بلوچ راجی زْرمبشت( بی این ایم) ءِ جتا جتائیں ھنکینانی باسکاں بلوچستان ءِ جتا جتائیں دمگاں بلوچ راجی سروک بابا ھیربکش ءِ سالروچ ءِ درگت ءَ یادگاری مراگش برجم داشتگ۔
اے رد ءَ یادگاری مراگشے ءِ سروکی بنجاھی کستریں کمک سرکماش بابل لتیپ ءِ پاگواجھی ءَ برجم دارگ بیتگ۔مراگش ءِ بندات چہ شھیدانی یات ءَ دو دمان ءِ بے تواری ءَ بیتگ۔
یادگاری مراگش ءَ تْران کنان ءَ بی این ایم ءِ بنجاھی کستریں کمک سرکماش استاد بابل لتیپ ءَ گْوشتگ ھما راج کہ زورگر ءِ بگیری ءَ جنگ ءِ جار ءَ نہ جن اَنت گڑا راج وتی ھستی ءَ شموش اَنت ءُ تباہ ءُ برباد بہ اَنت۔مرگ راستی یے کہ ھر پیم ءَ کیت پمیشکا ما وتی زندگی ءَ راج ءِ نام ءَ بہ کن این ءُ جھان ءِ گْوستانک ءَ وت ءَ زندگ بہ کن ایں۔
آئی ءَ گْوشتگ کہ اگاں بلوچ راجی آجوئی ءِ جھد ءُ بلوچ راجدوستی ءِ گپ بیت گڑا اےچیز پدر بیت کہ باباھیربکش مری ءِ نام ءَ ابید بلوچ راجدوستی ءِ گْوستانک ءُ بزانت نا سرجم بیت۔
مروچی بابا ھیربکش ءِ سسا ءُ شھزانتی اِنت کہ بلوچ شھید،سرمچار ءُ جُھدکاراں ھمے سما ءُ شھزانتی ءِ سر ءَ کار کرتگ ءُ جنگ اے جاہ ءَ سر کرتگ کہ چہ اد ءَ واتر بیگ ءِ ھچ راہ نیست۔گْوست ءَ ما ویتنام ءِ جنگ،الجزائر ءِ جنگ،بنگلہ دیش ءِ جنگ ونتگ اَنت یا ھمایانی درور داتگ بلے مروچی بلوچستان ءَ ھما ویل دیم ءَ پیداک اَنت ءُ مئے سیادی چہ ھمے پدریچ ءَ اِنت کہ اے درسیں ویلاں چمان ء وت گندگ ءَ اِنت۔مروچی ناں بلوچ ءِ شرپ پھریز اِنت ءُ ناں کہ بلوچ بچ ءُ بلوچ جنین۔باند ءَ کہ ما آجوئی ءِ جنگ ءَ داں منزل ءَ سر کنگ ءَ سوبمند بہ ایں گڑا جھان ءِ آدگہ ایردستیں راج بلوچ راج ءِ دیمونی ءُ پگر ءِ درور ءَ دے اَنت۔
استاد بابل لتیپ ءَ وتی تْران ءِ گُڈی ءَ گْوشتگ کہ جھان ءَ ھچ مردم سرجم ءُ ھچ نامداریں سروک ابید شرگداری ءَ سرجم نہ بیت۔بےشک بابا ھیربکش ءِ مزنی ءِ سر ءَ ھم شرگداری کنگ بیت ءُ چہ آئی ءَ ھم لھتے ردی بیتگ ءُ مردمے ءِ بستار ءَ لھتے نزوری ھم بیتگ بلے آئی ءِ دیمونی ءُ سسا مدام مئے راھشونی ءَ کن اَنت۔
مراگش ءَ بی این ایم ءِ بنجاھی پتر ءِ باسک چیپ اسلم ءُ ھمید ءَ تْران کرتگ ءُ گْوشتگ کہ بلوچ آجوئی ءِ جھد ءَ جان نْدر کرتگیں درسیں شھید بلوچ راج ءِ بامرد اَنت کہ آیاں وتی جان ندر کرتگ اَنت ءُ بلوچ راج ءَ نوکیں پگر ءُ سمایے داتگ۔ھمے وڑ ءَ مئے راجی سروک بابامری ءِ سیاسی سما ءُ سلاہ بندیں جُھد ءَ بلوچ راج گوں نوکیں سسا ءُ کارے ءَ پجاروک کرتگ۔
تْرانکاراں تْران کنان ءَ گْوشتگ کہ راجی زْرمبشتانی تہ ءَ پارٹی ءُ گلانی مزنیں کِردے بیت پرچا کہ جھان ءَ ھرچی راجی آجوئی ءِ زْرمبشت کہ وتی منزل ءَ سربیتگ اَنت،آیانی داں منزل ءَ سرکنگ ءَ پارٹی ءُ گلانی مزنیں کِردے بیتگ۔ مردم ھلاس بہ اَنت بلے مردم ءِ سسا ءُ لیکہ ءِ دیم ءَ برگ ءَ پارٹی ءُ گلانی مزنیں کِردے بیت۔
دگہ یک مراگشے ءَ بی این ایم ءِ گھبودی کارگشاد ماسٹراکبال ءُ بُنجاھی پتر ءِ باسک ھنیپ ءُ آدگراں بھر زرتگ۔مراگش ءَ تْران کنان ءَ بنجاھی سروکاں گْوشتگ کہ باباھیربکش مری زانوگر ءُ دور چاریں سیاست زانتے بیتگ۔
آئی ءَ وتی سرجمیں زند بلوچ راجی زْرمبشت ءُ بلوچ راج ءِ ھستی ءُ پہ آؤکیں باندات ءَ ندر کرتگ،مروچی راج ءِ تہ ءَ آئی ءِ جند ساڑی نہ اِنت بلے آئی ءِ مھکمیں لیکہ،سیاسی ءُ گھگیریں سسا بلوچ راج ءِ ھر بچ ءِ مجگ ءَ ساڑی اِنت۔آئی ءَ بلوچ راجی آجوئی ءُ پہ راجی ھستی ءَ آئی ھرچ پیمیں جیڑہ ءُ جنجال اوپار کرتگ اَنت،درانڈیھ بیتگ بلے زورگریں ریاست ءِ دیم ءَ سر ءَ جھل کنگ ءِ جاہ ءَ داں گڈی دم ءَ وتی راجی گپ ءِ سر ءَ اوشتاتگ۔
ھمے دْرچ ءَ دگہ یک یات آوری مراگشے ءَ مردین باسکاں ابید جنینیں باسکاں ھم بازیں کچے ءَ بھر زرتگ۔اے مراگش ءَ بی این ایم ءِ کلانھیں باسک کمبر ءَ بھرزیروک باباھیربکش مری ءِ زندگی،شھزانتی ءُ سیاست ءِ سر ءَ سرپدی داتگ اَنت۔
آئی ءَ گْوشتگ کہ بابا ھیربکش مری ءِ کِرد بلوچ آجوئی ءِ جھد ءِ تہ ءَ مئے راھشونی ءَ کنت۔