نبشتانک: بی این ایم ءِ گْوستگیں سرکماش خلیل بلوچ راجی جُنز ءِ کْوھیں چیدگ
نبشتہ کار: ڈاکٹر مھروان بلوچ
دی بلوچستان پوسٹ
یک راجے ءَ را یکمشت ءُ یکجاہ کنگ ءِ ھاتر ءَ پارٹی ءِ جوڑ کنگ الّمی اِنت، پرچے کہ پارٹی ءِ تلّو ءِ سر ءَ تو راج ءِ دھکان، شِپانک، پوریاگر ءُ دگہ ھر پِڑ ءِ لس مھلوک ءَ تو یکجاہ ءُ یکمشت کرت کن ئے، بلے چُشکہ یک راجے یکمشت کنگ ءُ سرپدی دیگ ءَ پارٹی الّمی اِنت گُڑا اِے گپ تچک ءَ زانگ لْوٹ اِیت کہ پارٹی ھم بے رھشون ءُ بے سرکماش ءَاِے پراہ ءُ دراجیں سرڈگار ءِ دمگ دمگ ءُ ھلک ءُ میتگاں تئی راجی جُنز ءِ درپشوکیں پیام ءَ رسینت کرت نہ کنت۔ پَسانی رمگے بِہ بیت آ بے شَپانک ءَ شِینگ ءُ شانگ بیت،
بلوچ راجی جُنز ءِ تہ ءَ کارِست وَ سک باز اَنت بلے آ کارست ءُ کردانی تہ ءَ من ءَ اگاں کسّے ءَ بے کساس وتی شِیرکن ءُ مِھروانیں گپّانی سانکلاں گْوں بندوک کرتگ گُڑا آ کارِست بی این ایم ءِ سرکماش ھلیل بلوچ اِنت، کہ آ یک پکیر تب ءُ نرم مزاجیں بنی آدمے۔۔
مروچی بلوچ راج زورگریں پاکستانی ءُ پنجاپی لشکر ءِ آھنیں پَنجگاں گْوں بندوک ءُ گلام اِنت، بلوچ راج ءِ سر ءَ زوراکی یکشلا برجاہ اِنت، بلے اِے اھد ءِ تہ ءَ یک گُلامیں راجے کہ آ ھر تک ءُ پھناتاں پدمنتگ ءُ زوراکیانی آماچ اِنت، آئی ءِ یکجا یکنت ءُ یکمشت کنگ یک بلاھیں گرانیں ڈُبّھے،
ھمے پیم ءَ بی این ایم ءِ گْوستگیں کماش شھمیریں گلام مھمد بلوچ، شھمیریں ڈاکٹر منان، بیگْواھیں ڈاکٹر دین مھمد ءَ ھوَار بازیں رھشونے زورگریں پنجاپی لشکر ءِ دستاں کُشگ ءُ چگل دیگ ءُ بیگواہ کنگ بوت اَنت، اِے ھما دور اَت کہ بی این ایم بازیں اڑ ءُ جنجالانی دیمپان اَت، گار ءُ بیگواہ کنگ ءِ درچ یکشلا برجاہ اَت، مھلوک بے کساس تُرس ءِ آماچ اَت، بلوچستان ءِ تہ ءَ انچیں گردگ یک بلاھیں جنجالی اَت، راجکاری کنگ بے کساس گِران ءُ مشکل اَت، بلے کماش غلام مھمد ءِ پِگر ءِ منّوگر ءُ آئی ءِ ھمکوپگ ءُ ھمراہ واجہ سرکماش خلیل بلوچ ءَ اِے گپ مار اِت کہ من ءَ شھمیریں سنگتانی پِگر ءُ لیکہ دیم ءَ برگی اِنت، اگاں جاور چے پیم ءَ نہ گْیگ اَنت بلے من شھیدانی اِے امانت ءَ چہ پُرشت ءُ پُروش رکّین اِیں،
بپدمنتگیں راج ءِ درد واجہ کماش خلیل بلوچ ءِ جبین ءَ چْو آس ءِ پیم ءَ روک اَت، آئی ءَ را نہ گرم ءُ لِوار ءَ داشت کُرت ءُ نہ کہ زورگریں پاکستان ءِ لشکر تُرس ءُ بیم ءَ۔۔۔ واجہ گْوں جبین ءِ کرس بستگیں درداں ءُ وتی رپتگیں شھمیریں سنگتانی پِگر ءُ لیکہ ءَ بلوچستان ءِ دمگ دمگ ءَ مراگش برجم داشت، راجکاری ءِ پِڑ ءَ آئی ءَ شِپانک، پوریاگیر، ماشٹر، ڈاکٹر ءُ ھر پِڑ ءِ مردم ھوار کرت اَنت ءُ یکبرے پد ءَ بی این ایم ءَ را زِندگ ئِے کُرت، پرچے کہ وھدے بی این ایم ءِ پیسریگیں رھشون گار ءُ بیگواہ کنگ ءُ شھید کنگ بوتگ اِت اَنت گُڑا اِے وھداں بی این ایم ءِ جْوڑشت (structure) بے کساس نِزور اَت۔
بی این ایم ءِ سرکماش ھلیل بلوچ اگاں اِے نہ گیگیں جاور بِہ چارتین اَنت ءُ اِے بِہ جْیڑ اِتیں کہ بلوچستان ءِ جاور نہ گْیگ اَنت، آجوئی دوستیں رھشون ءُ باسک ریاستی چیریں ترامگیجانی دست ءَ گار ءُ بیگواہ ءُ شھید کنگ بوگ اَنت، راجکاری کنگ نہ بیت، وت بِہ شُتیں درملک ءَ یورپ، کینیڈا، امریکہ، سوئزرلینڈ ءُ آدگہ درامدیں ملکاں بِہ شُتیں منی ھیال ءَ بی این ایم ءِ نام ءُ نشان ھم نہ گواہ اِت۔
اگاں کماش ھلیل بلوچ بہ لْوٹ اِتیں گُڑا منی ھیال ءَ گْوں ارزانی ءَ درملک ءَ شُتگ اَت، بلے لیڈر ءُ رھشون ھما اِنت کہ آ مُدام دیم ءَ بیت، ھر اڑ ءُ جنجالانی تہ ءَ چْو کْوہ ءَ مِکّ بیت۔ بزّگیں راج وت شِینگ ءُ شانگ اِنت، بے رھشون ءَ آ کدی ھم وتی تچکیں راہ ءَ گِیشینت کُرت نہ کنت۔
وھدے کہ پارٹی ءِ رھشون وتی باسکانی میان ءَ ساڑی بیت گُڑا باسکانی ھم پِگر چْو کوہ ءَ مُھکم بیت، سرکماش ھلیل بلوچ مدام گْوں ھنکینی ءُ بُنزھی باسکاں ھم یکجاہ بوتگ ءُ میدان ءَ ساڑی بوتگ،
من ءَ یات بیت کہ آ وھداں من گْوں واجہ سرکماش ھلیل بلوچ ءَ دیم پہ دیم دوچار نہ کپتگ اِت اِنت گُڑا منی واھگ ھمیش اَت کہ آ کُجام وشّیں روچ بیت کہ من وتی راجی جُنز ءِ سرکماش ءَ دیم پہ دیم ءَ بِہ گنداں، بلے آئی بُرز ءُ بلندیں نام من مدام بی این ایم ءِ سنگتانی دپ ءَ اِشکرتگ اَت، یک بیگاھے ءِ وھد ءَ من ءُ بی این ایم ءِ سنگت باگی بلوچ آواران کولواہ ءَ دوچار کپت انت گُڑا آئی ءَ من ءَ واجہ ءِ بابت ءَ بازیں گپّے گْوشتے کہ واجہ یک پکیر تبیں بنی آدمے، اگاں منی وڑیں نا بِزانتیں مردمے اِے جُھد ءَ گْوں بندوکیں گُڑا اِے منی واجہ ءُ پکیر تبیں انسان سرکماش ھلیل بلوچ ءِ مِھرانی برورد اِنت، واجہ ءَ چہ ما باز در بُرتگ، آئی ءَ بازیں پِڑاں مئے رھشونی کُرتگ اگاں مْوہ بوت گُڑا من ترا الّم واجہ ءَ گْوں دیم پہ دیم ءَ گِند ءُ نندے کنائین آں۔
من وَ پیسر ءَ واجہ ءِ ستاہ گیش ءَ چہ گْیش اِشکرتگ اَت بلے باگی بلوچ ءِ اِے گپّاں چہ منی واھشت گیش بوت اَنت کہ من گْوں واجہ الّم دیوانے کن اَنت۔
ھمے پیم ءَ بازیں مراگش برجم دارگ بوتگ اِت اَنت من ھر کج ءَ بِہ بوتین اَنت گُڑا وت ءَ را ساڑی کُرت۔ بلے یکروچے کولواہ ءَ یک مراگشے بوت گُڑا ھال اَت کہ اِے مراگش ءَ بی این ایم ءِ بُنجاھی کماش واجہ ھلیل بلوچ، شھمیریں بانک کریمہ بلوچ، بی ایس او آزات ءِ بیگواھیں سرکماش زاھد بلوچ پیداک اَنت۔ بلے لھتیں جاورانی سوَب ءَ بانک کریمہ بلوچ مراگش ءَ بھر ئِے زُرت کرت نہ کرت۔ گُڑا من چہ وشّی ءَ بے تاھیر بوت آں کہ شپ کدیں سُھب بہ بیت کہ من اِے مراگش ءَ وت ءَ ساڑی بہ کن آں،
اِے مراگش ءِ پھَازگ ءَ زِرباری دگّ ءَ بلوچ سرمچارانی گاڑی ءُ پرپٹانی روگ ءَ آیگ اَت، کولواہ (آواران) جتا جتائیں بُنجلاں پنجاپی لشکر مارٹر گولہ ءُ تیر اُرش کنگ ءَ اَت، تیرگواری یکشلا برجاہ اَت، بلے اِے وھداں کولواہ گْوں آشوبی مولماں پہ پنجاپی لشکر ءَ یک بلاھیں تُرس ءُ بیمے ءِ نام اَت، بلوچی ءَ گْوش اَنت کُچک وکّ اِیت بلے کارروان وتی راہ ءَ روت، ھمے پیم ءَ اگاں پنجاپی لشکر ءَ وتی بُنجلاں چہ تیر ءُ مارٹر گْواری کُرت بلے آ چہ سرمچارانی تُرس ءُ بیم ءَ چہ بُنجلاں در نہ اتک اَنت۔ مراگش ءِ واست ءَ زھگ زالبول، پیر کماش، کُل رھادگ اِت اَنت گاڑی آنی دراجکشّیں دِرچے زِرباری دگّ (روڑ) رھادگ اَت، گام پہ گام سرمچار روڑ ءِ پھازگ ءَ اوشتوک اِت اَنت کہ مراگش ءِ سر ءَ پنجاپی لشکر اُرش کرت مکنت۔
ھمے پیم ءَ ما پرپٹانی سر ءَ سرگپت ءُ شُت اَنت مراگش ءَ ھوار بوت آں، من ودار اِت آں کہ بی این ایم ءِ سرکماش ھلیل بلوچ بیت ءُ وتی ھیالاں درشان بِہ کنت، ساھتے ءَ رند واجہ ھلیل بلوچ اتک وتی گُشتانک ئِے بِندات کرت اَنت، اِے مراگش ءِ تہ ءَ پیر ءُ کماش، زھگ ءُ زالبول کُل واجہ گپّاں گْوش دارگ ءَ اِت اَنت، واجہ ءِ ساھریں گپّاں بازیں ورناہ ءِ دل ءَ را سِھر کُرت ءُ گْوں آجوئی جُنز ءَ بندوک کرت۔ چاریں پھناتاں سرمچار کوھانی سر ءَ گْوں راکٹ لانچراں پھازداری ءَ اِت اَنت، اِے وھد انچیں وھدے اَت کہ کولواہ گْوں آشوبی درشماں اجب نِدارگان اَت۔ پاکستانی لشکر سک ءَ لاچار اَت، چہ بُنجلاں در آیگ آئی ءِ واست ءَ یک مَرگے اَت۔
اِے راجکاری ءِ پیچ ءُ تابیں کِشکاں پد ءَ جاور انچش نہ گْیگ بوان بوت اَنت کہ من کماش ءَ گْوں ھاس دیم پہ دیم نہ بوت آں بلے رسانکدر ءَ منی ءُ واجہ ءِ ھال ھوال برجم بوتگ، آئی ءِ مھروانیں گپ، نرم مزاجی دور چاری ءَ من سلام پیش کن اِیں، من اِے باوستانی تہ ءَ واجہ ءِ گپّاں چہ بے کساس اَسر مند بوت آں، من بازیں چیزے دربرت،
واجہ ءِ دُرستیں گپّاں چہ من یک انچیں چیزے دربرت کہ راجکاری ءِ پِڑ ءَ اِے درونت گام پہ گام منی رھشونی ءَ کنت، آ درونت نرم مزاجی، دومی ءِ گپ ءِ گْوشدارگ، سبر ءُ برداشت اَنت۔ اِے چیز من چہ واجہ ھلیل دربرت اَنت۔
چُشکہ ریاستی کاسگ چَٹانی پلنڈیانی تہ ءَ من بازیں رند ءَ اِے گپ اشکرتگ اَت کہ بی این ایم پُرشت ءُ پروش ءِ آماچ اِنت، بلے وھدے کہ من چک چر اَینت ءُ آئی ءِ سرکماش ءِ نیمگ ءَ ھیال گْور کُرت، گُڑا من دلجم بوت اَنت کہ بی این ایم ءِ رھشونی یک انچیں کماشے ءِ دست ءَ انت کہ آ کدی راج ءِ پارٹی ءَ پرشت ءُ پروشی ءَ نیل اِیت، ھمے پیم ءَ آئی ءَ مروچی سابت کرت ءُ پیش داشت، مروچی بی این ایم ءِ دھمی سوبمندیں راجمانی پتّر ءَ دژمن تیوگیں پِلینڈی بے اَسر کرت اَنت
راجی آجوئی ءِ جُنز ءِ تہ ءَ پِگری ءُ لیکھی سنگت کُربانی دیگ ءَ ھچ بر چک ءُ پد نہ بنت، بلے بے رھشون ءَ آ وت ءَ داشت کرت نہ کن اَنت، اِے نہ گیگیں جاورانی تہ ءَ بی این ایم ءِ سرکماش ءَ پارٹی ءِ پیام بلوچستان ءِ کُنڈ کُنڈ ءَ سر کرت، اَے گپ پہ آیوکیں بلوچ راجی جنز ءِ راجکاری ءِ پڑ ءَ بندوکیں لس مھلوک ءَ پہ یک سکینے کہ نہ گیگیں جاورانی تہ ءَ ھم اگاں کسّے گْوں وتی پِگر ءَ مُھکم بہ بیت گُڑا الّم وتی پیام ءَ سر کرت کنت ءُ سوبمند بیت۔
بی این ایم ءَ بازیں اڑ ءُ جنجالی دیستگ، آئی ءِ باسک، رھشون، رستریں لشکر ءِ آھنیں دستاں چہ بیگواہ کنگ ءُ شھید بوتگ اَنت۔ بازیں رنداں گاسگ چَٹّیں ڈاکٹر مالک، کُدوس بزنجو ءُ دِگہ وتنامیں پارلیمانی لیڈراں اِے گپ جتگ کہ ما مزاکرات ءَ تیار اَنت، بلے دومی نیمگ ءَ راج ءَ چک ترّینتگ کہ مئے آجوئی جُنز ءَ گْوں بندوکیں رھشون چے پَسّو دے اَنت، گُڑا اِے وتگڑیں گپّانی بگیری ءَ بی این ایم ءِ کماش ھلیل بلوچ ءَ وتی درشان ءِ تہ ءَ اِے گپ تچک کرت ءُ گْوشت کہ مئے مول ءُ مراد، مئے لوٹ ایوک ءَ بلوچستان ءِ آجوئی اِنت، ما ایشی ءِ چہ کم ھچ گپ ءَ تیار نہ اَنت، ما وتی شھیدانی پِگر ءُ پلسپہ ءَ دیم ءَ بر اَنت۔
یک دراجیں پندے ءِ بُرّگ ءَ چہ پد پارٹی ءِ سرکماش ھلیل بلوچ ءَ بلوچ راج ءِ او بلوچ شھیدانی امانت گْوں مھکمیں دابے ءَ نوک گِچین بوتگیں سروکاناں سر کرت۔ راج ءِ اُمیت بی این ایم اِنت، چُشکہ انوگیں وھد ءَ ریاست بی این ایم ءِ جاہ ءَ بلوچستان ءِ گرؤنڈ ءَ لھتیں وتگڑیں پارٹی جْوڑ کنگ ءَ اِنت، ایشی ءِ جْوڑ کنگ ءَ لھتیں وتی آستونک ءِ تہ ءِ مارانی دست ھم مان اِنت، بلے من اِے گپ ءَ تچک کن اِیں کہ نوکیں پارٹی بی این ایم ءِ جاہ ءَ کدی ھم گپت کرت نہ کنت، آ تلّو کہ شھمیریں غلام مھمد ءُ ڈاکٹر منان ءِ پارٹی اِنت گُڑا آئی ءِ جاہ ءَ اِے وڑیں وتگڑیں پارٹی گپت کرت نہ کنت۔ مئے چینچو جُھد بیت گُڑا ما کوشست بہ کن اَنت کہ بی این ایم ءَ مھکم بہ کن اَنت، دِگہ وتسریں واب مہ گند اَنت، اِے وتسریں واب دروھاپ ءِ دروشم ءَ اَنت، مارا یاشانی سر ءَ بیسہ کنگی نہ اِنت، بس ھما شھیدانی امانت کہ مارا دیگ بوتگ، مئے جُھد ھمیش اِنت کہ دمگ دمگ، شھر، وانگجاہ، مزن شھدربرجاہ ءُ کُنڈ کُنڈ ءَ پارٹی ءِ جْوڑشت ءَ را سر بِہ کن اَنت ءُ وتی لس مھلوک ءَ را گیش ءَ چہ گیش پِگری ءُ لیکھی بنیات ءَ ھوَار بِہ کن اَنت۔
پہ انچائیں زَھرشانی کنگ ءَ پارٹی کدی مھکم نہ بیت، پارٹی ءِ لیڈرشپ ءَ را گوں باسکاں، گْوں لس مھلوک ءَ ھمگرنچ بوگی اِنت، تاںکہ میدان ھورک َ ھالی مہ بیت، اگاں ما میدان ھالی کرت گُڑا الّم وتگڑیں پارٹی جاہ ءَ گِر اَنت، ھالی پہ زھرشانی ءَ راج کدی آجو دوست بوت کرت نہ کنت، اِے وتگڑیں پارٹی آنی بِستار چو دروھاپے ءِ پیم ءَ اَنت۔
اُمیت اِنت کہ نوک گچین بوتگیں اگدہ دار، پیسریگیں سرکماش ھلیل بلوچ ءُ آئی ءِ ھمکوپگ ءُ ھمرانی پیم ءَ شھیدانی امانت ءَ گیش ءَ چہ گیش مُھکم کنگ ءِ جھد ءَ کن اَنت، گراؤنڈ ءِ سر ءَ کار کنگ ءِ واست ءَ سائنسی بُنیات ءَ سرشونی ٹاھین اَنت۔
من وتی نبشتانک گُڈّ سر ءَ پارٹی ءِ پیسریگیں سرکماش ھلیل بلوچ ءُ آئی ھمکوپگیں ھمراھاں گرانبھائیں ءُ پُرمھریں سلام پیش کن اِیں کہ آئی ءَ وتی اھد ءَ پارٹی ءِ مھکم کنگ ءَ گرانتریں ساھت ءُ جاورانی دیمپانی کرت ءُ شھید غلام مھمد، شھید ڈاکٹر منان ءُ بیگواھیں دین جان ءِ پگر ءُ پلسپہ ءَ را دیم ءَ بُرت، اُمیت اِنت کہ ھمے پیم بی این ایم ءِ انوگیں سرکماش ڈاکٹر نسیم بلوچ، بی این ایم مزن کارگشاد واجہ دلمراد بلوچ گْوں کابینہ ءِ آدگہ سنگتانی ھواری ءَ راجی آجوئی جُنز ءِ پڑ ءَ وتی جُھد ءَ برجم دار اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔