کراچی ءَ بیگواھیں مردمانی کھول سر ءَ پولیس ءَ لَٹ ءُ کُتگ اَنت بازین ئِے دزگیر کتگ اَنت

کراچی یونیورسٹی ءِ دو بلوچ نودربرانی زورانسری آوار جنی ءِ بگیری ءَ زھرشانی کنوکانی ءُ سی ٹی ڈی واکدار میان ءَ مروچی بوتگیں نند ءُ نیاد ءَ پولیس ءِ مزنیں کاردار نیتکگ اَنت چریشی ءَ پد زھرشانی کنوکاں وزیراعلیٰ سندھ ہاوس “گس” ءِ نیمگ جنزگ ءِ جُھد کتگ- پولیس آ دیم ءَ روگ ءَ نہ اِشتگ اَنت پد ءَ زھرشانی کنوکاں وزیراعلیٰ ہاوس نیمگ ءَ جُنزگ یل کتگ ءُ دیم پہ سندھ اسمبلی ءِ نیمگ ءَ جُنز اِتگ اَنت- ھالانی رِد ءَ بلوچ زالبول ءُ زھگ دزگیر ھم کتگ اَنت-

زانگ بہ بیت گوستگیں شپ ءَ سندھ پولیس ءِ نیمگ ءَ بیگواھیں نودربرانی یل کنگ ءِ باور کنائینگ ءَ پد زھرشانی کنوکاں سندھ اسمبلی ءِ دیم ءَ زھرشانی پہ اداروکی ھلاس کنگ ءِ جار جتگ- زھرشانی کنوک ءُ سندھ پولیس نند ءُ نیاد ءَ میانی ءَ یک نبشتانکی مھادے بوتگ- بلے مروچی سندھ پولیس گپ ءُ تران ءَ پُشت کِنز بوتگ، زھرشانی سروکی ءَ بلوچ یکجھتی کمیٹی کراچی ءِ آرگنائزر آمنہ بلوچ ءُ وائس فار بلوچ مسنگ پرسنز ءِ ڈپٹی سیکریٹری سمی بلوچ کنگ ءَ اَنت- زھرشانی ءَ انسانی ھکانی راھشون پروفیسر ریاض احمد ءُ نغمہ ھوار اَنت-

زھرشانی کنوکانی گْوشگ اِنت کہ ھپت جون 2022 ءَ بلوچستان ءِ ضلع کیچ ءَ سیادی داروک دو بلوچ نودربر چہ کراچی ءَ بیگواہ کنگ بوتگ اَنت- کراچی ءِ دمگ مسکن چورنگی ءَ ھستیں یک لوگے ءَ بیڑبرتگ ءُ دودا بلوچ ء الھی بخش ءُ آئی ءِ ڈیپارٹمنٹ ءَ ھمگرنچ غمشاد بلوچ ء غنی بلوچ چیریں ادارہ ءُ پھازوکی لشکر ءِ کارندھاں زورانسری آوار جتگ اَنت-

دودا بلوچ کراچی یونیورسٹی ءِ شعبہ فلاسفی ءَ سیمی سیمسٹر غمشاد بلوچ پنچمی سیمسٹر ءِ نودربر اَنت- دودا بلوچ ءَ سیادی ضلع کیچ ءِ بُنجاھی شھر تربت ءَ اِنت وھدے کہ غمشاد بلوچ ءِ ضلع کیچ ءِ دمگ مند ءَ اِنت – زھرشانی کنوکانی گْوشگ اِنت ھپت جنوری 2022 ءَ چہ دوئیں نودربر تنی وھدے چیریں ادارھانی کر ءَ اَنت – آیاں چیریں ادارھانی سر ءَ بھتام جتگ کہ آ کراچی ءَ بلوچاں بے کانودی ءَ چست کنگ ءَ اَنت آ سرکاری ادارہ انسانی ھکانی پادمالی کنگ ءَ اَنت- ءُ کراچی ءَ زانت زوروکیں نودربراں نشانگ کنگ ءَ اَنت-

زھرشانی کنوکاں پی پی ءِ چیئرمین بلاول بھٹو ءُ وزیراعلیٰ سندھ سید مراد علی شاہ ءَ چہ دودا بلوچ ءُ غمشاد بلوچ ءِ یل کنائینگ ءِ لوٹ کتگ-

زانگ بہ بیت مروچی سندھ اسمبلی ءِ نند ءُ نیاد برجاہ ءَ اِنت ءُ باندا سندھ اسمبلی ءُ سندھ بجٹ پیش بیت- چریشی ءِ سبب ءَ سندھ اسمبلی ءِ نیمگ پھازوکی شیوار کنگ بوتگ اَنت وھدے کہ زھرشانی کنوکاں سندھ اسمبلی ءَ رؤکیں دگ بند کتگ چریشی ءِ آسر ءَ روگ ءُ آھگی سک جام بوتگ-