پری اِستان
نبشتہ کار :زرینہ بلوچ
دی بلوچستان پوسٹ
اللہ ءَ دگنیا پہ یک ڈول ءُ نازے ءَ جوڑ کُتگ دگنیا ءِ توک ءَ بنی آدم، دلوت، کوہ، ماہ، دریا، باگ ءُ دگہ بازیں ڈولداریں چیز ھوار کتگ اَنت ءُ یک وشیں جھانے جوڑ کُتگ گِند ئے اے دگنیا ءِ توک ءَ ھزاراں مُلک ءُ میتگ ھست اَنت ءُ ھر میتگ گوں وتی ڈولداریں کسہ ءُ توسیپاں زانگ بیت ھمے پیم ءَ پری اِستان نامیں میتگے ھست کہ اے میتگ مھر، دوستی، مھمانداری ءُ میار جلی ءِ نام ءَ گوں زانگ بیت اے یک انچیں میتگے کہ میتگ ءِ دْرستیں مردم وت ماں وت دوست ءُ تپاک اَنت یکے دومی ءِ ماں سکی ءُ سُوری ءَ ھمراہ انت بلے مرچاں پری استان گْوش ئے یک چمّے ءَ گپتگ پری اِستان ءِ وشی گوں گماں بدل بوتگ انت۔
من شُمارا پری اِستان ءِ کسہ ءَ گْوش آں گوں، پری اِستان ءِ توک ءَ زورکیانی بابت ءَ سرپدی دیاں، پری اِستان انچیں سرزمینے ءِ نام اِنت کہ اود ءَ انوں رستر ءُ دِرندگانی راج اِنت، ایشاں پری اِستان پہ زور ءُ زبردستی گپتگ اے انچیں رستراں ایشاں گوں کسی سر مہ کپات بلے بد بھتی ءَ پری اِستان ءِ مردمانی سر گوں ایشاں کپتگ۔
پری اِستان ءَ ھمُک مات تُرس ءِ آماچ انت کہ اگاں من وتی چُکاں پہ وانگ ءُ دگہ کارے ءَ ڈن ءَ روان بدے آں باریں واتر کیت یا گار ءُ بیگواہ بیت۔ زاناں پد ءَ آئی ءِ جون ماں گیابان ءَ دست کپ ایت یا کہ اِنّا؟ گِند ئے اے انچیں راستراں ایشانی توک ءَ مھر ءُ دوستی ءِ نامیں چیز نیست، اے گوانزگی تپلاں بہ گر داں اسکول ءُ کالج ءِ ورنایاں آوار جن اَنت ءُ آزار کن اَنت اے کس ءَ نہ بکش اَنت مات پہ بزگی وت گوں گژن ءَ زند گْوازینگ ءَ اَنت پہ چُکانی شریں زند ءِ دیگ ءِ ھاتر ءَ بلے اے رستر مات ءُ پتانی بزگی ءَ نہ چار اَنت۔
پت ءُ مات ائید ءَ پہ وت ھچ چیز نہ زور اَنت کہ مئے چُکانی دل ءِ واھگ سرجم بہ بنت ءُ زھگانی ھر تلب پیلو بہ بنت۔ مات ءُ گْوھار مزوری گد دوچ اَنت، کِشت ءُ کشاریں ڈگاراں کار کن اَنت، واجھانی لوگاں رزانان شود اَنت کہ چار کلدار بہ رس ایت ءُ ھمے چاریں کلداراں پہ وتی چُک ءُ براتاں شھر ءَ روان دے ایں دانکہ اود ءَ دُوریں ھلک ءُ دیار ءَ مئے چُک ءُ برات تنگ مہ بیت۔
اود ءَ شھر ءَ ھمے لاڑوکیں ورنا ھم سے وھد ءِ ورگ ءِ بدل ءَ دو وھد ءَ ورگ وارت کہ دانکہ من ءَ کم ھرچ بہ بیت ءُ لوگ ءِ مردم پہ منی ھاتر ءَ دگہ جنجال ءِ دیمپان مہ بنت چُک اود ءَ دُوریں شھر ءَ گوں ھزاریں جیڑہ ءُ جنجال ءَ جنگ کنت ءُ بس وتی ھب ءُ واھگ ءَ گوں وانگ ءَ کنت کہ منی باندات رُژنا بہ بیت ءُ پہ وتی بزگیں مات ءُ پت ءُ گْوھاراں کوپگے جوڑ بہ بان ءُ آیاں شریں آسراتیانی زندے بہ بکش آں۔
گْوھاراں وتی لاڑوکیں بْرات پہ چارگ ءَ دل نہ بنت، یک روچے چہ وتی بْراتاں جتا بوت نہ کن اَنت بلے وھدے کہ ھمے ورنائیں بچ پہ وانگ ءَ در کپ اَنت ءُ رو اَنت پد ءَ چہ اود ءَ اے زالمیں رستر ھمیشاں زور لٹ دیان ءَ بر اَنت ءُ یونیورسٹی ءُ کالجانی بدل ءَ آیاں آزارجاہ ءُ زندان لٹ شاپی کن اَنت۔ بزگیں مات ءُ گْوھار برے یک جاھے وتی بْرات ءُ چُکانی شوھاز کنگ ءَ در کپ اَنت، روچ، ماہ ءُ سال گوزان بنت بلے آ انگت واتر نہ بنت ءُ مات ءُ پت اے ھبر ءَ ھم سھیگ نہ اَنت آ باریں مئے تنگوئیں بچّ مرتگ اَنت یا زندگ اَنت۔ ھمے چُک کہ نوک گام جنگ ءَ کپتگ کسانیں ٹپے کہ پُر بوتگ ئِے گش ئے مات ءِ جبین بن گپتگ، دل ٹکر ٹکر بوتگ، اگاں ھمے تپل ءَ گرمیں نارشتانی توک ءَ دست دور داتگ گُش ئے آ ساھت پہ مات ءَ مھشر بوتگ بلے مروچی کہ رستگ ءُ ورنا اَنت ءُ گار اَنت مات اے ھبر ءَ ھم جیڑ ات نہ کنت کہ چک کُج ءَ اَنت، کجام رنگ ءَ اَنت۔ بس مات برے مان پرس کلبانی دیم ءَ ءُ برے مان گاریں مردمانی بنجل ءَ وتی بچ ءِ شوھازگ ءِ ھاتر ءَ در پہ در اِنت۔ اے ودار ھلاس نہ بوکیں ودار اَنت ءُلھتیں انچیں ودار بس تھنا ودار بنت ءُ پشت کپ اَنت ءُ مردم ءَ چہ تہ ءَ روچ پہ روچ وران کن اَنت ءُ بس-
باریں چنت مات ءَ گوں گوں چُک ءِ ودار اے امروز یل داتگ، باریں چنت بْرات وتی بْراتانی شوھاز ءَ وت گار بوتگ، باریں دگہ چنت ورنا ھمے توارانی چست کنگ ءِ پشت ءَ وت بے توار ءَ گار کنگ بوتگ بلے اے درد تھنا یک لوگے ءِ درد نہ اِنت، اے درد تھنا یک میتگے ءِ درد نہ اِنت اے درد سرجمیں راج ءِ درد اِنت۔ اگاں تو ھاموش بہ ئے تئی باریگ ھم کیت یا گپ کن ئے ھم تئی باریگ کیت گڑا گھتر ھمیش اِنت گپ کن ءُ گار بہ بو کہ پہ تو جوانتر اِنت پد ءَ باندا کسے چوش مہ گوش ایت کہ ایشی ءَ پہ کس ءَ گپ نہ کتگ ءُ مرچی وت گار اِنت گُڑا ما پرچا ایشی ءِ ھاتر ءَ توار چِست بہ کن ایں۔
بیا مرچی کول کن ایں کہ اے زلم ءِ ھلاپ ءَ پاد کا این ءُ توار چست کن ایں پرچا کہ یک مردمے ءِ بیگواھی تیوگیں لوگ ءِ وشیانی بیگواھی اِنت، سرجمیں بلوچ راج ءِ وشیانی بیگواھی انت۔
اگاں ما لوٹ ایں کہ پد ءَ پری اِستان ءِ مردم وش ءُ وش دل بہ بنت گڑا مارا وت ماں وت تپاک بوگی اِنت زلم ءِ ھلاپ ءَ یک توار بوگی اِنت ءُ مارا یکے دومی ءِ کوپگ جوڑ بوگی اِنت۔
شالا بلوچ راج یکمُشت ءُ وت ماں وت ھمکار بہ بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔