بلوچ نیشنل موومنٹ ءِ بُنجاھی جارکش ءَ رسانکدر ءَ وتی شنگ کُتگیں درشانی ءَ گْوشتگ کہ بی این ایم ءِ دھمی راجمان پتر ءِ نیاد کہ شھید ڈاکٹرمنان ءُ بلوچستان ءِ آ دگہ شھیداں نامدات اَت گوں سوبمندی ءَ آسر بیتگ۔ گل ءِ گچینکاریانی پد ءَ اگدھانی سر ءَ نوکیں اگدہ دار ءُ بنجاھی پتر ءِ باسک گچین بیتگ اَنت۔
آئی ءِ رد ءَ ڈاکٹر نسیم سرکماش، ڈاکٹرجلال کمک سرکماش، بابل لتیف دومی کمک سرکماش، مزن کارگشاد دل مراد، اولی کمک مزن کارگشاد کمال، دومی مزن کارگشاد ھسن دوست، کلیتدار ناسر، رسانکدر ءُ ربیدگی کارگشاد کازی ریھان، گھبودی کارگشاد ماسٹر زپر، دری کارانی کارگشاد ھمل حیدر ءُ مردمی اگبالانی کارگشاد ناظر نور گچین بیتگ اَنت۔
آئی گْوشتگ کہ نام گیپتگیں اگدہ دار ءُ بنجاھی پتر ءِ باسک داں آیوکیں چار سال ءَ چہ راجمان پتر ءِ نیمگ ءَ دیگ بیتگیں زمہ واریانی سر ءَ کار کن اَنت۔
جارکش ءَ گْوشتگ کہ بی این ایم ءِ راجمان پتر ءِ تہ ءَ بلوچستان ءِ درسیں ھنکین، دمگ ءُ چہ گلزمین ءَ ڈن نندوکیں بی این ایم ءِ راجمان پتر ءِ 79 گچینی باسکاں بھر زرتگ۔
بی این ایم ءِ جارکش ءَ گْوشتگ کہ بی این ایم ءِ راجمان پتر ءِ پاگواجھی گل ءِ سرکماش خلیل بلوچ ءَ کُتگ کہ آئی ءِ تہ ءَ گل ءِ کارراھبند، گل ءِ کار ءُ دیم ءِ شوندات، ڈیھ، دمگ ءُ میان استمانی جاور ءِ سر ءَ چمشانک ءُ شرگداری ءِ بھر ءَ وتی سر ءَ وت شرگداری ءِ راھبند ءِ رد ءَ پارٹی ءِ گْوستگیں کارکرد ءِ شر ءُ نزوریں پھناتانی سر ءَ دلجمی ءَ گپ ءُ تران بیتگ۔
آئی گْوشتگ کہ بلوچستان ءِ نگیگیں جاورانی تہ ءَ چیئرمین خلیل ءِ سروکی ءَ دھمی راجمان پتر ءِ نیاد ءُ ایشی ءِ پد ءَ نوکیں سروکانی گچین پہ گل ءَ پرارزشتیں چیدگے ءِ بستار ءَ دار ایت۔ اے سوبمندی گل ءِ درسیں باسکانی دید ءُ آیانی شپ ءُ روچ ءِ تکانسری ءِ برورد اِنت بلے چہ ایشاں گیشتر کرد گْوستگیں سرکماش خلیل بلوچ ءِ بیتگ کہ آئی ءَ اے ناگْومیں جاوراں ھم انچیں آسراتی ودی کرتگ کہ چہ بلوچستان ءِ ھمک کنڈ ءَ کونسلر یکیں پتر ءَ نشت بہ کن اَنت۔
بی این ایم ءِ جارکش ءَ وتی درشان ءِ گُڈی ءَ گْوشتگ کہ نوک گچین بیتگیں اگدہ دار گوں گل ءُ بلوچ راج ءَ مسام کن اَنت کہ راجمان پتر ءِ شور ءُ سوجانی رد ءَ بی این ایم ادارہ جاتی بنیاد ءَ مھر ءُ مھکم کنگ بیت۔ پہ بلوچستان ءِ آجوئی ءَ جھد کنوکیں درسیں گل کہ گوں آیاں ھستیں سسا ءُ سمائی بگیریانی تہ ءَ سْیادیانی سرسبزینگ ءُ پہ بلوچ راجی سیت ءَ پجیگ ءَ زْرمبشت ءِ دیم ءَ برگ ءَ مھکمیں کوشست بنا کنگ بیت۔ ھم پتی ءُ گل ءِ میان ءَ آمید ءَ برجاہ داران گوں راجی واھگاں ھمدپ بلوچ ءِ درسیں تواناں یکیں نیمگ ءَ کنگ بی این ایم ءِ مسام ءِ بھر اِنت پہ ایشی ءَ گْوستگیں روچاں ھم بی این ایم ءِ راھشوناں مادنیں گامگیج زرتگ ھمے کوشست ءُ کار برجاہ دارگ بیت ءُ ایشی ءِ تہ ءَ شاھگانی آرگ بیت۔