دودا الھی ءُ گمشاد بلوچ ءِ زورانسری آوار جنی ءِ بگیری ءَ کراچی ءُ تربت ءَ زھرشانی

یکشمبے ءِ روچ ءَ سند ءِ بنجاھی شھر کراچی ءُ بلوچستان ءِ دمگ کیچ ءِ شھر تربت ءَ چہ کراچی شھدربرجاہ ءَ دو نودربرانی زورانسری آوارجنی ءِ بگیری ءَ زھرشانی نندانک ءُ روانک کشگ بوتگ –

کراچی پریس کلب ءِ دیم ءَ زھرشانی نندانک سیمی روچ ءَ زھرشانی ءُ روانک کش اِتگ سدانی کچ ءَ چک ءُ زالبولاں ھم بھر زرتگ –

زھرشانی کنوکاں کراچی پریس کلب ءِ دیم ءَ بگر تاں سند اسمبلی ءَ روانک کشگے کوشست کتگ بلے پولیس ءَ سند اسمبلی ءِ نزیک ءَ فوارہ چار راہ ءَ روانک داشتگ ءُ دیم روگ ءَ نہ اشتگ انت کہ ھمود ءَ زھرشانی کنوکاں نندانک جتگ –

گڈسر ءَ زھرشانی کنوکاں درسیں اڈاند سرگوز کرتگ ءُ سند اسمبلی دیم روگ ءَ سوبمند بوتگ انت کہ اود ءَ سند ءِ سرکار ءُ پھازگی ادارھانی بگیری ءَ ترندیں نارہ ھم جتگ –

زھرشانی بیگواھیں نودربرانی کھول ءِ لوٹ ءِ پد ءَ کنگ بوتگ، زھرشانی ءَ بلوچ یکجھتی کمیٹی کراچی، وائس فار بلوچ مسنگ پرسنز، انسانی ھکانی گل ءُ دیمروئی لوٹوکیں نودربر گلانی کمک ھم گون بوتگ –

زھرشانی کنوکاں کراچی شھدربرجاہ ءِ بیگواھیں ھردو نودربرانی یل کنگے لوٹ کتگ ءُ زھرشانی کنوکاں سرکاری ادارھانی نیمگ ءَ بلوچ نودربرانی زورانسری آوار جنی ءِ بگیری ءَ نارہ ھم جتگ –

زھرشانی کنوکانی گوشگ ات کہ ھپت جون دوھزار بیست ءُ دو ءَ بلوچستان ءِ دمگ کیچ ءِ جھمنندیں دو نودربر چہ کراچی ءَ آوار جنگ بوتگ انت – پھازگی لشکر ءُ چیریں ادارھانی کارمنداں کراچی ءِ دمگ مسکن چورنگی ءَ گِس ءِ سر ءَ بیڑ برتگ ءُ دودا بلوچ ءُ آئی ءِ سنگت گمشاد بلوچ زورانسری آوار جتگ ءُ بیگواہ کتگ انت – ھردو فلسفہ ءِ نودربر انت ءُ دودا سیمی سیمسٹر ءِ ءُ گمشاد پنچمی سمسٹر ءِ نودربرے بوتگ –

دودا ءِ سیادی کیچ ءِ دمگ تربت انت ءُ وھدیکہ گمشاد بلوچ کیچ ءِ دمگ مند ءِ نندوک ایں –

زھرشانی کنوکاں گوشتگ ھردو نودربر ھپت جون ءَ پھازگی ادارھاں اوار جتگ ءُ گوں وت برتگ انت ھنگت ھماھانی گور انت – آھاں اے ادارھانی سر ءَ الزام جتگ گوشتگ کہ آ کراچی ءِ تہ ءَ بلوچاں درکانودی آوار جنگ ءُ بیگواہ کنگ ءَ انت ءُ سرکاری ادارہ انسانی ھکانی لگتمالی ءَ کنگ ءَ انت ءُ کراچی ءَ وانگے ھاتر ءَ اتکگیں نودربراں آوار جنگ ءُ بیگواہ کنگایاں –

کراچی ءَ آوار جنگ بوتگیں نودربرانی ھاتر ءَ زھرشانی کنوکاں گوشتگ کہ بلوچ ورناھانی زورانسری آوار جنی ھمک روچی کارے جوڈ بوتگ – زھرشانی کنوکاں سند ءِ سرکار بلوچ راج ءِ دژمن گوشتگ ءُ درائینتگ کہ بلوچ نودربرانی آوار جنی ءَ سند سرکار ءِ دست تچکی ءَ مان انت –

ترانکارانی گوشگ ات کہ زرداری سرکار بلوچ نودربرانی یل کنائینگ ءَ وتی کرد ءَ پیلو بہ کنت –

زھرشانی کنوکاں پھازگی ادارھانء نیمگ ءَ زورانسری آوار جنی انسانی ھکانی لگتمالی ءِ گوشتگ ءُ درائینتگ کہ اقتدار لوٹوکیں بلوچ پاٹیاں وتی کرسی دوست بیت بلے بیگواہ مردم ناں ءُ آھانی ھچ نگوشگ اے گپ ءِ گواھی ءَ دنت کہ آ اے آوار جنیاں پھازگی ادارھاں گوں ھوار انت –

ترانکاراں اقتدار ءَ نشتگیں بلوچستان نیشنل پاٹی ءِ سرکماش اختر مینگل ءَ چہ لوٹ کتگ ءُ گوشتگ کہ آ مزن وزیر شھباز شریف ءُ سند ءِ سر وزیر سید مراد علی شاہ ءَ گوں دودا بلوچ ءُ گمشاد بلوچ ءِ یل کنگے ھاتر ءَ گپ تران بہ کنت ءُ ھردو نودربراں یل بہ کنائینت –

زانگ بہ بیت مروچی کھول ءِ جار ءِ پد ءَ بلوچستان ءِ دمگ کیچ ءِ بنجاھی شھر تربت ءَ ھم زھرشانی کنگ بوتگ زھرشانی کنوکاں نودربرانی زورانسری آوارجنی ءِ سر ءَ دلپدردی درشانتگ ءُ آھانی یل کنگے لوٹ کتگ –

گڈی ھالاں تاں سند اسمبلی ءِ دیم ءَ زھرشانی نندانک ھنگت برجاہ انت –

زھرشانی کنوکانی گوشگ انت کہ تانکہ بیگواھیں بلوچ نودربر یل کنگ نہ بنت سند اسمبلی دیم ءَ مئے نندانک برجاہ انت –