پنجگور: دو مردم آوار جنی ءَ پد بیگواہ، کھول ءِ نیمگ ءَ سی پیک دگ ءِ سر ءَ نندانک

پنجگور ءَ پوج ءِ دست ءَ دو براتانی زورانسری آوار جنی ءِ بگیری ءَ دمگی مردماں زھرشانی کتگ ءُ سی پیک دگ بند کرتگ –

پنجگور شاھو کھن ءَ پوج ءِ دست ءَ دو براتانی زورانسری آوار جنی ءِ بگیری ءَ سی پیک دگ ءِ سر ءَ نندانک جنگ بوتگ چریشی ءَ سی پیک دگ سرجمیں بند بوتگ ءُ ھردو نیمگاں گاڑیانی لین لگتگ – زھرشانی کنوکاں لوٹ کتگ گوشتگ سیاسی پاٹی ءُ سوبائی سرکار آھانی دوستیگیں مردماں وش سلامتی یل بہ کنائینگ ءَ وتی کرد ءَ پیلو بہ کن انت –

زھرشانی کنوکانی رِد ءَ پنجگور شاھو کہن ءِ جھمنندیں دو برات شرافت ءُ ارشاد ء ملا عوض پرندوشی پاکستان ءِ پھازگی لشکر ءَ چہ جند ءِ گِس ءَ زورانسری آوار جتگ ءُ بیگواہ کتگ انت – پدا رند ءَ آھانی ھچ وڈیں ھال اھوال نیست – زورانسری آوار جنگ بوتگیں مردمانی کھول ءَ مروچی نیمروچ ءِ ادار سَے ءَ سی پیک دگ بند کتگ نندانک جتگ ءُ زھرشانی برجاہ داشتگ –

بیگواھیں مردمانی کھول ءَ پنجگور ءِ سیاسی ءُ چاگردی گل ءُ سول سوسائیٹی ءَ چہ لوٹ کتگ گوشتگ کہ آ سی پیک شھدگ ءِ سر ءَ بیا انت ءُ زھرشانی ءَ بھر بہ زور انت آھانی دوستیگیں مردمانی یل کنائینگ ءَ آھانی توار جوڈ بہ بنت –

ھمے ماہ ءَ زورانسری آوار جنگ بوتگیں مردمانی کچ پانزدہ ءَ سر بوتگ انت اشی ءَ پیش کراچی ءُ بلوچستانءَ سینزدہ مردم زورانسری آوار جنگ ءُ بیگواہ کنگ بوتگ انت –

بلوچ ورناھانی زورانسری آوار جنی ءِ تہ ءَ گیشی آھگ ءَ انت کہ پنچ مردم چہ کراچی، سے آواران ءُ چار کیچ ءَ یکے چہ ھزدار ءَ آوار جنگ ءُ بیگواہ کنگ بوتگ انت – کراچی ءَ آوار جنگ بوتگیں سَے نودربرانی تہ ءَ شاداد بلوچ، دودا الھی ءُ گمشاد بلوچ ھوار انت –

کراچی شھدربر جاہ ءِ نودربرانی زورانسری آوار جنی ءِ بگیری ءَ آدینگ ءِ روچ ءَ کراچی پریس کلب ءِ دیم ءَ زھرشانی بنجل ءِ اڈ دیگ بوتگ کہ مروچی ھم برجاہ بوتگ –