دودا بلوچ ءُ گمشاد بلوچ ءِ آوارجنی ءِ بگیری ءَ کھول ءُ بی وائی سی نیمگ ءَ شال ءُ تربت ءَ زھرشانی جار

بلوچ یکجھتی کمیٹی شال ءِ نیمگ ءَ پانزدہ جون ءَ دودا بلوچ ءُ گمشاد بلوچ ءِ زورانسری آوار جنی ءِ بگیری ءَ بلوچستان شھدربرجاہ ءَ روانک کشگے جار پرینگ بوتگ –

بی وائی سی جار ءِ تہ ءَ گوشگ بوتگ کہ پانزدہ جون ءَ بلوچستان شھدربرجاہ ءِ دیم ءَ کراچی شھدربرجاہ ءِ دو نودربر گمشاد بلوچ ءُ دودا بلوچ ءِ زورانسری آوار جنی ءِ بگیری ءَ زھرشانی روانک ءِ گشگ بیت – روانک نیمروچ ءِ ادار سَے ءَ بلوچستان شھدربرجاہ ءَ چہ کشگ بیت –

دومی نیمگ ءَ چہ تربت ءَ گمشاد بلوچ ءُ دودا بلوچ ءِ کھول ءِ نیمگ ءَ
پانزدہ جون ءَ ڈی بلوچ بند کنگ ءُ نندانک جنگ ءِ جار پرینگ بوتگ-

بیگواھیں نودربرانی کھول ءِ رِد ءَ تاں پانزدہ جون ءَ بیگواھیں نودربر یل کنگ نہ بوتاں گڈا تربت پریس کلب ءِ دیم ءَ زھرشانی ءُ پریس کانفرنس ءَ پد ڈی بلوچ شھدگ ءِ سر ءَ نندانک جن ایں دگ ءَ بند کنیں –

ھمے وڈ چاگردی ترامجاھاں دودا الھی گھار ھداھیر بلوچ ءَ وتی شنگ کتگیں تامری درشان ءِ تہ ءَ پاکستان ءِ ھر کُنڈ کُنڈ ءَ نشتگیں بلوچ راج ءَ چہ لوٹ کُتگ گوشتگ کہ باند ءَ دودا ءُ گمشاد بلوچ ءِ زورانسری آوار جنی ءِ بگیری ءَ در بیا ات ءُ وتی زھرشانی نبشتہ بہ کنائین ایت –

آئی ءَ دیمتر ءَ گوشتگ کہ ھنچو کہ شما سرپد ات دوشی شپ سند اسمبلی ءِ دیم ءَ پولیس زھرشانی کنوکانی سر ءَ بیڑ برتگ ءُ آ لٹ کُٹ کتگ ءُ گون وت برتگ انت – آئی ءَ لوٹ کتگ گوشتگ کہ بانداتگیں زھرشانی ءَ بھر بہ زوریت گوں ما ھمکوپگ بہ بئے وتی انسان دوستی ءَ پرز ءَ پیلو بہ کن ات –