دودا الھی ءُ گمشاد مُرید یل بوتگ ءُ وتی گِس ءَ سربوتگ انت

سربیتگیں ھالانی رِد ءَ سندھ ءِ مزن شھر کراچی ءِ دمگ مسکن چورنگی ءَ ھپت جون ءَ پاکستانی پوج ءُ سی ٹی ڈی ءِ دست ءَ زورانسری آوار جنگ بوتگیں کراچی شھدربرجاہ ءِ دو نودربر یل بوتگ ءُ وتی گِساں سر بوتگ انت –

زورانسری آوار جنگ بوتگیں ھردو نودربرانی کھولاں دودا الھی ءُ گمشاد مُرید ءِ یل بوگ ےِ ھال راست کُتگ ءُ گشتگ کہ ما چہ بلوچ راج ءُ نودربر ءُ بیگواھیں مردمانی کھول، بلوچ یکجھتی کمیٹی ءُ سوشل میڈیا ایکٹوسٹ ءُ ھر تک ءُ پھناتاں سیادی داروکیں مردمانی منت ءَ گریں کہ آھاں مئے دوستیگیں مردمانی ھاتر ءَ توار چست کُتگ ءُ گوں ما ھمراہ داری کتگ – ھمے امیت ءَ داریں کہ ھنچو کہ بلوچ راج ءَ گوما ھمراہ داری آھانی یل کنگ ءَ گوما ھمکوپگ بوتگ انت ایندگہ بیگواھیں مردمانی کھولانی ھم ھمے وڑ ھمراھداری کن انت ءُ آھانی دوستیگیں مردمانی یل کنائینگ ءَ گوں آھاں ھم کوپگ بنت – تانکہ آھانی دوستیگین مردم وش ءُ سلامتی یل بہ بنت ءُ وتی گِس ءَ سر بہ بنت –

زانگ بہ بیت دودا الھی ءُ گمشاد مُرید ھپت جون چہ کراچی مسکن چورنگی ءَ وتی گِس ءَ آوار جنگ ءُ بیگواہ کنگ بوتگ انت – آھانی بیگواھی ءِ پژدر ءَ کراچی پریس کلب ءِ دیم ءَ زھرشانی بنجل ءِ ھم جنگ بوتگ ءُ کراچی ءُ تربت ءَ زھرشانی ھم روانک ھم کشگ بوتگ اَنت –