سمو ءِ نام ءَ نمدی یے
نبشتہ کار: پِرائیڈ آپ بلوچ
دی بلوچستان پوسٹ
دُروت ءُ دُراہ بات ئے منی زند ءِ نیمرانیں ھمسپر سمّو! من زان آں اے وھدی تو بے سبری ءَ گوں سُھب ءِ وداریگ ئے کہ باریں کدی روچ ٹِک دنت ءُ تو اے وشیں روچ ءَ وت ءَ پہ دابے سینگار ئے من اے ھم زان آں کہ اے شادیں روچ ءَ تو چہ من ھچ وڑ ءَ بے ھال بیت نہ بَہ ئے ءُ اولی ائید مُبارک بات ءِ کُلوہ ءَ پہ من دیم دے ئے سمُّل، پھِل کن من ءَ باید نہ اِنت کہ اے پیمیں شادیں نوبتاں من ترا گمیگ بہ کن آں، بلے راستی ایش اِنت کہ منی اے کاگد ءِ نویسگ ءِ مول ءُ مُراد تھنا ھمیش اِنت کہ ترا وتی گُڈی جواب ءَ بدے آں تو یات بَہ ئے اول بندات ءَ کہ ما مھر کُتگ اَت گوں یکے دومی گُڑا تو من ءَ باز رند ءَ پُرس اِت “پِرائیڈ، تئی زندگی توک ءَ چہ من چے ارزشتدارتریں چیز ھست، یا چوشیں چیزّے ھست کہ ترا چہ من بہ پول ایت؟-
پد ءَ مُدام منی پسو ھمیش اَت “آ روچ پہ من ءَ میا آ اَت کہ ترا چے گیش چیزّے پہ من ارشتدارتر بہ بیت ءُ من ءَ چہ ترا دور بہ کنت” تو گُڑا منی پسّہ ءِ اِشکُنگ ءَ سک گل ءُ بوت ئے، من ھم آ وھد ءَ ھمے جیڑ اِتگ اَت کہ مئے مھر ءِ میان ءَ ھچ چْوشیں جیڑہ مئیات کہ مارا سِند ءُ سید بہ کنت من ترا اے پسہ گوانکو ءُ کلوہ ءِ دْروشم ءَ ھم دیم دات کُت کُتگ اَت بلے من زان آں کھروار تو اے گپ ءَ سگ اِت نہ بَہ ئے ءُ پد ءَ باز پِریات ءُ واہ زار کن ئے کہ من ءَ یل ءَ مہ کن، چوشیں گوک پْروشیں سپراں سر مہ گر ، من ءَ پد ءَ یکے تئی اِنّا کنگ ءُ دومی تئی چمّانی ارس ھچ وڑ ءَ برداشت نہ باں ھمے واست ءَ اے کاگد پہ تو راھی کُتگ ھُدا بہ زانت ترا سر بیت یا ناں بلے منی دل کمُّک ایمن بیت منی ارواہ سمُّو، یکبرے پد ءَ پھلّی لوٹان ءُ گْوش آں کہ من ءَ یار بہ بکش کہ من تئی زند ءِ ھمسپر بیت کُت نہ کُت پرچاکہ من یک انچیں راھے پہ وت درچتگ کہ بگِند ئے واتر ھم مہ باں، دومی ایش کہ ترا ودار ھم پرمات نہ کن آں پرچاکہ من زان آں من ءَ چْوشیں بھت ءُ تال ءِ نیست کہ من پد ءَ واتر بہ باں۔
منی جان، من چہ ترا سِدگ ھچبر نہ لوٹ اِتگ ءُ چہ ترا ھچبر پراموش بوت ھم نہ کن آں پرچاکہ تو منی زند ءِ یک انچیں کارستے ئے کہ من ءَ باز وشّی بکشاتگ بلے اے وھد ءَ ترا چہ گیش منی مات ءَ منی پہ کار اِنت، منی مات منی سرڈگاریں بلوچستان اِنت، منی راج چُکچینی بوگ ءَ اِنت ءُ آئی ءِ ننگ ءُ ناموس لگت مال بوگ ءَ اَنت، من لوٹ آں کہ وتی راج ءُ ڈیھ ءَ بہ پھاز آں چہ اِے زُلم ءُ زوراکاں-
ھما زوراک کہ نہ زانت چُکے یا کماشے، نہ زانت کہ زالبولے یا مردین آدمے، ھر وھدیکہ لوگے ءَ مان شان ایت گُڑا پُرسی ئیں آسے روک کنت ءُ روت تو سرپد ئے کہ منی راج ءِ تہ ءَ چْوشیں گِسے نیست کہ آئی ءِ بچے شھید کنَگ نہ بوتگ ءُ نیست چوشیں گِسے کہ یکے بیگواہ کنگ نہ بوتگ دُنیا ءِ اسلامی راج دْراہ اے روچ ءِ وشی ءَ منائین اَنت بلے گار اِنت ما بلوچ کہ مئے براس ماں زنداناں بند اَنت ءُ لھتے ماں کوہ ءَ گُژن ،بزّگی، تُنّگی،سردی ءُ گرمیانی دیمپان اَنت من ءَ منی مات ءَ ھوار منی کوھاں سری بْرات گْوانک جنگ ءَ اَنت کہ بیا کوپگ پہ کوپگ بو ءُ دُژمن ءِ دیم ءَ چو سیاجی ءِ کوہ ءَ مک بَہ ایں ءُ وتی راج ءِ چمّانی ھمُک ریتکگیں ارس ءُ ھیدانی جُست ءَ چہ دُژمن ءَ گر ایں۔
سمّو، تو وَ زانتکار ءُ وانِندیں مردمے ئے ءُ باید اِنت کہ اے چیز ءِ پِگر ترا ھم بہ بیت، باید تو منی مجبوری ءَ بہ زان ئے، تو وت شر سرپد ئے کہ وھدے گپ کیت ءُ نیلیں زرے پھازگ ءَ سر بیت گُڑا مردم چہ دْراھیں سْیادیانی سِندگ ءَ مجبور بیت سمُل، من ھزار مُراد داشتگ پہ وتی وتن ءَ اُمّیت اِنت کہ تئی دُوا من ءَ گون بنت ءُ من وتی مکسد ءَ سوبین باں ءُ یک روچے کیت کہ وتواجہ بَہ ایں۔
من زان آں اینکدر سرپد کنگ ءَ بابید تو انگت زنگ نہ جن ئے بلے پہ ھُدائیگی وتی گِلّھاں چو منی وڑ ءَ کاگد ءِ سر ءَ بہ نویس ءُ دیم دئے، من ءَ گوانکو مہ کن ءُ کلوہ دیم مہ دئے شالا سلامت بات ئے منی ارواہ-
تئی دوستیں دوست ءُ زمین ءِ شیدائی ئیں بچ: پِرائِڈ آپ بلوچ
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔