نبشتانک :من پہ کُجام اُمیت ءَ زِندگاں ؟
نبشہ کار : کلیم بیوسؔ
دی بلوچستان پوسٹ
من ءَ کساس ھشت ماہ اَت کہ من چہ وتی مُلک ءَ دور اِت آں ھمک رُوچ یک نوکیں اَزابے اَت پہ مناں ءُ من ھمک رُوچ بُن گپتگ اِت آں ءُ زھیریگ اِت آں کہ باریں کَد چہ اے بےمیاریں انسانان ءُ چہ اے بیوپائیں سَرزمین ءَ جُنزان جُنزان ءَ داں وتی گُلزمین ءِ سر ءَ پاداں اِیر کناں ءُ وت ءَ را چہ سرجمیں دَرد ءُ اندُوھاں آزات بہ کن آں بلے دل مدام چو کازی ساھب ءِ گُشتن ءَ گُشگ ءَ اَت کہ” دل ءَ مہ وَر اے وَدارنی کَھریں رُوچ گوز اَنت“ ہلھمے اُمیت ءَ کہ مرچی ناں باندا من چہ اے زِندان ءَ آزات باں ءُ پد ءَ ھما کَسانی ءِ لیب جَاہ ءَ رَواں کہ اودے سنگ ءُ ھاک من ءَ توار ءَ اَنت-
ھما جَاہ ءَ کہ من اَولی رَند ءَ گوں وت ءَ دُوچار کَپتگ اِت آں کہ من کئے آں؟ ءُ منی زِندگ بوگ ءِ مول ءُ مُراد چی اَنت ؟ءُ دِگہ ھزار بے سَریں جُست کہ نوں دل ءَ پھک ءَ شمشتگ آں بلے لھتے جُست کہ مُدام دِل ءِ سَر ءَ گُکّ اَنت ءُ آھاں چے اَولی جُست کہ من کئے آں ؟ من یک بے زبانیں اِنسانے آں کہ من نزاناں من دَاں اے وھد ءَ چوں زِندگ ءُ سَلامت آں ءُ اے ھم زَانت نہ کناں کہ دَاں بیگاہ ءِ رُوزرد من زِندگ ءَ لوگ ءَ واتر باں یا نہ بلے اُمیت بلاھیں چیزے کہ مردم ءَ باز سکین دَنت کہ زندگی ءِ باندات سک رُژناہ اِنت ءُ دومی جُست منی زِندگ بوؤگ ءِ مول ءُ مراد چے اِنت؟ منی زِندگ بوؤگ ءَ رَا مول ءُ مُراد نیست اَنچو کہ مُراد ساحِر گُش ایت ” نہ اِلم ءِ شوک نہ کوم ءِ دُوستی نہ سُدّ دُنیائے “ اِلم وَ من ءَ چے سک باز دُور اِنت ہمنچو دُور کہ من ءَ مُدّتے ھم سماء نہ بیت کہ من چے ونتگ ءُ اے ونتگیں من ءَ کُجا کار دینت۔ منی گور ءَ اِلم نیست اگاں کمے ھم ھست گُڑا اے دُروگیں اِلمے اے آ یک انچیں اِلمے کہ پہ زور دَر بَرگ ءِ جُھد کُتگ یا کہ پَرمایگ بوتگ ءُ دُومی کوم دُوستی وت یک بلاھیں دُنیائے کہ اے دُنیا ءِ تہ ءَ بازیں مردماں سرداری کُتگ ءُ بازینے ءَ وتی زِند بَبا داتگ ءُ بازینے ءَ جُھد کُتگ ءُ پد ءَ پُشت مانداتگ ءُ چہ چمانی دیم ءَ گار بوتگ آں ءُ چکّ ءُ پد ھم نہ بوتگ آں کوم دُوستی چوناھاں ھر بنی آدم ءِ تہ ءَ ھست بلے آئی ءِ زِندگ کَنگ ءِ ھاتر ءَ لھتے جُھد کنگی اِنت بلے کس نکنت ھبر اگاں منی جندے بہ بیت گُڑا من گُشاں کہ کوم دُوستی یک دِگہ دِین ءُ مذھبے ءِ ھَکّ ءَ اَد ءَ کنت کہ من ءَ چے باز جِتاء اِنت کہ من دگہ دینے ءَ ءُ آ دِگہ دینے بَرے بَرے من وت ءَ را آدینک ءِ دیم ءَ اُوشتارین آں ءُ وت ءَ وت جُست کناں من پہ کُجام اُمیت ءَ زندگاں؟داں آدینک ھبر کنت بزان من ھبر کنگ ءَ آں بلے ما دؤئیں گُنگ اِنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔