ووٹ پِنڈاں – سراج کریم دشتی

آزمانک: ووٹ پِنڈاں

نبشتہ کار : سراج کریم دشتی

دی بلوچستان پوسٹ

ھر ھما وھد ءَ کہ ووٹ لوٹوک اتکگ ات انت ما گس ءِ پیشگاہ ءَ تگردے پچ کُتگ نادینتگ اَنت۔ واجھاں اچ ما ووٹ لوٹ اتگ “ما وتی گوستگیں ھزر پیش کتگ اَنت واجہ شما پہ مئے وڑیں گریباں ھچ نہ کن ات ھما کہ کمو چرپ تر انت یا وَ شپ ءُ روچ شمئے پادوناں کپتگ اَنت یا شمئے دستی ءُ دپی مردم انت پہ ھمایاں کن اِت –

مرچی پد ءَ ھما پتر اَت، مئے پد ءَ ھما گپ ، مئے گپ ءِ پسہ ءَ واجھے ءَ گشت ” اناں واجہ ما پہ شما ءُ کل راج ءِ واست ءَ کنگ ءَ ایں گوستگیں گپ ءَ بل اِت پرچاکہ ما دو سال ھکومتی کتگ، اِے رند ءَ مارا بچار اِت ما پہ شما الم چیزے نہ چیزے کن ایں “۔

تگرد ءَ چہ ڈن چِل ءُ لیگاریں کریشی پادانی سر ءَ نشتگ اَت آئی ءَ بے ترس ءُ بے میار ءَ دپ ءِ پُر ءَ درائینت ” واجہ شما ھما تِرّ کے ءَ ساری داتگ ، من زاناں اے رندی ھم دے اِت ئِے” جت ئِے شھکارگے بن ءَ ئِے کُت وتی دست کمرزانی کت انت نشتگ ۔

تگرد ءِ لمب ءَ نشتگیں واجھانی دست راستے ءَ وش کُت چمپلے کریشی ءَ بزگ پشت ءُ سر کپت ۔

“ابا او ابا پادا “من اناگہ ءَ گڑ اِت آں ، چمپل منی دل بند ءِ سر ءَ ایر انت منی چک ءَ منی لنکک کپتگ اَت پاد کنگ ءَ انت ابا او ابا پل ءِ پشت ءَ لھتیں گاڑی اوشتاتگ اماں گش ایت بہ رو بہ چار اش من پاد اتک آں چہ لوگ ءَ سر کش اِت چاراں اِے وَ ھمے بے چم کُٹ ءُ بے آپیں واجھاں پہ ووٹ ءِ پنڈگ ءَ اتکگ انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔