بلوچستان ءِ دمگ چمن ءَ چہ یک لَٹ کُٹ کُتگیں جونیں دزکپتگ۔ کہ آئی پجار ڈیرہ بگٹی ءِ جھمنند یاسین بگٹی ء غلام نبی ءِ نام ءَ بیتگ۔
بلوچستان ءَ زورانسری بیگواھیانی بگیرءَ کارکنوکیں گل وائس فار بلوچ مسنگ پرسنز ءِ ردءَ یاسین بگٹی 16 جنوری 2016 ءَ چہ شال ءِ ناشناس کالونی ءَ بشیر چوک ءِ ھندءَ بیگواہ کنگ بیتگ اَت۔
یاسین بگٹی ءِ کھول ءَ ھم آئی دراج کشیں بیگواھی ءِ سرءَ زھرشانی کنان ءَ گُشتگ اَت کہ پاکستانی چیریں گلانی کارمنداں آ زورانسری بیگواہ کُتگ کہ اِشی ءَ پد آئی ھچ پئیمیں ھال دیما نئیتکگ اَت ءُ مروچی آئی ءِ جون دزکپتگ۔
یات بہ بیت بلوچستان ءَ زورانسری بیگواہ بیتگیں مردمانی ژانگولیں جون بازیں وھدءَ چہ در آھگ ءَ بیتگ اَنت کہ اِشانی سرءَ لَٹ ءُ کُٹ ءِ نشان گندگ بنت۔
بلوچستان ءِ سیاسی گل، انسانی ھقانی گل ءُ بیگواھیں مردمانی کھول اے بیگواھی ءُ کوشانی بھتام ءَ چیریں گلانی سر ءَ جن اَنت۔