بلوچستان ءِ جتاھیں دمگانی تہءَ پاکستانی لشکریاں یکشلی ءَ گوں زمینی ءُ آزمانی بیڑانی درچ برجاہ داشتگ کہ اِشانی سوبءَ لس مردماں جانی ءُ مالی تاوانانی دیمپانی کنگ کپگ ءَ اِنت۔
ھندی اھوالانی ردءَ بلوچستان ءِ بنجاھی شھر شال ءِ نزیکیں دمگ بولان ءُ ھرنائی ءَ پاکستانی پوج ءِ زمینی لشکریاں دیمروی کنان ءَ زردآلو ءُ تور ڈبر ءُ کش ءُ کرءَ لشکر کشی بندات کُتگ ءُ زمینی لشکراں اے وھدءَ سئے ھیلی کاپٹرانی ھم چہ بُرزءَ کمک گون اِنت۔
یک ھندی مردمے ءَ دی بلوچستان پوسٹ ءَ گوں گپ کنان ءَ گُشتگ کہ مروچی سھب ءَ مھلہ ھمے ھندانی تہءَ ترندیں تیر گواری ءُ شیلنگانی توار اِش کنگ بئیگ ءَ اَنت۔
وھدیکہ داں گُڈی اھوالانی سر بئیگ ءَ ھچ پئیمیں دزگیری ءُ جانی تاوانانی اھوال سر نہ بیتگ۔
زانگ بہ بیت پاکستان آرمی بلوچ سلاہ بندیں گلانی ھلاپ ءَ جنگ ءِ نیام گیشتریں وھداں بے میاریں سیاسی باسک، دھکان ءُ شپانکاں دزگیر کنگ ءَ پد اگں دروگیں میڑانی تہءَ نمیران کن اَنت اگں نہ گُڑءَ وتی بندیگ جاھانی تہءَ بند کن اَنت ءُ مزنیں وھد ءِ گوزگ ءَ پد آھانی ژانگولیں جوناں شھر ءُ میتگانی تہءَ دور دئینت۔
بلوچستان ءِ سیاسی گل ھاس آجوئی لوٹوکیں سیاسی گلانی نیمگ ءَ پاکستانی پوج ءُ آئی چیریں گلانی سرءَ انسانی ھقانی ترندیں لگتمالیانی بھتام جنگ بیت اِنت وھدیکہ پاکستان ءِ پوجی واکداراں بازیں جاھاں اے بھتام رد کُتگ اَنت۔
بلوچستان ءَ گوستگیں لھتیں ھپتگاں چہ بلوچ نودربرانی بیگواھی ءَ ھم ترندی اَتکگ ءُ ھمے زورانسری بیگواھیانی بگیری ءَ شال ءُ کراچی ءَ زھرشانی ھم کنگ بئیگ ءَ اِنت۔
دومی نیمگ ءَ گوستگیں روچ ءَ کراچی ءَ بیگواھیں مردمانی کھول ءِ سرءَ پاکستانی پولیس ءِ نیمگ ءَ لٹ کُٹ کنگ ءِ بگیر ءَ مروچی شال ءَ ھم یک زھرشانی ءِ کنگ بئیگ ءَ اِنت۔