مزن پگریں شاری
نبشتہ کار: سدرہ نسیم
دی بلوچستان پوسٹ
ھر روچ ھزاراں مردم اے گیدی ءَ وتی چماں پچ کن انت ءُ ھزاراں مردم وتی سپر ءَ جن انت ءُ رکست بنت ھما مردم چہ زات ءَ چہ درکاینت ءُ (اجتماعی مفاد)، ازت، ننگ ءُ ناموس ءِ ھاتر ءَ وتی لیکہ سوچ ءُ پکر ءِ سر ءَ اوشت اَنت ءُ وتی وھد، مال ءُ جان ءَ کربان کن اَنت ءُ چہ دنیا ءَ رکست بوگ ءَ پد ھم وتی پکر، امل ءُ ٹوھیں کرد ءِ سوب ءَ پہ مُدام ءَ زندگ بہ اَنت سامراج، وھد ءِ ھکمران یا کہ چاگرد ھما مردم ءِ گون ءَ ھر وڑیں کردگار بہ کنت بلے راجدپتر ھچبر آئی ءِ گون ءَ نہ انساپی نہ کنت آ ھما کرد ءِ ھُدابُند اِنت ھما کرد ءَ آئی ءَ بکش ایت-
مزن پگریں شاری ھما کرد ءِ واھند اِنت کہ مروچی آئی ءِ کرد سرجمیں گیدی ءَ چو رُوچ ءِ رُژن ءَ شنگ ءُ تالان اِنت چو استال ءَ درپشگ ءَ اَنت، چو وشبو ءَ گوات ءَ ھوار اِنت ءُ بلوچ ڈیھ ءُ ملپداں شنگ ءُ تالان اِنت۔
مزن پگریں شاری بلوچ سرڈگار ءِ ھما سر متابیں سر اِنت کہ وتی راجی پجار، وتی زبان ءُ زمین ءِ ھاتر ءَ وتی لوگ، جاہ، مرد ءُ چُک نہ چار اِت انت ءُ وتی نُگرھیں جان ءَ بارود بست ءُ پہ زمین کُربان بوت ءَ مارا یک انچیں راھے ءِ نشان دات کہ اے راہ مئے وشیں بانداتے ءِ راہ اِنت اے راہ کُربان بوگ ءِ اِنت اے راہ ءَ سپر کنگ گران اِنت بلے کنگی اِنت پرچا کہ وشیں دمان، آجوئیں زند ءُ وشیانی منزل ءَ ھمے راہ ترا بارت ءُ سر کنت۔
شاری ءَ مئے واب کپتگیں مردمانی چم پچ کُت اَنت ءُ کُربان بوگ ءِ یک نوکیں کشکے ءِ ڈس اِت ئِے آئی ءِ داتگیں کُربانی مارا ھمے کُلوہ ءَ دنت کہ بس ھُشک ءَ نندگ ءُ ندارہ چارگ ءَ نہ کہ اے زُلم ءُ زوراکی ءِ تھاریں شپ کُٹ ایت نہ آجوئی ءِ سُھردپیں بام آسیت، بلکیں گُلامی ءِ آس تئی ھر چیز ءَ سوچ ایت ءُ ھلاس کنت۔
آ وتی گُڈی کُلوہ ءِ تہ ءَ ھمے گُش ایت کہ بایدیں ھمک مردیں وتی لوگ ءِ جنین ءَ ھم اے راہ ءَ روان بدے اَنت کہ اے چاگردے بلاھیں بھر ءِ جنینانی اَنت ءُ مروچی جنین چہ ھچ مردین ءَ کمتر نہ اِنت ھمے جنین پریس کلبانی دیم ءَ اتک کنت، روڈانی سر ءَ پہ گار ءُ بیگواھانی ھاتر ءَ روانک کش اِت کنت گُڑا جنگ ءُ پدائی اُرش پرچا کُت نہ کنت؟ شاری ءَ وتی سپر جت ءُ پشکپتگیں بھر مئے نزوریں کوپگاں ایر کُت بایدیں ما شاری ءِ رند پداں برو اِیں آئی ءِ پشکپتگیں کاراں سرجم بہ کن اِیں، گلامی ءِ مھریں سانکلانی سندگ ءَ پہ توجیل بہ سازیں مارا ھما کاروان ءِ بھر بوگی اِنت کہ آئی ءِ تہ ءَ شارج اُمر جان ریھان جان ءَ ھوار بازیں ورنایاں وتی ھر چیز یل ءَ دات ءُ مرگ امباز اِت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔