نبشتانک: کامریڈ گنجل ءِ تھتال
نبشتہ کار: ھلیل بلوچ
دی بلوچستان پوسٹ
ھمے کہ رولہ ءِ ساھت کئیت من سکّ بے تاھیر باں اگاں تھنا بہ باں گُڑا چو گنوکانی وڑ ءَ گوں وَت گَپ جن آں اگاں سنگتاں گوں یکجاہ نندوک بہ باں ھم من انچو مُونجا باں کہ گیشتر سنگت منی مُونجائی ءَ مار اَنت ءُ جُست کَن اَنت کہ تَو پرچا مُونجایے؟ گوں من ھِچ پسّو نہ بیت۔
منی جِند ءِ ھیال اِنت کہ اے رپتگیں سنگتانی زپتیں زھیر اَنت کہ من ءَ بے تاھیر کَن اَنت اَنّوں ھم رولہ ءِ وھد اِنت کوھے ءِ ٹُلّ ءَ نِشتگ آں ءُ اے دانکاں نویسگ ءَ آں چِد ءُ پیسر من وتی رولہ ءِ وھد ءِ مارِشت ھچبر رودپتر ءَ درانگاز نہ کُرتگ اَنت مروچی سنگت “پیرو” ءَ گُشت کہ “تو بُرو بُرز ءَ بہ لگّ ءُ علاقہ ءَ دُورگِند کَن باریں چے اَست چے نیست ؟” من چہ اوتاگ ءَ دَر کَپت آں دُورگِند کنان ءَ مستریں کوہ ءِ ٹُلّ ءِ نیمگ ءَ جُنزان بوت آں وھدے کوہ ءِ ٹُلّ ءَ رس اِت آں، علاقہ دُورگِند کُت داں روچ ءَ زردی یے مانشان اتگ روزرد ءِ شینک چو سوچّن ءَ منی جبین ءَ سُمبان ات اَنت برے اَرس شیپ گِر انت برے آسے منی اَندر ءَ زراب دَنت بَلے پَد ءَ آجوئی ءِ جُنز ءِ لوٹ ءُ گزر دِل ءَ کاینت گُڑا وتی رپتگیں بیل ءُ ھمبلانی سر ءَ پَھر بند آں۔
مروچی کامریڈ مزار ءِ بے تاھیریں تْرانگاں کپتگ آں کہ مُدام رولہ ءِ وھد ءَ من ءُ کامریڈ ھمے کِشک ءَ پہ دامگ (نیٹورک) ءِ ھاتر ءَ رھادگ بوتگ ایں مروچی نہ کامریڈ ھمراہ اِنت نَئیکہ ھما جاگہ ءَ نیٹورک کار کَنت۔ تھنا کامریڈ ءِ کُچّلیں زَھیر اَنت کہ ھمراہ اَنت۔
“اے رولہ ءِ کہ ساھتاں”
“بہ ننداں وھدے گوں وتا”
“مہ جیڑاں ھِچّ”
“مہ نوشاں ھِچّ”
“بلے پَدا خُمار باں”
“ابیتک باں مُلور باں”
“تئی تْرانگاں زَران باں”
“جبین ءَ آسے روک بیت”
“شہ چماں ارس رچان بنت”
“بلے پدا پہ پَھر ءُ شان”
“سرا وتی من چِست کناں”
“ھُدا ءِ شُگر ءَ سد بر ءَ”
“گران ءُ کندگے جناں”
“کہ مئے مزار زندگ اِنت”
“مزار ملگُزار بیت”
“مزار آشک ءُ مَلنگ”
“مزار فدائیانی رنگ”
ھمُک یک روچ دَر دومی ءَ کامریڈ ءَ را نیٹورک ءَ رَوگ بوتگ، گُڑا مُدام من ءَ ھمراہ کُرتگ ئِے کہ بُروایں نیٹورک ءَ کار اَست ھالانکہ جندئِے سکّ بیمار بوتگ، بلے ھمے کِشک ءُ راھاں گندل ئِے گون بوتگ اَنت رولہ ءِ وھد ءَ من ءُ آ در کپتگیں گُڑا راہ ءَ برے یک بُنگپّے ءِ سرا ما باوست کُرتگ بلوچ ءِ باندات چون بیت چاگردی جیڑہ چے چے اَنت سِلاہ بندیں پارٹی ءَ گوں چاگردی جیڑھاں چنچو کار بندگی اِنت یا نہ اِنت بی ایس او آزاد ءِ سیاست کُجا سر بوتگ بلوچ ءِ وانندھیں ورناہ چے وڑ ءَ وتا رکّینت کن اَنت ءُ جُنز ءِ ھمراہ بوت کن اَنت۔
بی این ایم چے وڑ ءَ کار کنگ ءَ اِنت، کُجام وڑ ءَ وتی کاراں شرّی ءَ کُت کَنت بلوچ سِلاہ بندیں گَلانی تَھ ءَ سنگت ءِ بھرتی کنگ ءِ ‘معیار’ چے اِنت کُجام وڑ ءَ ما چہ دُژمن ءِ پندلاں وت ءَ رکّینت کنیں دِگہ دِگہ۔
2013 ءَ اولی بر ءَ لسبیلہ یونیورسٹی اوتھل ءَ گوں کامریڈ مزار ءَ دوچار کَپت آں کہ بی ایس او آزاد اوتھل زون ءِ کابینہ ءِ گرگ ءَ آھوکیں سنگتانی ھمراہ اَت پد ءَ راج ءُ راجی جُنز ءِ کار اِت اَنت ءُ ریاست ءِ زوراکی اَت کہ منی ھاتر ءَ شھر ءَ نندگ ءُ کار کنگ گْران اَت گُڑا من دیم پہ بلوچستان ءِ سْرمّگیں کوھاں در کَپت آں ھمے نْیام ءَ مزنیں وھدے گوں کامریڈ ءَ دوچار نہ کَپت آں بلے یکّ نزّیکی یے اَست اَت نزاناں زِرد اَت یا اَرواہ اَت کہ مُدام کسّے نہ کسّے ءَ کامریڈ ءِ ھال داتگ۔
2018 ءَ وھدے من پہ کارے ءَ جاگھے شُتگ اِت آں یکبرے پد ءَ گوں مَزار ءَ ڈیکّ وارت گُڑا ما وتی زپتیں زھیر تالان کُت اَنت دو ماہ یکجاہ اِت ایں کہ اناگت ءَ یکّ ءُ دو روچ کامریڈ گِندگ نہ بوت گُڑا من اِد ءَ اود ءَ جُست گِپت کہ راج ءِ دیوانگ ءُ ملنگیں مزار کُجا رَپتگ بلے کسّے ءَ گوں یکّ ءُ ٹکّیں ھال نیست اَت تھنا ھمے گُشگ بوت کہ کامریڈ شُتگ۔
2019 ءَ وھدے من واتر شُورّ پارود ءِ کوھاں آھت آں چاراں مَزار ھمد ءَ گوں سنگتاں یکجاہ اِنت ھما مزار من دیستگ گوں نزوریں بالاد ءَ پِگر ئِے گیشتر مُھکم اِنت۔
گوں راجی جُنز ءَ ھمنچو مکلسیں کہ گوں وتی نزیہ ءَ شَتکیں تَلاراں ھم ٹُکّر ٹُکّر کُت کَنت سرزمین ءِ انچیں آشک چوکہ شئے مُرید پہ ھانی ءَ فرھاد پہ شیرین ءَ پنّھوں پہ سسّی ءَ مَست پہ سَمّو ءَ نزاناں کامریڈ مزار ءَ دِگہ کئے ءَ گوں تَشبیہ بہ دَے آں کامریڈ ءَ گوں بھگت، چی، لینن، فینن، ھوچی، ماؤ، منڈیلا، گوں کَسّے ءَ تَشبیہ دات ھم نہ کن آں۔ پرچا کہ اے وَت “کامریڈ مزار” اِنت ءُ پِگر ء گَنجل ءِ سرکماش اِنت۔
مارا ءُ مئے راج ءَ را بھگت، چی، لینن، فینن، ماؤ ءُ منڈیلا ءُ دومیانی زلورت نہ اِنت گنجلیں مَزار ءِ وڑیں کارستانی زلورت اِنت گنجل ءِ وڑیں سنگتانی زلورت اِنت کہ آئی ءِ سر ءَ ما پَھر بہ بنداں پَد ءَ مزنیں وھدے کامریڈ ءِ ھمرائی ءَ ھمے جَل ءُ شیپانی تَھا بلوچ سرڈگار ءِ دومی سرمتابیں سرمچاراں گوں ھوار ما ھم جُنزان اِت ایں ءُ وھد ھم جُنزان اَت تَوانا پِگریں کامریڈ مزار ءَ نِندگ ءِ نام نزانت مُدام جُنزان اَت۔
کامریڈ مزار بلوچ راجی جُنز ءِ ھما کارست اَت کہ جند ئِے لاگر نِزور دوئیں دست ئِے پْرشتگ اِت اَنت کہ ھرکار ءَ لس مردُم ءِ وڑ ءَ کُرت ئِے نہ کُت۔ بلے بلوچستان ءِ پُلگدیں ھاک ءِ شَیدا اَت۔ پمشکا وھدے چہ بی ایس او ءَ فارغ بوت گُڑا باز سنگت ءَ گُشتگ اَت کہ تَو ڈنّ ءَ دَر کَپ ءُ سیاست کَن، بَلے ھاک شَیدائیں زمین ءِ کُنگریں بچّ کُجا وتی مِسک ءُ مھلبیں سرزمین ءَ یل کُت کَن اَنت۔ ھمے وڑ ءَ کامریڈ مزار ءَ شُورّ ءِ دلبند ءَ را پہ وت ءَ ھنکین گْچین کُت۔
اگاں کامریڈ ءِ پند ءُ واری ءُ بزّگی ءِ کسّھاں بیاراں گُڑا منی رودپتر ءِ تَھ ءَ جاگہ نہ کَن اَنت بلے یک گَپّے پہ سِتک گُشگ لوٹ آں کہ کامریڈ مزار ءَ نادْرائی ءُ دومی بَھانہ کنوکانی راہ ءُ دَر بند کُرتگ اَنت کہ نوں کَس گُشت نہ کَنت کوہ ءِ نندگ گْران اِنت البت پہ سنگینیں جُھدکارانی ھاتر ءَ کوہ ءِ نندگ چہ بَھشت ءَ کم نہ اِنت۔
23 ستمبر ءَ من چہ کارے ءَ واتر آھتگ اِت آں گُڑا شام ءِ وھد ءَ من کامریڈ ءَ گوں نیٹورک ءَ شُت نہ کُت، پمشکا کامریڈ ءُ مھروان سرگِپت اَنت شَپ ما گْوازینت 24 ستمبر ءِ سُھب ءَ پنچ ءَ من چہ واب ءَ بُست کُت ءُ سنگت ھم پاد کُت اَنت کہ ھمے وھد ءَ نیٹورک ءِ نیمگ ءِ کوھاں تیراں ٹَک ءَ کُت ءُ جھلی نیمگ ءَ ھم دژمن ءَ مارا گیرا داتگ اَت گُڑا ما جنگ دَیان ءَ درکپتیں بَلے کامریڈ پہ مُدامی چہ ما گِستا بوت اگاں پَشت کَپتگ گُڑا کامریڈ ءِ پِگر اِنت کہ مُدام مئے اَرواہ ءَ تَوانا کَنت کامریڈ ءِ گِستائی ءَ بازبر ءَ دِل ءَ گْریوگ لوٹ اِتگ تاکہ اَرواہ تاھیر بہ گیپت من وتی جاگہ ءَ بلوچستان ءِ زِر ءَ ھم داں چنچو روچ ءَ گْریتگ لیاری ءِ دمکاں داں چنچو روچ ءَ پُرس ءِ پَتّر تالان کُرتگ۔
کَپوت ءُ شانتُل ءُ سیسّواں داں چنچو روچ ءَ موتک اَلھان کُرتگ بلے من نہ گْریتگ پرچا کہ ھکّ ءِ راہ ءَ شھید ءُ کُربان بوتگیں ھمراھاں پہ نہ گْریوگ ءِ فلسفہ یاد آھتگ باز بر ءَ کندگ ءِ جُھد کُرتگ کہ سنگت ءُ مھلوک ھمے سرپد بہ بنت کہ پریشان نہ آںبلے تھنا یک بے بْراھیں بچکندے لُنٹانی سر ءَ آؤرت کُرتگ دِگہ ھِچّ چھرگ ءُ پیشانی ءِ کْرچکاں چہ الّم زانگ بوتگ کہ اے وسّاچ ءُ بے بْراھیں بچکند ءِ پُشدر ءَ چنچو دَرد پیوند اِنت ھما دَرد کہ زُبان ءِ سر ءَ بیان کنگ مہ بنت ھما دَرد کہ چیر دَیگ ءَ گوں پدّر بہ بنت ھما دَرد کہ چیھانٹ بہ پرمائیت بلے کامریڈ ءِ درد دُنیا ءِ دْرستیں دَرداں چہ تورینوکیں دَرد اِنت اگاں اے دَرد برداشت بُوّگ ءَ اِنت گُڑا ایشی ءِ سَوب پِگر ء گنجل اِنت کہ من مُدام دِل ءَ جزم آں کہ کامریڈ مزار زندگ اِنت گنجل آپریشن ءِ فدائیانی دْروشم ءَ زندگ اِنت زگرین ءِ دْروشم ءَ زندگ اِنت گنجل ءِ ساھِگ ءَ پِگر زوروکیں سرمچارانی دْروشم ءَ زندگ اِنت بلوچ راج دَپتر ءِ تاکانی تَھا زندگ اِنت دُژمن سَتر وتی وَس ءُ واک ءَ بجنت بلے گنجل ءَ کُشت نہ کَنت۔ پرچا کہ کامریڈ گنجل تھنا یک کارستے ءِ نام نہ اِنت کامریڈ پِگرے ءِ دْروشم ءَ زندگ اِنت گنجل ءِ کاروان رَوان اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔