نبشتانک: ھمک مردم وتی کساس ءَ گھگیری کنت
نبشتہ کار: شھزاد اسلم
دی بلوچستان پوسٹ
منی ھیال ءَ زندگی ءِ مستریں المیہ آں چہ یکے ھمیش انت کہ درستیں مردم یک وڑ ءَ جیڑ ات نہ کن انت، یک وڑ ءَ کت نہ کن انت ءُ یک وڑ ءَ کت کنگ ءِ تاکت ھوں نیست انت کہ تاکت ءِ سیادی انسان ءِ سرجمیں چاگردی ردوم ءَ گوں بندوک انت، پمیشکا ھمک مردم ءِ زندگی کنگ ءِ وتی دابے ءُ ھمک مردم ءِ وتی کساسے۔
بلئے برے برے مارا سما بیت یا مارا گندگ ءَ کیت کہ لھتیں مردم چہ وتی داب ءَ ڈن یا چہ وتی کساس ءَ مستریں کار کنت ءُ پیش دار ایت۔ مارا اے وڑ اے ھاتر ءَ سما نہ بیت کہ آ مردم بن اسل ءَ چہ وتی کساس ءَ سر گوستگ یا چشیں ھچ وڑیں نوبت نیست کہ آئی ءِ درگت ءَ ما بگوْش ایں کہ اے چہ وتی کساس ءَ ڈن انت، بگندئے اے وڑ سما کنگ ءِ سوب مئے آ نوبت ءُ ھما مردمانی درگت ءَ ردیں یا وتساچیں لیکھے دارگ انت۔ بزاں ھچ چیز چہ کساس ءَ ڈن نہ بیت، ھرچیز کہ بیت گڑا بزاں آ وتی کساس ءِ توک ءَ انت ءُ ھمک مردم وتی کساس ءَ کار کنت۔
بلئے باز براں اے راستی ڈالچار کنگ بیت ءُ اشی ءِ سر ءَ بے سر ءُ پادگیں نگد کنگ بیت۔ چشکہ کسے اگاں نمیرانیں کارستے ءِ اکس ءَ وتی وٹس ایپ یا پیسبک ءِ اسٹیٹس بکنت گڑا نگد کنگ بیت کہ اے پیسبکی جھدکارے، اے راستی ءَ چہ ابید کہ بیست ءُ یکمی کرن ءَ چاگردی رسانکدر لس ھال ءُ ایوال ءُ ھیالانی درشانی ءِ یک مزنیں ءُ مھکمیں درے، یک کارستے اگاں یک انچیں راجی کردے پیلو کنت ءُ ابدمان بیت گڑا اے کدرتی ھبرے کہ ھمک مردم آئی ءِ کرد ءِ پشدر ءَ وتی گشاد ءَ جیڑگی بیت ءُ اے راستی کہ ھمک مردم ءِ سر ءَ آئی جند ءِ چاگردی گشاد ءِ ھساب ءَ دگہ دگہ وڑ ءَ آ کرد ءِ سان کپ ایت ءُ آ کرد دگہ کارست ودی کنت ءُ پمیشکا نمیران گوشگ بیت۔
اے یک چاگردی ءُ نپسیاتی پتّرے، پمیشکا اے وڑ گوشگ کہ پیسبکی جھدکار، اسٹیٹس والا کامریڈ یا لس تژنے رواج گپتگ کہ چادر والا کامریڈ ءُ دگہ باریں چے چے، منی نز ءَ اگل ءُ راستی ءَ چہ جتا ءُ گستا انت۔ منی نز ءَ کسے ءَ اگاں اے جاور ءُ نوبتانی تہ ءَ بلوچی چادرے مانپوشتگ آ وتی گشاد ءَ گھگیری کنگ ءَ انت۔ ھمے وڑ ءَ کسے ءَ اگاں یک راجی بامردے ءِ اکس جتگ، آ ھم وتی گشاد ءَ گھگیری کنگ ءَ انت۔ مارا زانگ لوٹ ایت کہ گھگیری وڑ وڑ ءَ کنگ بیت ءُ ھمک مردم وتی کساس ءَ گھگیری کنت۔ چے جایے کہ ما مردماں ایر بجن ایں ءُ آیانی نپری کرد ءِ سر ءَ نگد بکن ایں مارا مردم دلبڈی دیگی انت، کہ تئی نپری کرد تری آ رنگ ءَ جوان مہ بیت بلئے تو شر سان زرتگ، چیز کم کم ءَ مٹ بنت، یا الّم نہ انت کہ ما مدام مردماں ھال بدے ئے کہ ترا چے کنگی انت ءُ چے کنگی نہ انت، بس امینچکاں ما آیاں تژن مہ جنیں۔
تو یک شائرئے ءُ اگاں یک جھدکارے ءِ کرد ءَ ترا شئرے ءِ نبشتہ کنگ ءَ لاچار کت گڑا گھگیری کنگ ءَ ات، تو چاگردی رسانکدر ءَ ھوار ءُ تو یک راجی بامردے ءِ اکس دات، ترا زانگ لوٹ ایت کہ تئی کرد وتی کساس ءَ گھگیری ءِ دروشمے، یا تو لس مردمے ات ءُ ترا تئی راج ءِ سر ءَ بدیں جاوراں بس ادروکے جیڑگی کت، تئی جیڑگ ھم گھگیری انت، بلکیں من وَ گوش آں کہ تو جاورانی پشتدر ءَ وابے دیست تئی واب ھم گھکیری ءِ نشانی انت کہ واب ھم چاگردی راستیانی پشتدر ءَ گندگ بیت، واب یک سکینے ءُ واب آگھی ءِ شبین انت ءُ من پد ءَ گوشاں، واب ھم گھگیری انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔