چینی قونصلیٹ ءِ سر ءَ اُرش ءِ بھتام ءَ دزگیر کُتگیں عارف بلوچ جیل ءَ ناگتی بیران

چینی قونصلیٹ ءِ سر ءَ اُرش ءِ بھتام ءَ گرگ بیتگیں عارف بلوچ کراچی ءَ سینٹرل جیل ءَ ناگتی بیران بیتگ – آئی ءِ لاش پولیس واکداراں کھول ءِ دست ءَ داتگ – گوشگ بیگ ءَ اِنت آ کُشگ بیتگ –

دمگی مردماں گوں ٹی بی پی ءَ گُشتگ کہ چینی قونصلیٹ ءِ سر ءَ اُرش ءِ بھتام ءَ دزگیر کنگ بیتگیں عارف ءِ ناگتی بیرانی ءَ پد آئی ءِ لاش پولیس ءَ شال ءَ آورتگ ءُ کھول ءِ دست ءَ داتگ –

کھول ءِ رد ءَ آ جیل ءَ زھر دیگ بیتگ ءُ کُشگ بیتگ ءُ آئی ءِ جسم ءَ لٹ ءُ کُٹانی نشانگ پر اَنت-

عارف ء عبدالقادر کراچی ءَ وتی گیراج ءَ کار ءَ بیتگ، آئی ءِ بنکی سیادی شال ءَ اِنت، عارف عبدالقادر بلوچ لبریشن آرمی ءِ گوستگیں سروک جنرل اسلم بلوچ ءِ ناکوزتک اِنت – عارف عبدالقادر ءِ دزگیری بیست ءُ چار دسمبر دوھزار ءُ ھژدہ ءَ پاکستانی واکداراں کراچی ءَ چینی قونصلیٹ ءِ سر ءَ اُرش ءِ کمکار پدر کرتگ ءُ دزگیر کتگ-

گوستگیں سال ءَ آ سینٹرل جیل ءَ بندیگ بیتگ ءُ آئی ءِ سر ءَ کیس ھلگ ءَ بیتگ – آئی ءِ سر ءَ مھکمیں منانک گندگ ءَ نہ بیتگ اَنت-

نومبر دوھزار ءُ ھژدہ ءَ سَے اُرشکاراں کراچی ءَ ھستیں چینی قونصلیٹ ءِ سر ءَ بیتگیں اُرش ءِ زمہ واری بلوچستان ءَ پرکاریں آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ اَت – گل ءِ درشان ءِ رد ءَ اے اُرش بلوچ لبریشن آرمی ءِ مجید بریگیڈ ءِ سَے فدائیناں سرجم کرتگ-

اے کیس ءَ ورنائیں حسنین بلوچ ءِ دزگیری ھم پدر کنگ بیتگ ءُ آئی ءِ سر ءَ کمکاری ءِ بھتام جنگ بیتگ – ھمے وڑ حسنین بلوچ سِی نومبر دوھزار ءُ ھژدہ ءَ شال آئی ءِ لوگ ءَ برات ءُ پت ءِ ھمراھی ءَ دزگیر کنگ ءَ پد ناشناسیں جاھے ءَ برگ بیتگ اَت-

پد ءَ یازدہ جنوری دوھزار ءُ نوزدہ ءَ کراچی پولیس ءَ یک پریس کانفرنسے ءَ ٹاہ داتگ کہ کراچی قونصلیٹ ءِ سر ءَ بیتگیں اُرش ءَ ھواریں پنچ مردم دزگیر کتگ اَنت اشانی تہ ءَ چاردہ سالی ئیں حسنین بلوچ ھم ھوار اِنت-

ھمے وڑ ءَ سَے جولائی دوھزار ءُ نوزدہ ءَ پاکستانی واکداں ٹاہ داتگ کہ چینی قونصلیٹ ءِ سر ءَ اُرش ءَ ھواریں جرمکار راشد حسین شارجہ ءُ دزگیر کتگ ءُ پاکستان ءَ آورتگ – راشد حسین ھما سال ءِ جنوری ءِ ماہ ءَ دزگیری ءِ ٹاہ دیگ بیتگ کہ آئی ءِ دزگیری ءِ گپ مھکمہ انسداد دھشت گردی (سی ٹی ڈی) ءِ ڈی آئی جی عبداللہ شیخ ءَ کتگ-

پد ءَ ٹی بی پی ءِ پٹ ءُ پول ءَ سرپدی بیتگ کہ راشد حسین بیست ءُ شش دسمبر دوھزار ءُ ھژدہ ءَ متحدہ عرب امارات ءِ واکداراں زورانسری آوار جتگ ءُ آئی ءِ کھول ءَ اشی ءِ راستی کتگ اَت کہ یو اے ای ءِ واکداراں راشد حسین ناشناسیں جاھاں برگ ءَ پد آئی ءِ پاسپورٹ ءِ دستیگ کنگ ءَ لوگ ءِ سر ءَ بیڑ برگ بیتگ-

کھول ءِ رد ءَ شش ماہ ءَ داں آ ناشناسیں زنداناں دارگ بیتگ ءُ پد ءَ متحدہ عرب امارات ءُ پاکستانی واکداراں راشد حسین گیر کانونی رنگ ءَ پاکستان ءَ آورتگ کہ انگت ءَ بیگواہ اِنت-

حسنین بلوچ ءُ راشد حسین بلوچ ءِ بارو ءَ بلوچستان ءُ درملکاں بازیں کچے ءَ زھرشانی کنگ بیتگ اَنت کہ آیانی زند ءِ واستا ترس ءِ واستا ھم کھولاں وتی درشان داتگ اَنت-