نبشتانک: ماتی منی مات مکّھیں (لُمہ مھناز)
نبشتہ کار: زیردان بلوچ
دی بلوچستان پوسٹ
تمردیں بچّانی مات ءُ مزن پِگر ءُ راجی چیدگیں رھشُون واجہ ڈاکٹر اللہ نذر ءِ مھنازیں گْوھار ( لُمہ مھناز ) کہ آئی ءَ اِے دْراج کشّیں راہ ءِ تَہ ءَ ھزاراں درد ءُ دور وتی کوھیں باتِن ءَ سگّ اِتگ ءُ جاہ داتگ اے ھبر تچکیں راستی یے کہ بلوچ ماتاں ھما کُربانی داتگ اَنت کہ یک زندگیں ءُ راجدوستیں ماتانی راجدپترے مارا پہ وانگ ءَ دست کپ اِیت۔
مھنازیں مات کہ آئی ءَ پہ سرڈگار ءُ راج ءِ وتواجھی ءَ گْراں بھائیں دیمونی داتگ، اِے دیمونیاں ما ءُ شُما مات ءِ تنگوئیں برات ءُ کُنگریں بچّانی دْروشم ءَ گِند اِیں۔ جنگولیں شھید شھیک جان، شھید زاکر جان ، شھید سالونکیں مسلم جان کہ مات ءِ اَرواہ ءُ ٹیلگ (بچ) بُوَگ ءِ شرپے رَس اتگ اَت ءُ مسلم جان گوں ھوار سِنکدر جان ھم وتی اَرواہ ءَ دوست ندار اِیت کہ سکندر جان مھنازیں مات ءِ براتک زھک اَت۔
ھمے داب ءَ مھناز ءُ ملکنازیں مات ءِ لوگ ءِ اندر ءَ دیمونیانی مزنیں لڑے گِندگ ءَ کَیت کہ آئی ءِ تَہ ءَ مزن شرپیں سر مات مھناز ءِ کوپگ (برات) ماسٹر واجہ سپرھان (خان) گوں وتی کوپگیں برات سنگت اَلی نواز گوھر ءَ پہ گُلزمین ءَ ندْر بُوَگ ءَ چک ءُ پد نہ بَہ اَنت، بلکیں وتی اَمبوئیں ھوناں گوں گُلزمین ءَ بانوری شارے سر ءَ دینت۔
اَگاں ما مروچی ھستیں راجی راجدپتر ءَ بِہ وان اِیں گُڑا مھنازیں مات ءِ بَچّ ءُ کوپگیں بِراتاں ھوار آئی ءِ بازیں سْیاد ءُ وارِسے پہ راجی وتواجھی ءِ جُھد ءَ کُربان بوتگ اَنت۔ اَگاں من ھم بہ لوٹ آں کہ آھانی نام ءَ وتی نزوریں نبشتانک ءِ بَھر بہ کن آں، بوت بِہ کنت سرجم ءَ من وتن پھازیں بچّانی ناماں لَڑ کُت مہ کن آں۔
پمیشکا! من چہ وتی ملوک ءُ مزن جگریں مات مھناز ءَ پَھِلی لوٹ آں کہ پہ تئی کوھیں بالاد ءَ من ءَ آ لبز کماھگی اِتاں، بوت کنت منی زانت ءُ سسّا ءَ آ لبز نیست ات اَنت کہ راجی ماتانی ستاشانی ءَ کُت بِہ کن آں، بلے اے شُمئے دابیں تلار جگریں ماتانی مُھکمیں ھمراھداری ءُ مزن جگری انت کہ منی گونگیں پہ راج ءَ بے سِیتّیں بَچ شھیدانی پِگر ءَ گوں ھمگرنچ اِنت ءُ وتی نزوریں پاداں گام جنگ پرماھگ ءَ اِنت کہ منزل مئے دیم ءَ اِنت۔
گُڈّسر ءَ ھمے گْوش آں کہ مکھیں مات مھناز ءَ ھوار کُلیں راجی شھیدانی ماتاں پُرمُھریں سلام کہ آھاں وتی چمّانی نور پہ راجی باندات ءِ ھاتر ءَ کُربان کُتگ اَنت، من پہ جزم گوش آں کہ آ روچ دور نہ اِنت بلوچ راج ما گیدی ءِ دمکاں وتی ابد زِندمانی (آجوئی) ءِ جار ءَ پِرّینیت ءُ شھیدانی گْراں بَھائیں واب مانا ءُ سرجم بَہ اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورکایشانی منّوک بہ بیت یا اگاں اے گل ءِ پالیسیانی درشانی اِنت۔