینگل ءَ چاگردی رسانکدر ءِ تندجاہ ٹوئیٹر ءَ وتی یک کسانیں کلوھے ءِ تہ ءَ گُشتگ کہ ھما مردم کہ اے ٹاہ دیگ ءَ اَنت کہ من بیگواھیں مردمانی جیڑہ ءِ سر ءَ ھاموش آں ءُ پہ وتی سیاسی لوٹانی ھاتر ءَ اے جیڑہ ءَ کارمرز کنگ ءَ آں ، اے کندینگی گپ اَنت۔
آئی ءَ دیمتر ءَ گُشتگ کہ من آھانی پسوانی مانزمان نہ آں پرچہ کہ بازیں دوزواہ جُست کنگ ءَ اَنت، مزن وزیر ءَ را وھد دیگ بیتگ اگاں ھچ نہ بیت گُڑا اے درگت ءَ پیسلہ کنیں۔
نامئیں اھوالکار ءُ نبشتہ کار عزیز سنگھور ءَ ٹوئیٹر ءِ سر ءَ اختر مینگل ءِ ٹوئیٹ سر ءَ ابکھی درشان کنان ءَ کہ آئی ءَ (اختر مینگل) ءَ پسہ داتگ کہ 13 جون 2022 ءَ سند اسمبلی ءِ دیم ءَ بلوچ زالبولانی سر ءَ لَٹ ءُ کُٹ ءِ گمانی پولیس ایکشن ءِ درگت ءَ من 12 جون ءَ چہ سرپدی دیان کُتگ۔
آئی ءَ گُشتگ کہ اختر مینگل ءَ یک روچے پیسر گُشتگ کہ جاور نگیگ بیتگ اَنت۔ تو کراچی ءَ چہ بیگواھیں بلوچ مردمانی یل کنائنگ ءِ ھاتر ءَ پیپلز پارٹی ءِ سروک بلاول بھٹو ءُ سر وزیر سند سیدھ مراد علی شاہ ءَگوں گپ بہ کن ءُ آھانی یل کنائنگ ءَ باوری بہ کن۔ بلے تو ھچ نہ کُتگ ءُ اَے گام زیرگ بیتگ اَنت۔
عزیر سنگھور ءَ گیشتر گُشتگ کہ آئی ءَ 24 مئی 2022 ءَ کراچی ءَ پریس کلب ءِ دیم ءَ بلوچ زالبولانی سر ءَ زوراکی ءُ آھانی یل کنگ ءِ ھاتر ءَ اختر مینگل واٹسیپ سر ءَ رھوت کُتگ، بلے اختر مینگل ءَ من ءَ پسہ دیگ المی سرپد نہ بیتگ۔
بلوچ یکجھتی کمیٹی کراچی ءِ آرگنائزر ءُ بیگواھیں مردمانی یل کنگ ءِ ھاتر ءَ جھد ءِ سروکی کنوکیں رھشون آمنہ بلوچ ءَ اختر مینگل ءِ ٹوئیٹ ءِ پسہ ءَ نبشتہ کُتگ کہ “اختر صاحب! وھدے مئے نندانک سند اسمبلی ءِ دیم ءَ برجاہ بیتگ گُڑا ھمود ءَ ساڑی ایں عزیز سنگھور تر ءَ واٹس ایپ سر ءَ سند پولیس گمانی ایکشن درگت ءَ سرپدی دیگ ءَ بیتگ۔ اگاں تو پہ وھد بلاول بھٹو ءُ سروزیر سند ءَ گوں گپ بہ کتیں گُڑا اے جاور ودی نہ بیتگ اِت اَنت، نی اپسوز کنگ ءَ پائدگ نیست، سندھ پولیس ءَ مئے سر ءَ لَٹ ءُ کُٹ کُتگ، مئے بچ جتگ اَنت ءُ جِنِک انسپکٹر سجاد ءَ بدیں زاہ داتگ اَنت، نی تئی استعفی پہ بلوچاں بے پائدگ اِنت۔ داں ھما وھد ءَ مئے سرانی چادر پولیس ءِ دست ءَ مہ بیت شما ھاموش اِت۔ تھانہ ءَ ما وت وتی زمانت داتگ گُڑا مارا یل کنگ بیتگ۔ مئے یل کنائنگ ءَ بی این پی ءِ ھچ کرد نیست اِنت۔