بلوچی زبان ءِ شائر ءُ ازمکار ھبیبہ پیر جان مروچی سھب ءَ چہ کراچی ءَ چیریں ادارھانی کارمنداں بیڑ بُرتگ ءُ بیگواہ کُتگ۔
سر بیتگیں ھالانی رد ءَ پاکستانی چیریں ادارھانی کارمنداں بیڑ برتگ ءُ بلوچی زبان ءِ شائر ءُ ازمکار ھبیبہ پیر جان زورانسری آوار جتگ۔
اھوالانی رد ءَ بیگواہ کنگ بیتگیں ھبیبہ پیر جان کیچ ءِ ھند تمپ نزر آباد ءِ جھمنند اِنت۔
گیشتریں اھوالانی رد ءَ لوگے سامانانی پرشت ءُ پروش کنگ ءَ ھوار، سرجمیں کھول ءِ مردمانی موبائل ھم لشکریاں گوں وت بُرتگ اَنت۔
زانگ بہ بیت گوستگیں روچاں بزاں 16 مئی ءَ سی ٹی ڈی ءِ کارمنداں کیچ دمگ ھوشاپ ھنکین ءَ پزل نامیں مردمے ءِ لوگبانک نورجان ء ھُدابکش زورانسری آوار جتگ اَت کہ انگت بیگواہ اِنت۔
نورجان ءِ زورانسری بیگواھی ءِ بگیری ءَ مردماں زھرشانی کنان ءَ ھوشاپ ءَ سی پیک دگ بند کرتگ زھرشانی انگت برجاہ اِنت۔
ھمے وڑ ءَ پنجگور ءِ ھند گچک ءَ پاکستانی لشکر ءَ 25 اپریل ءَ شاہ بی بی ءُ شھزادی آوار جنگ ءَ پد بیگواہ کُتگ اِت اَنت کہ داں انگت آیانی درگت ءَ ھچ پئیمیں اھوال نیست۔