نبشتانک: کجام ووٹ ءِ گپ ءَ جن ئے
نبشتہ کار : سر مست بلوچ
دی بلوچستان پوسٹ
کجام ووٹ ءِ گپ ءَ جن ئے ھمے ووٹ ءِ کہ اکتر پارلیمنٹ ءَ سردیں گوات ءِ چیر ءَ ساہ زور اِیت۔ کجام ووٹ ءِ گپ ءَ جن ئے ھمے ووٹ ءِ کہ مالک پیتی ءَ پُر کنت بلوچانی گساں آس ءِ باھوٹ کنت۔
کجام ووٹ ءِ گپ ءَ جن ئے ھمے ووٹ ءِ کہ اکتر پارلیمنٹ ءَ فوج ءِ ھق ووٹ پہ وشی دنت۔ کجام ووٹ ءِ گپ ءَ جن ئے ھمے ووٹ ءِ کہ زبیدہ جرنل ءِ گاڑی ءِ سیٹ ءَ آسودگیں زند گوازینگ ءَ دست گٹِّ اِنت۔
کجام ووٹ پنڈ کیت مئے گِس ءِ دپ ءَ کجام شرم ءَ کیت دو زالبول پاکستانی لشکر ءِ دست ءَ آوار جنگ بیت ھمے دو تل ءُ دو پوستیں مردمانی گوش ءَ مورے نہ وارت ھرام بات، ھمے کاینت ووٹ پنڈ انت وت ءَ را دور بدارے اے زوراکیں مردماں بلاھیں نادراھی ءَ مان پتاتگ اے بازینے ھمے نادراھی ءِ امبازاں کن اَنت۔
اکتر مینگل ءُ ڈاکٹر مالک وت ءَ راجدوست گُش انت اے بلوچ ءِ ھونانی چوسگ ءَ ھیلدار اَنت اکتر مینگل جزباتی داب ءَ کیت دو دانک گُش ایت کہ من بلوچ ءِ دردوار اَنت اے چونیں درد واری یے کہ تئی مات ءُ گوھار دگّانی سر ءَ کم شرپ کنگ بنت سندھ ءِ بُنجاھی شھر کراچی ءَ بے گواھیں کھول ءِ مردم یک یک ءَ گرم ءُ جَل ءَ مھلوک ءِ دیم ءَ آوار جنگ ءُ بیھار دیگ بنت گڑا نوں من اکتر مینگل ءُ ڈاکٹر مالک ءَ چونیں راجدوستے سرپد بہ باں۔
ڈاکٹر مالک بلدیاتی گیچین کاری ءَ گلائیش اِنت ھچ سیاہ تپ ءَ نہ گپتگ مالک ءِ جند ءِ شھر تربت ءَ بیگواھیں زالبول ھبیبہ پیرجان ءُ نورجان ءِ کھول (ڈی بلوچ) دگّ ءِ سر ءَ ننداک جن اَنت ءُ زھرشانی کن اَنت پرچہ ترا پاد نہ بَر انت زاناں گوشاں چہ کَرّ ءُ چمّاں چہ کرکینگ ئے شمارا سرپد کنگ لوٹاں ھمے ڈاکٹر مالک وھدیکہ ءِ پاکستانی لشکر ءِ چیردستی ءَ سوبمند کنگ بیت گڑا ڈاکٹر مالک پاکستانی لشکر ءِ ھمراھی ءَ کم کم ءَ ھزارانی کَچ ءَ پاکستانی لشکر ءَ کار ایت تیوگیں کیچ ءَ لشکر ءِ بُنجاہ جوڑ کنت۔
ڈاکٹر مالک ءِ دور ءَ گوادر ءُ تربت ءَ بلوچی وانگی بھا کنوکاں لشکر بیھار دنت کہ اِدا میجر مجید ءِ کتاب ءِ سرا بندش لگ اِتگ ھر کس چُشیں وانگی اِیر کنت آ وتی زمہ وار وت اِنت مرچی شما مُچ بلوچ سرپد ئے کہ تمپ گومازی مند آواران جھاؤ ءُ مشکے ءَ ھمے ڈاکٹر مالک بوتگ کہ ایشی ءِ ھکمرانی ءُ ھاکمی ءِ وھد ءَ ھزاراں بلوچ ءِ گس مان دارگ بوتگ اَنت ھزاراں مھلوک بے گس کنگ بوتگ اَنت جھاؤ ءَ آواران ءَ بازیں مھلوک لڈینگ بوتگ آوانی گِس پاکستانی لشکر ءَ بُنجل جوڑ کتگ اَنت۔
اکتر مینگل اسلام آباد ءَ کیت ھمے اسلام آباد ءَ یک نیمگے بلوچ نودربر نشتگ اَنت دومی نیمگ ءَ اکتر مینگل گوں (مسلم لیگ نون) ءِ بزانکہ بلوچ کُشیں ٹولی ءِ ھمراھی نند ایت وتی بُنجاھی سیٹانی ھاترا دست گٹِّ بیت کہ من گوں بلوچ نودربراں نشت نہ کناں گڑا اکتر مینگل ءَ پندل سازی ھمے پاکستانی (مسلم لیگ) ءُ (پی ٹی آئی) ءَ چہ ھیل کتگ اکتر ھچبر بلوچ نودربرانی درد ءَ وتی درد سرپد نہ بیت پمیشکا اکتر مینگل بلوچ نودربر ءِ درد ءَ وتیگ نہ کنت کہ آئی ءِ ھیش ءُ نوش ءِ زند پہ وش دلی نہ گوز ایت۔
من اکتر مینگل ءُ ڈاکٹر مالک ءِ سیاسی ٹولی ءَ یک دُز ءُ ڈنگانی ٹولی سرپد باں وھدیکہ ھُورت چاری بہ بیت گڑا ھرودکیں سیاسی ٹولی منی نزّ ءَ سیاسی گَل گشگ نہ بنت چیاکہ ایشاں سدانی کَچ ءَ ریاستی لشکر ءِ چیر دستی ءَ کُشندہ ٹولی جوڑ کتگ کہ بلوچ ءِ کُشت ءُ کوش ءَ ھوار اَنت۔
ووٹ پنڈ ھزار رنگ ءَ پوست ءَ لگوش اِیت اے باز ھنر زان اَنت پھریز بہ کن اِت اے ملا روباھی ءَ زبر انت تئی دیم ءَ ترا رد مہ دے اَنت بلوچی بتلے جن اَنت کہ کُچک ءِ لِٹک اِنت تچک نہ بیت اِدا پہ بلوچ ءَ ھچ پشت نہ کپتگ اگاں ایشانی ھمراھداری برجم دارگ بوت بزاں راج وتی پاداں وت گُڈگ ءَ اِنت۔
اکتر ءُ مالک ءِ کجام کسّہ ءَ دیم ءَ بیاراں کہ آئی ءِ تہ ءَ بلوچ راج ءِ سودائی ءِ درور نیست اے مُچ جیڑاھانی بابت سرپد بوئگ ءُ ایشی ءَ چہ ابید دُز ءُ ھونیگانی ھمراھداری کنگ گڑا مارا مئے اندر ءِ بچ اِتگیں بلوچ ءِ گیرت ھزار بر اِیر جنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔