ٹی بی پی کارست
ایرنیسٹو چی گویرا
حکیم بلوچ
ٹی بی پی بلوچی
ایرنیسٹو گویرا چاردہ جون 1928 ءَ ایرنیسٹو گویرا لِنچ ءُ سیلیا ڈی لا سیرنا وائے للوسا ءِ لوگ ءَ روساریو، ارجینٹینا ءَ ودی بیتگ۔ آ وتی مات ءُ پِت ءِ پنچیں چکانی تہ ءَ مستریں زھگ بیتگ۔
ایرنیسٹو گویرا چہ کسانی ءَ بزگیں مھلوکانی سر ءَ بیوکیں زوراکیانی سر ءَ بے تاھیر بیتگ، پمیشکا آئی ءِ پِت ءَ آئی ءِ اے بے تاھیری ءَ را آئی ءِ رگانی تہ ءَ تچوکیں آئرش ھونانی سوب گُشتگ۔ در کسانی ایرنیسٹو گویرا ءَ لِفٹ ءِ سیاست ءُ لٹریچر وانگ ءِ موہ چہ آئی ءِ لوگ ءَ رس اتگ پرچا کہ آئی ءِ کھول چہ لِفٹ ءَ نزیک بیتگ۔ آئی ءِ کماش اسپینش سول جنگ ءَ ریپبلکنزانی مزنیں کمکارے بیتگ، مدام وتی گِس ءَ بازیں جنگول جاہ داتگ اَنت اِش۔
چی گویر ءَ ساہ (asthma) ءِ بیماری ءَ بیگ ءَ ابید ھم، آئی ءَ جوانیں دروشمے ءَ فٹبال، گولف، اوژناگ ءَ ابید سائیکل ھم تاتکگ ءُ رگبی یونین ءِ پلیر ءِ ھم بیتگ۔ ایرنیسٹو ءَ 1953 ءَ وتی ڈاکٹری ءِ وانگ ھلاس کُتگ، آئی ءِ گیشتریں وھداں وتی موکل لاتینی امریکہ ءِ ملکانی تر ءُ تابانی تہ ءَ گوازینتگ اَنت۔ ھمے تر ءُ تابانی تہ ءَ ایرنیسٹو ءَ مھلوکے بزگی آیانی زندمان دیستگ ءُ آئی ءِ تہ ءَ مدام آشوب ءِ آس ءِ بلگ ءَ بیتگ۔
ایرنیسٹو گویرا کہ جھان آئی ءَ مروچی ڈاکٹر چی گویرا ءِ نام ءَ زانتگ آئی ءَ وتی آشوبی زندمان ءِ بندات 1953 ءَ ھما وھد ءَ کُتگ وھدے کہ گواتیمالا ءَ جیکب اربینز یک چاگردی آشوب ءِ آرگ ءِ جھد ءَ بیت اِنت۔ بلے 1954 ءَ امریکی چیریں گل سی آئی اے ءِ کمک ءَ گوں جیکب اربینز ءَ پروش دیگ بیت۔ اے ھما وھد بیت کہ ایرنیسٹو نی چی ءِ پنام ءَ زانگ بیت، جیکب ءِ پروش ءِ تہ ءَ امریکہ ءِ کرد ءِ گندگ ءَ پد چی ھمے سرپد بیت کہ جھان ءَ کجا ھم لِفٹ دیمروئی بکنت امریکہ آئی ءَ پروش دیگ ءِ ھاتر ءَ کجام ھم سیمسراں رؤت۔ اے ھما سوب بنت کہ چی ءَ جیڑگ پرمائنت کہ سوشلزم ءِ وڑ ءُ پئیماں ءَ گوں جھانی آشوب ءِ آرگ بہ بیت۔
چی گویرا گواتیمالا ءَ یل کنگ ءَ پد دیم پہ میکسیکو ءَ رؤت کہ اود ءَ آئی پجاروکی گوں فیڈل کاسترو ءُ آئی ءِ برات راؤل کاسترو ءَ گوں بیت اِنت۔ فیڈل ءُ راؤل کاسترو چہ کیوبا ءَ تتکگ ءُ میکسیکو ءَ سیاسی باھوٹی بنت۔ فیڈل کاسترو ھمے وھداں جھد ءَ بیت کہ فلگینکیو باٹیسٹہ ءِ ڈکٹیٹرشپ ءَ چوں ھلاس بہ کنت۔ (فیڈل کاسترو ءِ درگت ءَ دیمترے کارستانی تہ ءَ گیشتر گپ بیت) ایرنیسٹو گویرا گوں فیدل کاسترو ءُ راؤل کاسترو ءَ آیانی ٹوئینٹی سکستھ آف جولائی موومنٹ ھوار بیت۔ کہ اِشی ءِ تہ ءَ سرجم ءَ 81 مردم بھر زیر اَنت ءُ کیوبا ءِ اورینٹے پر گینگ 02 دسمبر 1956 ءَ ایر کپ اَنت۔ آیانی سر بیگ ءَ ھور باٹیسٹہ ءِ پوج سرپد بیت ءُ کساس درستیں مردماں کُش اَنت پشت کپوکانی تہ ءَ ٹپی ئیں چی گویرا ھم ھوار بیت کہ سئیرا میسٹرا ءَ سر بنت۔ پد ءَ ھمے جاہ آھانی چیرجنگی ءِ مھکمیں بُنزہ جوڑ بیت۔ چہ ھمدا باٹیسٹہ ءِ پوجے سر ءَ اُرشانی تہ ءَ سوبمندی ءِ سوب ءَ مردمانی تہ ءَ باوری ودی بیت ءُ گوریلا جنگولاں گیشتر توپک ءُ مھلوک ءِ ھمراھداری رس اِیت۔
اے گپ ءِ زانگ ھم المی اِنت کہ چی گویرا بندات ءَ اے جنگ ءِ تہ ءَ یک ڈاکٹر ئے ءِ رد ءَ گون بیت کہ ٹپی آں چار ایت ءُ آیانی الاج ءَ کنت۔ بلے چُش کہ چی گویرا ءَ توپکانی سرپدی ھم بیتگ، چی گویرا باز زِیت فیڈل کاسترو ءِ نزیکیں مردماں چہ یکے بیت ءُ گُش اَنت کہ برے برے چی گویرا ءَ وت ھم جنگ ءِ تہ ءَ بھر زرتگ ءُ باز برا چاریگانی کُشگ ءِ پرمان اِش ھم داتگ اَنت۔
ھشت جنوری 1959 ءَ فیڈل کاسترو ءِ آشوب سوبمند بیت ءُ باٹیسٹہ ءِ سرکار پروش وارت ءُ کیوبا ءَ مارکسسٹ سرکار ءِ جوڑ بیت۔ ھمے وھد ءَ چی گویرا ءَ کیوبا ءِ شھری نامینگ بیت۔ چی گویرا کیوبا ءِ بندیگ جاھانی تہ ءَ آشوب دژمنیں مردمانی سزا ءُ کوشانی زمہ وار بیت۔ چی گویرا بازیں ھنداں کیوبا ءِ لیکھانی درشان کنوکیں چیدگ جوڑ بیت ءُ رو برکتی ملکانی تہ ءَ آ وتی گھگیریں لیکہ ھاس کالیونیلزم ءُ نیوکالونیلزم ءِ بگیری ءُ آئی ءَ امریکہ ءِ پالیسیانی سر ءَ ترندیں ایرادانی سوب ءَ سک نامدار بیت اِنت۔
چی گویرا چُش کہ یک جھانی آشوبی ءِ رند ءَ بیت آئی ءِ ھیال چہ یک مُلکے ءِ یک دمگ ءُ یک براعظم ءَ باز دیم ءَ بنت۔ آئی ءِ ھیال یک سوشلسٹ ءِ جھان ءِ جوڑ کنگ بیت۔ اپریل 1965 ءَ پد چی گویرا چہ لس زند ءَ گار بیت ءُ داں دو سال ءَ کس نزانت آ کجا اِنت۔ رند ءَ زانگ بیت کہ آ گوں دگہ آشوبیانی پجیگ ءَ کانگو ءَ پٹریس لومومبا ءِ جنگولانی کمک ءَ رؤ انت، کہ آ اود ءَ یک لس جنگے کنگ ءَ بنت۔ زانتکارانی رد ءَ ءُ گوستانک ءِ منانک ءِ چارگ ءَ پد زانگ بیت کہ چی گویرا ءُ دگہ کیوبن آشوبیانی کانگو ءَ روگ یک بے سوبیں گام ءِ بیتگ۔ چی گویرا ھمے نیام ءَ وتی کیوبن سرکار ءِ اگدہ ءُ شھریت ءَ یل کنت۔
چی گویرا کانگو ءَ بے سوبی ءَ پد پیسر ءَ تنزانیہ ءُ پد ءَ پراگ ءِ یک پھاز اتگیں جاھے ءَ رؤت۔ سال 1966 ءَ چی گویرا ءَ وتی مَٹ کُتگیں دروشم ءَ گوں بولیویا ءَ سربیت کہ اود ءَ آ سنتا کروز ءَ یک آشوبی ٹولی ءِ جوڑ کنت ءُ آیانی سروکی ءَ کنگ ءَ بیت۔ بنداتی لھتے سوبمندیں اُرشاں پد چی گویرا ءُ آئی ءِ ٹولی مدام بولیویا ءِ پوج ءِ نشانگ ءَ بنت۔ 08 اکتوبر 1967 ءَ بولیویا ءِ پوج ءِ ھاسیں ٹولی گوں امریکہ ءِ سی آئی اے کمک ءَ گوں کساس سرجمیں آشوبیاں ھلاس کن اَنت۔ ڈاکٹر چی گویرا وت ٹپی ئیں جاورانی تہ ءَ دزگیر کنگ ءُ کُشگ بیت۔
ڈاکٹر چی گویرا ءِ کوش ءَ پد آئی ءِ دست بُرگ بنت ءُ آئی ءِ سرجمیں جون چیروکائی کل کنگ بیت۔ 1997 ءَ پولکار چی گویرا ءُ آئی ھمراھیں آشوبیانی مانشجاھاں درگیج اَنت ءُ آیانی پشت کپتگیں ھڈ پد ءَ کیوبا ءَ دیم دیگ بنت کہ اود ءَ آھاں گون ستاشانی سنتا کلارہ ءَ جاہ دیگ بیت اِنت۔
ڈاکٹر چی گویرا ءِ سرجمیں زندمان ءُ داں آئی ءِ کوش سرجم ءَ آشوب ءُ چاگردی بدلیانی جھد ءِ تہ ءَ گوستگ۔ آئی زند ءِ مستریں لوٹ ھمیش بیتگ کہ جھان ءِ تہ ءَ ھمک مھلوک ءِ ھاترا یکیں کانود یکیں رھبند یکیں انساپ بہ بیت۔ مروچی ھم جھان ءَ کجام ھم جاہ ءَ اگاں کس آشوب ءَ گوں آشنا اِنت آ الم چی گویرا ءَ زانت۔ کس اگاں جنگ کنگ ءَ اِنت آ الم چی گویرا ءَ زانت۔ پرچا کہ چی ءَ وت گُشتگ داں گُڈی سوب ءَ مدام جھد کنگی اِنت۔
دلگوش: ٹی بی پی کارستانی درگت ءَ سرپدی ءُ اھوال چہ انٹرنیٹ ءُ دگہ جاھاں زیرگ بیتگ اَنت ءُ اِشانی تہ ءَ ردی اگاں گیشی ءُ کمی الم بیت کن اَنت-