سربوتگیں ھالانی رِد ءَ پنجگور ءِ دمگ گرمکان ءَ مچکدگ ءَ یک دْرچکے ءَ چہ درتکگیں لاشے دستکپتگ کہ آئی ءِ پجّار عابد ء محمد انور نام ءَ چہ بوتگ-
دمگی انتزامیہ ءَ لاش سول ھستپال ءَ برتگ- وئیل سوب وتکشی اِنت ءُ اے درگت ءَ پولیس ءِ گیشیں پٹ ءُ پول برجاہ ءَ اِنت-
زانگ بہ بیت بلوچستان ءَ وتکشی ءِ وئیل سک باز رپورٹ دیم ءَ کاینت کہ اود ءَ وتکشی کنوک گیشتر ورناھانی بیت-
دی بلوچستان پوسٹ مانیٹرنگ ڈیسک رِد ءَ ھمے سال ءَ بلوچستان ءِ جتائیں دمگاں ھپت ءَ گیش وتکشی ءِ وئیل رپورٹ بوتگ ءُ دُرستاں چہ گیش اے سال ءِ مارچ ءُ اپریل ماہ ءَ ھپت وتکشی ءِ ھال رسانکدر ءَ رستگ اَنت-
مارچ ءُ اپریل ءَ رپورٹ بوتگیں وئیل ءَ پسنی جیونی ءَ یک ورنایے رزاق ء عبدالخالق ءِ لاش ڈگارے ءَ دْرچکے ءَ درتکگّ وھدے کہ قلات ءَ پانزدہ سالی ئیں ورنایے ءَ کارچ سر ءَ وتی گُٹ بُر اِتگ ءُ وتکشی ءِ جُھد کتگ ئِے-
اپریل ماہ ءَ بارکھان ءَ بیروزگاری ءَ چہ تنگ اَتکگ ءُ فرید احمد ء سعید احمد ءَ وتی گُٹ ساد مان کتگ وتکشی کتگ دگہ یک وئیلے ضلع گوادر ءَ نیا آباد ءَ شمبے اسماعیل وارڈ ءَ بوتگ ءُ زالبول زانگ نہ بوتگیں جیڑھانی سوب ءَ وت ءَ تیر جتگ ءُ وتکشی کتگ اپریل ماہ ءَ ھُزدار ءَ چُک ءِ وتکشی ءِ سبب ءَ پت ءَ دل اوپار نہ کتگ وتکشی کتگ-
یک کچے ءِ رِد ءَ بلوچستان ءَ وتکشی وئیل سک باز دیم ءَ کاینت ءُ باز رسانکدر ءَ تہ ءَ کاینت – آیانی تہ ءَ گیشتر مردم بے روزگاری ءَ چہ تنگ کاینت ءُ وتکشی کن اَنت وھدے کہ یکجاھی ھساب ءَ اے وتکُشیانی کچ زانگ نہ بوتگ اَنت-
ھیومین رائٹس کمیشن آف پاکستان ءِ 2020 ءِ رپورٹ رِد ءَ آ سال ءَ 1،735 مردم اشانی تہ ءَ 1،086 مردین ءُ 649 زالبول ھوار اَنت کہ آیاں وتکشی کتگ- وھدے کہ کمیشن ءَ زالبولانی وتکشی ءِ سبب چہ کھول نیمگ ءَ بوتگ اَنت-